Capítulo 97

Trahador den e cunucu di wijndruif

JESÚS a caba di bisa: “Hopi cu ta promé lo ser último i e último lo ta promé.” Awor el a ilustra esei door di conta un cuenta. El a cuminza: “E reino di cielo ta manera un homber, un doño di cas, cu a sali madrugá pa contratá trahador pa su cunucu di wijndruif.”

Jesús a sigi: “Ora [e doño di cas] a conbini cu trahador pa un denario pa dia, el a mándanan na su cunucu. Saliendo atrobé rond dje tercera ora, el a mira otronan pará desocupá na plaza; i el a bisa eseinan, ‘Boso també bai na cunucu i lo mi paga boso loke ta husto.’ P’sei nan a bai. Atrobé rond di ora di seis i di nuebe el a sali i a haci mescos. Finalmente, rond di diesun or’ el a sali i a haya otronan pará, i el a púntranan, ‘Pakico boso ta para aki henter dia desocupá?’ Nan dí cuné, ‘Pasobra ningun hende a contratános.’ E dí cu nan, ‘Boso també bai ne cunucu di wijndruif.’”

E doño di cas, of doño dje cunucu di wijndruif, ta Jehova Dios, i e cunucu di wijndruif ta e nacion di Israel. Trahador den e cunucu ta hende introducí den e pacto di Ley; nan ta específicamente hudío cu a biba den dia dje apóstolnan. Solamente trahador desde maínta tabata contratá pa traha pa un cierto salario. E salario tabata un denario pa un dia di trabao. Siendo cu “e tercera ora” ta 9 or’ di maínta, esnan yamá na ora di 3, 6, 9, i 11, a traha 9, 6, 3, i 1 ora respectivamente.

Trahador cu a traha 12 ora, of e dia henter, a representa lider hudío cu a keda ocupá continuamente den servicio religioso. Nan no tabata manera disípel di Jesús cu, pa casi tur nan bida, tabata ocupá den piscamento of otro trabao seglar. No a sosode te cu otoño di aña 29 EC cu e “doño di cas” a manda Jesucristo pa recoge eseinan pa ser disípel di dje. Asina nan tabata “último,” of trahador di cunucu cu a cuminza na ora di 11.

Finalmente, e dia di trabao simbólico a termina ora Jesús a muri, i e tempo a yega pa paga e trahadornan. E doño a sigi e regla extraordinario di paga e último promé, segun lo sigiente: “Na cabamento dje dia, e doño dje cunucu a bisa su formán, ‘Yama trahador i páganan nan sueldo, cuminzando cu e último te ne proménan.’ Ora homber di diesun or’ a yega, nan cada un a recibi un denario. P’sei, ora e proménan a yega, nan a kere cu nan lo recibi mas; pero nan també a recibi pago na razón di un denario. Ora nan a recibié nan a cuminza keha contra e doño i bisa, ‘E últimonan aki a traha un ora so; toch bo a hácinan igual cu nos cu a wanta carga dje dia i calor ardiente!’ Pero contestando uno di nan, e dí, ‘Amigo, mi no a hacíbo nada malu. Bo a conbini cu mi pa un denario, no ta berdad? Tuma loke ta di bo i bai. Mi kier duna e último aki mescos cu bo. No ta legal pa mi haci loke mi kier cu loke ta di mi? Of bo wowo ta malu pasobra mi ta bon?’” Na conclusion, Jesús a repiti un punto cu el a declara promé, bisando: “Asina e últimonan lo ser promé, i e proménan último.”

Nan a recibi e denario no ora Jesús a muri, sino na Pentecoste di aña 33 EC, ora Cristo, como e “formán,” a basha spiritu santo riba su disípelnan. E disípelnan di Jesús ta manera e “últimonan,” of trahador cu a cuminza na ora di 11. E denario no ta representa e don di spiritu santo mes. E denario ta algo pe disípelnan usa aki riba tera. E ta algo cu ta nifica nan sostén, nan bida eterna. Esei tabata e privilegio di ser un israelita spiritual, ungí pa predica tocante e Reino di Dios.

Pronto, esnan contratá promé a ripara cu disípel di Jesús a ser pagá, i nan a míranan usa e denario simbólico. Pero nan tabata kier mas cu e spiritu santo i privilegio di Reino asociá cuné. Nan murmuracion i kehamento a tuma e forma di persecucion di disípel di Cristo, e “último” trahadornan den e cunucu.

E cumplimento den e promé siglo tabata e único cumplimento dje comparacion di Jesús? No, e clero di cristiandad den siglo 20 aki, debí na nan puesto i responsabilidad, tabata “promé” pa ser contratá pa traha den e cunucu simbólico di Dios. Nan a considera predicador dedicá asociá cu e Sociedad Watch Tower Bible and Tract di ser “último” pa recibi cualkier asignacion válido den e sirbishi di Dios. Pero, realmente, ta net eseinan cu e clero ta despreciá cu a recibi e denario, esta, e onor di sirbi como embahador ungí dje Reino celestial di Dios. Mateo 19:30–20:16.

▪ Kico e cunucu di wijndruif ta representa? Ken e doño dje cunucu ta representa, i trahador di 12 ora i 1 ora?

▪ Na ki tempo e dia simbólico di trabao a termina, i na ki tempo nan a recibi nan pago?

▪ Kico pagamento di un denario a simboliza?