LÈS 8
Dikon Dios Ta Permití Maldat i Sufrimentu?
1. Kon maldat a kuminsá?
Dios a permití hende goberná sufisiente tempu pa mustra ku nan no por resolvé e problemanan di humanidat
Maldat a kuminsá riba tera na momento ku Satanas a lansa e promé mentira. Na prinsipio, Satanas tabata un angel perfekto, pero “e no a keda firme den e bèrdat.” (Huan 8:44) Na dado momento, el a kuminsá haña e deseo pa hende ador’é, algu ku Dios so tabatin derecho riba dje. Satanas a gaña Eva, e promé muhé, i a konvens’é pa e desobedesé Dios. Meskos ku Eva, Adam tambe a desobedesé Dios, i esei a hiba na sufrimentu i morto pa tur nan desendientenan.—Lesa Génesis 3:1-6, 19.
Ora Satanas a instigá Eva pa desobedesé Dios, el a rebeldiá kontra e soberania di Dios, esta, kontra e derecho ku Dios tin di goberná komo e Haltísimo. Mayoria di hende a tuma parti pa Satanas i a rechasá Dios komo nan Gobernante. Asina Satanas a bira “e gobernante di mundu.”—Lesa Huan 14:30; 1 Huan 5:19.
2. E kreashon di Dios tabata falta algu?
Tur e obranan di Dios ta perfekto. Dios a krea tantu hende komo angel ku e kapasidat di obedes’é na un manera perfekto. (Deuteronomio 32:4, 5) Dios a krea nos ku e libertat di skohe entre bon i malu. E libertat ei ta duna nos oportunidat pa demostrá nos amor pa Dios.—Lesa Santiago 1:13-15; 1 Huan 5:3.
3. Dikon Dios a permití sufrimentu te awe?
Pa un tempu, Yehova a tolerá e rebeldia kontra su derecho di goberná. Dikon? Pa mustra ku kualke esfuerso ku hende hasi pa goberná nan mes sin Dios no ta benefisiá nan. (Eklesiástes 7:29; 8:9) Anto 6.000 aña di historia humano ta konfirmá esei bon kla. Gobièrnunan humano no a logra kaba ku guera, krímen, inhustisia ni malesa.—Lesa Yeremías 10:23; Romanonan 9:17.
Kontrali na gobernashon di hende, e gobernashon di Dios sí ta benefisiá esnan ku asept’é. (Isaías 48:17, 18) Pronto Yehova lo destruí tur gobièrnu di mundu. Ta hende ku skohe Dios komo nan Gobernante so lo keda biba riba tera.—Isaías 11:9.—Lesa Daniel 2:44.
Wak e vidio Dikon Dios Ta Permití Maldat i Sufrimentu?
4. Ki oportunidat e pasenshi di Dios ta duna nos?
Segun Satanas, hende ta sirbi Yehova pa motibunan egoista. Lo bo ke duna prueba ku esei ta un mentira? Bo por! E pasenshi di Dios ta duna kada un di nos oportunidat pa demostrá si nos ta preferá e gobernashon di Dios òf esun di hende. Kon nos por demostrá esei? Na e manera ku nos ta hiba nos bida.—Lesa Yòb 1:8-12; Proverbionan 27:11.
5. Kon nos por skohe Dios komo nos Gobernante?
E desishonnan ku nos tuma ta demostrá si nos ke Dios komo nos Gobernante
Nos por hasi esei ora nos ta buska pa sa kua ta e adorashon ku ta basa su siñansanan riba e Palabra di Dios i biba na armonia ku esaki. (Huan 4:23) Meskos ku Hesus, nos por rechasá Satanas komo gobernante ora nos no ta mete den polítika ni apoyá guera.—Lesa Huan 17:14.
Satanas ta usa su poder pa laga hende hasi kosnan inmoral i perhudisial. Ora nos nenga di hasi e kosnan ei, algun di nos amigu- i famianan por kuminsá hasi bofon di nos òf bai kontra nos. (1 Pedro 4:3, 4) Pues, nos tin ku tuma un desishon. Nos lo djòin e hendenan ku ta stima Dios? Nos lo obedesé Dios su leinan sabí ku ta mustra su amor pa nos? Si nos hasi e kosnan akí, nos ta duna prueba ku ta gaña Satanas a gaña ora el a bisa ku hende lo no obedesé Dios na momento ku nan haña nan ku difikultat.—Lesa 1 Korintionan 6:9, 10; 15:33.
E amor ku Dios tin pa humanidat ta un garantia ku pronto lo e pone fin na maldat i sufrimentu. Hende ku demostrá ku nan ta kere esaki lo disfrutá di bida riba tera pa semper.—Lesa Huan 3:16.