Dios ke pa nos disfrutá di pas i felisidat pa semper den paradeis riba tera.

Kisas bo ta puntra bo mes: ‘Kon esei ta posibel?’ Wèl, Beibel ta mustra ku e Reino di Dios lo logra esaki. Ta p’esei Dios ke pa tur hende siña tantu di e Reino ei komo di Su propósito pa humanidat.—Salmo 37:11, 29; Isaías 9:7.

Dios ke nos bon.

Meskos ku un bon tata ke lo mihó pa su yunan, nos Tata selestial tambe ke pa nos ta felis pa semper. (Isaías 48:17, 18) I el a primintí ku “esun ku ta hasi e boluntat di Dios ta keda pa semper.”—1 Huan 2:17.

Dios ke pa nos kana den su kamindanan.

Beibel ta bisa ku nos Kreador ke ‘siña nos tokante su kamindanan’ pa asina nos por “kana den su bereanan.” (Isaías 2:2, 3) P’esei el a forma “un pueblo pa karga su nòmber” pa por hasi su boluntat konosí rònt mundu.—Echonan 15:14.

Dios ke pa nos ador’é komo un pueblo uní.

En bes di kousa divishon, e adorashon puru di Yehova ta promové union i berdadero amor. (Huan 13:35) Ken awe ta siña hende rònt mundu kon pa sirbi Dios komo un pueblo uní? E foyeto akí lo yuda bo haña sa esei. No keda sin les’é!

Kuantu Testigu di Yehova bo konosé? Algun di nos por ta bo bisiña, kolega di trabou òf kompañero di skol. Òf tal bes nos a yega di kòmbersá ku bo tokante Beibel. Pero ken nos ta realmente, i dikon nos ta papia di nos kreensianan ku otro hende?

Nos ta hende gewon, meskos ku tur hende. Nos ta bini di diferente nashonalidat, kultura i kondishon sosial. Ántes algun di nos tabata den otro religion; otronan no tabata kere mes den Dios. Ma promé ku nos a bira Testigu di Yehova, nos tur a tuma tempu pa analisá e siñansanan di Beibel. (Echonan 17:11) Nos a aseptá loke nos a siña, i despues kada un di nos a tuma e desishon pa sirbi Yehova Dios.

Estudio di Beibel ta yuda nos. Meskos ku tur otro hende, nos tambe tin nos problemanan i nos debilidatnan. Pero segun ku nos ta hasi esfuerso pa apliká prinsipionan di Beibel, nos ta ripará kon esei ta yuda nos hiba un mihó bida. (Salmo 128:1, 2) Esei ta un di e motibunan pakiko nos ta kompartí e bon kosnan ku nos a siña for di Beibel ku otro hende.

Nos ta biba segun e normanan di Dios. Hende ku ta apliká e normanan ku tin den Beibel ta hiba un bida mas felis i ta mustra rèspèt pa otro hende. Nos ta hende onesto i bondadoso, i nos ta siudadano útil pa komunidat. Ademas, e normanan akí ta kontribuí na union den famia, un bida moralmente limpi i mas saludabel. Ku e konvikshon ku “Dios no ta hasi distinshon di persona,” nos ta forma parti di un hermandat internashonal uní, liber di barera polítiko i rasial. Pues, aunke nos ta hende gewon meskos ku tur hende, nos ta un pueblo úniko.—Echonan 4:13; 10:34, 35.

• Den ki sentido Testigunan di Yehova ta meskos ku tur otro hende?

• Ki normanan Testigunan di Yehova a siña den nan estudio di Beibel?

Hopi hende ta kere ku Testigunan di Yehova ta nòmber di un religion nobo. Sinembargo, mas ku 2.700 aña pasá e Dios berdadero a yama su sirbidónan ‘su testigunan.’ (Isaías 43:10-12) Promé ku 1931, nos tabata konosí komo Studiantenan di Beibel. Dikon nos a kuminsá usa e nòmber Testigunan di Yehova?

E nòmber ta identifiká nos Dios. Den e manuskritonan antiguo, e nòmber di Dios, Yehova, ta aparesé mas ku 7.000 biaha den Beibel. Hopi vershon di Beibel a remplasá e nòmber akí ku títulonan, manera Señor òf Dios. Sinembargo, e Dios berdadero a usa su nòmber, Yehova, pa identifiká su mes, ora el a bisa: “Pa e hendenan ku resta, huntu ku hende di tur nashon, esta, hende ku ta karga mi nòmber, por hasi esfuerso pa buska Yehova. Esaki ta loke Yehova ta bisa, kende ta esun ku ta hasi e kosnan akí.” (Echonan 15:17) Dios su nòmber santu ta distinguié for di tur dios falsu, i nos ta orguyoso di por karga su nòmber.

E nòmber ta bisa kiko ta nos mishon. Den pasado, kuminsando for di hustu Abel, un fila largu di hende a duna testimonio di nan fe den Yehova. Atraves di siglonan, hende manera Noe, Abraham, Sara, Moises i David a forma parti di e ‘nubia grandi di testigu’ ei. (Hebreonan 11:4–12:1) Meskos ku un hende por duna testimonio den korte na fabor di un persona inosente, asina tambe nos ta determiná pa laga hende sa e bèrdat tokante nos Dios.

Nos ta imitá Hesus. Beibel ta yama Hesus “e testigu fiel i berdadero.” (Revelashon 3:14) I Hesus mes a bisa ku el a ‘hasi e nòmber di Dios konosí’ i a sigui ‘duna testimonio di e bèrdat’ tokante Dios. (Huan 17:26; 18:37) P’esei, berdadero siguidónan di Kristu mester karga e nòmber di Yehova i hasié konosí na tur hende. Esaki ta loke Testigunan di Yehova ta determiná pa hasi.

• Dikon e Studiantenan di Beibel a kuminsá usa e nòmber Testigunan di Yehova?

• Pa kuantu tempu kaba Yehova tin su testigunan aki riba tera?

• Ken ta e Testigu prinsipal di Yehova?