Awendia hopi hende a stòp di bai sirbishinan religioso pasobra nan no ta haña e guia spiritual òf konsuelo ku nan ta buska. P’esei, kisas bo ta puntra bo mes: ‘Pakiko mi tin ku asistí na e reunionnan di Testigunan di Yehova? Kiko lo mi haña einan?’

E goso di ta entre hende ku ta stima otro i mustra interes den otro. E kristiannan di promé siglo tabata forma parti di diferente kongregashon. Nan tabata bini huntu pa adorá Dios, studia e Skritura i animá otro. (Hebreonan 10:24, 25) E ambiente kaluroso ku tabata reina na e reunionnan a laga e kristiannan sinti ku nan tabata entre berdadero amigu—nan rumannan spiritual. (2 Tesalonisensenan 1:3; 3 Huan 14) Nos reunionnan ta sigui e mesun patronchi, i nos ta sinti e mesun goso.

E bentaha di siña kon pa apliká prinsipionan di Beibel. Manera tabata e kaso den tempu bíbliko, tantu hòmber, muhé komo mucha ta bini huntu. Maestronan kompetente ta usa Beibel pa yuda nos mira kon nos por apliká su prinsipionan den nos bida diario. (Deuteronomio 31:12; Nehemías 8:8) Nos tur por duna komentario den partinan di pregunta i kontesta i tambe kanta kantika di alabansa; asina nos ta ekspresá nos speransa kristian.—Hebreonan 10:23.

E bendishon di mira bo fe den Dios bira mas fuerte. Apòstel Pablo a bisa un di e kongregashonnan di su tempu: “Mi tin masha gana mes di mira boso . . . pa por tin un interkambio di estímulo entre nos; pa nos kada un animá otro pa medio di nos fe, tantu di boso komo di mi.” (Romanonan 1:11, 12) Ora nos ta asistí regularmente na nos reunionnan huntu ku nos rumannan, nos fe i nos determinashon pa biba segun prinsipionan di Beibel ta bira mas fuerte.

En bista di e benefisionan akí, dikon bo no ta asistí na e siguiente reunion di nos kongregashon i komprobá esakinan pa bo mes? Lo bo haña un kaluroso bonbiní. Entrada ta grátis; no ta pasa kolèkt.

• Ki patronchi nos reunionnan ta sigui?

• Ki probecho nos ta saka ora nos ta asistí na e reunionnan?

Nos ta asistí regularmente na nos reunionnan, asta ora nos tin ku sali den mal wer. Dikon nos komo Testigunan di Yehova ta hasi asina tantu esfuerso pa ta huntu ku nos rumannan apesar di kontratempu òf kansansio di un dia largu di trabou?

E ta pa nos bienestar. Ora apòstel Pablo a papia di e personanan ku nos ta asosiá kuné, el a animá nos pa “presta atenshon na otro.” (Hebreonan 10:24) E palabranan ei ta duna e idea di siña konosé otro. Ku e ekspreshon akí Pablo ta stimulá nos pa mustra interes den otro miembronan di e kongregashon. Si nos hasi esei, nos lo realisá ku algun di nan a logra vense e mesun tipo di problemanan ku nos tambe tin, i nan eksperensia por yuda nos.

E ta yuda nos forma amistatnan duradero. Na nos reunionnan, nos ta topa berdadero amigu, no djis un grupo di konosí. Na otro okashon, nos ta rekreá huntu na un manera sano. Kon esaki ta benefisiá nos? E ta yuda nos siña balorá otro mas, i esei ta fortalesé nos lasonan di amistat. Anto, e amistat será akí lo motivá nos pa ta semper kla pa yuda nos rumannan ora nan haña nan ku difikultat. (Proverbionan 17:17) P’esei, ora nos ta asosiá ku tur ruman di nos kongregashon, nos ta mustra ku nos ta “preokupá pa otro.”—1 Korintionan 12:25, 26.

Nos ta animá bo pa bira amigu di hende ku ta hasi e boluntat di Dios. Entre Testigunan di Yehova bo por haña hende asina. No laga nada stroba bo di asosiá ku nos.

• Dikon ta bon pa nos ta huntu ku nos rumannan na e reunionnan?

• Ki dia lo bo ke bini Salòn di Reino pa sera konosí ku nos rumannan?

Ora e kristiannan di promé siglo tabata bini huntu, nan tabata kanta, hasi orashon i tambe lesa i analisá Beibel; no tabatin ningun rito religioso. (1 Korintionan 14:26) Lo bo por ferwagt algu similar na nos reunionnan.

Nos ta risibí instrukshon práktiko basá riba Beibel. Den wikènt, kada kongregashon ta reuní pa skucha un diskurso bíbliko di mei ora ku ta splika kiko Beibel ta bisa di nos tempu i kon e por yuda nos den nos bida. E oradó ta animá nos tur pa lesa e tekstonan huntu kuné den nos Beibel. Despues di e diskurso ta sigui e Estudio di “Toren di Vigilansia” ku ta dura ún ora. Den e ora akí nos ta konsiderá un artíkulo di estudio for di E Toren di Vigilansia i tur hende presente por partisipá. E estudio akí ta yuda nos apliká siñansa di Beibel den nos bida. Kada un di e mas ku 110.000 kongregashonnan ku tin rònt mundu ta studia e mesun informashon.

Nos ta haña yudansa pa bira mas kapas pa siña otro hende. Den siman nos tin un reunion ku ta konsistí di tres parti ku yama Nos Bida i Sirbishi Kristian, basá riba e publikashon mensual Material i Tarea pa Reunion. E promé parti di e reunion akí, Tesoronan di e Palabra di Dios, ta yuda nos familiarisá ku un òf mas kapítulo di Beibel ku nos mester lesa di antemano. Den e siguiente parti di e reunion, Sea Diligente den Sirbishi, nos ta haña demostrashonnan di kon pa papia tokante Beibel ku otro hende. I un konsehero ta duna sugerensia ku ta yuda nos mehorá nos lesamentu i ekspresá nos mes mihó. (1 Timoteo 4:13) Den e último parti, Nos Bida Kristian, nos ta siña kon pa apliká prinsipio di Beibel den nos bida. E parti akí, den forma di pregunta i kontesta, ta yuda nos haña un mihó komprondementu di Beibel.

Ora bo asistí na nos reunionnan, sin duda lo bo keda impreshoná ku e kalidat di siñansa bíbliko ku bo ta haña.—Isaías 54:13.

• Kiko bo por ferwagt di tende na nos reunionnan?

• Kua di nos reunionnan semanal lo bo tin gana di bai?