Referensia pa Material i Tarea pa Reunion Nos Bida i Sirbishi Kristian

19-25 DI SÈPTÈMBER

Buska Hoyanan Spiritual

it-1-S 895 §7

Éksodo

Yehova a halsa su nòmber i a libra Israel for di sklabitut pa medio di un manifestashon espektakular di su poder. Unabes e israelitanan tabata sano i salvo na e banda Ost di Laman Kòrá, Moises a dirigí e yunan di Israel pa kanta un kantika, miéntras ku su ruman muhé Miriam, e profetisa, a kue un tamburein i a guia e muhénan ku tamburein pa baila i kontestá e hòmbernan ku un kantika. (Éks 15:1, 20, 21) Israel a keda kompletamente separá di su enemigunan. Despues ku nan a sali for di Egipto, Yehova no a permití nan sufri daño na man di niun hende ni bestia; ni kachó lo no a blaf kontra nan. (Éks 11:7) Aunke e relato di Éksodo mes no ta menshoná ku Fárao a ser destruí den laman huntu ku su ehérsito, Salmo 136:15 sí ta bisa ku Yehova “a derotá Fárao i su ehérsito den Laman Kòrá.”

(Salmo 141:5, NW) Si e hustu gòlpia mi, esei lo ta un muestra di amor leal; i si e reprendé mi, esei lo ta manera zeta riba kabes, ku mi kabes lo no nenga. Pasobra asta durante nan kalamidatnan lo mi sigui hasi orashon.

26 DI SÈPTÈMBER–2 DI ÒKTOBER

Buska Hoyanan Spiritual

w10-S 15/1 21 §1-2

Laga Nos Biba Tur Dia pa e Gloria di Dios

E SALMISTA David a pidi den orashon: “Laga mi tende bo miserikòrdia den mainta, . . . siña mi e kaminda ku mi mester kana.” (Sal. 143:8) Tur mainta ora bo lanta bo ta gradisí Yehova pa un dia mas di bida i kisas bo tambe, meskos ku David, ta pidié pa yuda bo tuma bon desishon i komportá bo mes mas mihó posibel.

Komo sirbidónan dediká di Yehova, “sea ku [nos] ta kome, bebe òf kiko ku [nos] ta hasi,” nos ta hasi esfuerso pa “hasi tur kos pa e gloria di Dios.” (1 Kor. 10:31) Nos sa ku den e manera ku nos ta hiba nos bida di tur dia nos por onra òf desonrá Yehova. Ademas, nos ta kòrda ku, segun Beibel, Satanas ta akusá e rumannan di Kristu i, de echo, tur sirbidó di Dios riba tera di “dia i anochi.” (Rev. 12:10) P’esei, nos ta determiná pa desmentí e kalumnianan di Diabel, alegrá e kurason di Yehova i rindi sirbishi sagrado na dje di “dia i anochi.”—Rev. 7:15; Pro. 27:11.

it-1-S 361 §5

Boka

Dios a diseñá e órgano akí pa risibí kuminda i prepar’é pa mand’é den e stoma; den kaso di hende, e ta sirbi tambe pa papia. P’esei, tur loke nos bisa mester ta pa alabá Dios. (Sl 34:1; 51:15; 71:8; 145:21) E salmista a bisa ku tur loke ta hala rosea tin ku alabá Yehova; p’esei, si un hende ke biba, e mester usa su boka pa hasi esaki. Apòstel Pablo a splika ku fe riba su mes den Dios i su Yu, asta si e fe akí ta di kurason, no ta sufisiente. Nos tin ku hasi deklarashon públiko di nos fe ku nos boka pa haña salbashon.—Sl 150:6; Rom 10:10.

Na armonia ku Dios su propósito i su derecho i poder komo Kreador, e por pone palabra apropiá den boka di su sirbidónan. Den kaso di su profetanan, el a hasi esaki di manera milagroso pa medio di inspirashon. (Éks 4:11, 12, 15; Yer 1:9) Na un okashon, el a pone asta un buriku papia. (Num 22:28, 30; 2Pe 2:15, 16) Den nos tempu, sirbidónan di Dios por tin su palabranan den nan boka, no di manera milagroso, sino pa medio di su Palabra inspirá skirbí ku ta prepará nan kompletamente pa tur bon obra. (2Ti 3:16, 17) Nan no tin ku warda mas pa Kristu bini pa nan por hiba e bon notisia, ni akudí na ningun otro fuente pa siña loke nan tin ku prediká. Nan tiné na nan alkanse, kla pa nan papia, manera e Skritura ta bisa: “E palabra ta serka bo, den bo mes boka i den bo mes kurason.”—Rom 10:6-9; Deu 30:11-14.

E Por Trese Bida òf Morto. Ta hopi importante pa usa nos boka di e manera korekto. Manera Yehova ta bisa den su Palabra: “Boka di e hustu ta un fuente di bida.” (Pro 10:11) P’esei, nos tin ku wak bon kon nos ta usa nos boka. (Sl 141:3; Pro 13:3; 21:23) Si nos no us’é bon, e por ruiná nos. (Pro 10:14; 18:7) Dios ta tene kada hende responsabel pa kada palabra ku nan papia. (Mat 12:36, 37) Un hende por papia sin pensa i hasi un promesa deskabeyá. (Ekl 5:4-6) Nos por labia hende, hasié daño i asina kondená nos mes tambe. (Pro 26:28) Ta importante pa nos pensa bon kiko nos ta bisa spesialmente ora nos ta dilanti di un malbado, pasobra si nos desviá djis un tiki for di loke e sabiduria di Dios ta siña nos pa papia, nos por trese reproche riba e nòmber di Dios i asta kousa nos morto. (Sl 39:1) Hesus a pone un bon ehèmpel di sumishon ora el a kumpli ku Dios su boluntat sin keha òf insultá su opositornan.—Isa 53:7; Ech 8:32; 1Pe 2:23.

Komo ku kristiannan ta imperfekto, nan mester vigilá nan mes kontinuamente i protehá nan kurason. Hesus a bisa ku no ta loke ta drenta hende su boka ta hasié impuru, sino loke ta sali for di hende su boka, pasobra “di loke kurason ta yen di dje, boka ta papia.” (Mat 12:34; 15:11) P’esei, nos mester tene kuidou pa nos no papia sin pensa promé riba e konsekuensianan. Pa logra esei, nos tin ku usa nos mente i apliká loke nos ta siña for di e Palabra di Dios.—Pro 13:3; 21:23.