Capítulo 113

Humildad ne último pascu

PEDRO i Juan, bao di instruccion di Jesús, a yega caba den Jerusalem pa haci preparacion pe pascu. Jesús, aparentemente hunto cu e otro 10 apóstol, a yega mas laat den atardi. Solo tabata bahando na horizonte ora Jesús i su grupo a baha for di Ceru di Olijfi. Esei tabata e último bista di Jesús dje stad den dia for dje ceru te cu despues di su resureccion.

Pronto Jesús i su grupo a yega den e stad i a bai ne cas unda nan lo celebra e pascu. Nan a subi e trapi pa yega ne sala djariba, unda nan a haya tur preparacion hací pa nan celebracion privá di pascu. Jesús tabatin gana di celebra e ocasion, manera el a bisa: “Mi a deseá mashá di come e pascu aki cu boso promé cu mi sufri.”

Segun tradicion, participante di pascu a bebe cuater copa di biña. Despues di a acepta loke evidentemente tabata e tercera copa, Jesús a duna agradicimento i a bisa: “Tuma esaki i pasé di un pa otro den boso; pasobra mi ta bisa boso, Djawor padilanti lo mi no bolbe bebe dje producto di mata di wijndruif te cu e reino di Dios yega.”

Anto durante comimento dje cena, Jesús a lanta, a kita su paña exterior, a tuma un serbete, i a yena un punchera cu awa. Generalmente, e doño di cas a percura pa labamento di pia di bishitante. Pero, siendo cu ne ocasion ei, e doño no tabata presente, Jesús a atende na tal servicio personal. Cualkier apóstol por a probecha dje oportunidad di hacié; pero, aparentemente pa motibo cu a existi algun rivalidad den nan ainda, ningun a hacié. Awor nan a sinti bergüenza ora Jesús a cuminza laba nan pia.

Ora Jesús a yega cerca Pedro, el a protesta: “Siguramente lo bo no laba mi pia nunca.”

Jesús a bisa: “Amenos cu mi labábo, lo bo no tene parti cu mi.”

Pedro a contesta: “Señor, no mi pia so, sino també mi man i mi cabez.”

Jesús a contesta: “Ken cu a baña no tin cu laba mas cu su pia, sino ta henteramente limpi. I boso ta limpi, pero no tur.” El a bisa esei pasobra e tabata sa cu Hudas Iscariote tabata planeá pa traicioné.

Ora Jesús a laba e pia di tur 12, incluyendo e pia di su traidor, Hudas, el a bisti su paña exterior i a yega ne mesa di nobo. Anto el a puntra: “Boso sa loke mi a haci cu boso? Boso ta yamámi, ‘Maestro,’ i, ‘Señor,’ i boso ta papia correctamente, pasobra mi ta esei. Pues, si ami, aunque Señor i Maestro, a laba boso pia, boso també mester laba pia un di otro. Pasobra mi a pone modelo pa boso, cu, mescos cu mi a haci pa boso, boso mester haci també. Cu mayor berdad mi ta bisa boso, Esclabo no ta mayor cu su doño, ni esun mandá no ta mayor cu esun cu a mandé. Si boso sa tal cosnan, boso ta feliz si boso ta hácinan.”

Ki un les bonita den servicio humilde! E apóstolnan no mag busca e promé lugar, pensando cu nan tabata asina importante cu otronan mester semper sírbinan. Nan tabatin cu sigi e modelo cu Jesús a pone. Esei no tabata un modelo di ceremonia di labamento di pia. No, sino tabata un modelo dje disposicion di sirbi sin distincion, sin importa ki humilde of desagradable e trabao por tá. Mateo 26:20, 21; Marco 14:17, 18; Lucas 22:14-18; 7:44; Juan 13:1-17.

▪ Kico tabata singular tocante e bista di Jesús di Jerusalem ora el a drenta e stad pa celebra pascu?

▪ Durante e pascu, evidentemente cua copa Jesús a pasa pe 12 apóstol despues di a pronunciá un bendicion?

▪ Ora Jesús tabata riba tera, cua servicio personal doño di cas a percura pa bishitante, i pakico esei no tabata rindí durante e pascu cu Jesús i su apóstolnan a celebra?

▪ Ki doel Jesús tabatin haciendo trabao di criá ora el a laba pia di su apóstolnan?

Capítulo 114

E cena di conmemoracion

DESPUES cu Jesús a laba pia di su apóstolnan, el a cita e texto di Salmo 41:9, bisando: “Esun cu tabata come mi pan a hiza su hilchi contra mi.” Anto, birando molestiá den su spiritu, el a splica: “Uno di boso lo traicionámi.”

E apóstolnan a bira afligí i a puntra Jesús uno uno: “No ta ami, berdad?” Asta Hudas Iscariote a participa den e hacimento dje pregunta. Juan, cu tabata cant’i Jesús ne mesa, a leun atrás riba e pecho di Jesús i a puntra: “Señor, ta cua?”

Jesús a contesta: “Esei ta uno dje diesdosnan, cu ta dop cu mi den e conchi común. Ta cierto cu e Yiu di hende ta bai, manera ta pará skirbí di dje, pero ai dje hende mediante locual e Yiu di hende ta traicioná! Lo ta mihor pe homber ei si e no a nace.” Despues di esei, Satanás a drenta den Hudas, probechando dje habrimento di su curazón, cu a bira malicioso. Mas tardi durante anochi, Jesús apropiadamente a yama Hudas “e yiu di destruccion.”

Awor Jesús a bisa Hudas: “Loke bo ta haci, hacié mas lihé.” Ningun otro dje apóstolnan a comprende loke Jesús kier men. Algun a imaginánan cu siendo cu Hudas a tene e caha di placa, Jesús a bisé: “Cumpra loke nos mesté pe fiesta,” of cu e mester bai i duna algo na hende pober.

Despues cu Hudas a bai, Jesús a introduci un celebracion of conmemoracion henteramente nobo, cu su fiel apóstolnan. El a tuma pan, a bisa un oracion di agradicimento, a kibré, i a duné na nan, bisando: “Tuma, come.” El a splica: “Esaki ta nifica mi curpa cu lo ser duná na fabor di boso. Sigi haci esaki na recuerdo di mi.”

Ora cada un a come e pan, Jesús a tuma un copa di biña, evidentemente e cuarto copa usá den e celebracion di pascu. El a haci oracion di agradicimento també riba dje, a pasé pa nan, a pídinan bebe di dje, i a bisa: “E copa aki ta nifica e pacto nobo pa medio di mi sanger, cu lo ser dramá na fabor di boso.”

Pues, esei realmente tabata un conmemoracion dje morto di Jesús. Tur aña, dia 14 di Nisán, e tin cu ser repití, manera Jesús a bisa, na recuerdo di dje. E ta haci celebrador recorda loke Jesús i su Tata celestial a haci pa percura escape pa humanidad for di condenacion di morto. Pa hudío cu ta bira sigidor di Cristo, e celebracion ta reemplaza e pascu hudío.

E pacto nobo, cu e sanger dramá di Jesús a pone na vigor, ta reemplazá e pacto bieu di Ley. Jesucristo ta Mediador entre e dos participante—di un banda, Jehova Dios, i dje otro, e 144.000 hende cristian engendrá pe spiritu. Además di percura pordón di picá, e pacto ta percura pe formacion di un nacion celestial di rey-sacerdote. Mateo 26:21-29; Marco 14:18-25; Lucas 22:19-23; Juan 13:18-30; 17:12; 1 Corintio 5:7.

▪ Jesús a cita cua profecía bíblico tocante un compañé, i el a haci cua aplicacion di dje?

▪ Pakico e apóstolnan a síntinan profundamente afligí, i kico cada un di nan a puntra?

▪ Jesús a bisa Hudas haci kico, pero con e otro apóstolnan a comprende tal instruccion?

▪ Despues cu Hudas a bai, Jesús a introduci cua celebracion, i esei ta cumpli cu cua propósito?

▪ Ken ta participante den e pacto nobo, i e pacto ta logra kico?