Usa Beibel pa Kontestá Pregunta

ORA hende hasi pregunta tokante nos kreensianan, nos manera di biba, nos opinion di susesonan aktual i nos speransa pa futuro, nos ta purba usa Beibel pa kontestá nan. Dikon? Pasobra e ta e Palabra di Dios i e base di nos kreensianan i di nos manera di biba. Ta Beibel ta determiná kiko nos ta opiná di susesonan mundial. I nos speransa pa futuro ta firmemente ankrá den e promesanan inspirá di Beibel.—2 Tim. 3:16, 17.

Nos ta bon konsiente di e responsabilidat ku nos nòmber ta trese kuné. Nos ta Testigunan di Yehova. (Isa. 43:12, NW) P’esei nos ta kontestá preguntanan, no a base di filosofia humano, sino a base di loke Yehova ta bisa den su Palabra inspirá. Ounke ta sierto ku individualmente nos tin nos opinion riba vários asuntu, tòg nos ta laga e Palabra di Dios forma nos manera di mira kosnan pasobra nos ta firmemente konvensí ku e ta e bèrdat. Klaru ku Beibel ta duna nos sierto libertat den hopi asuntu di preferensia personal. P’esei, en bes di imponé nos preferensianan riba otro hende, nos kier siña nan e prinsipionan deskribí den e Skritura, ya nan por ehersé e mesun libertat di skohe ku nos tin. Meskos ku apòstel Pablo, nos kier promové ‘obedensia pa medio di fe.’—Rom. 16:26.

Revelashon 3:14 ta deskribí Hesukristu komo “e testigu fiel i berdadero.” Kon el a kontestá preguntanan ku hende a hasié i kon el a trata ku situashonnan ku el a haña su mes aden? Tin biaha el a usa komparashonnan ku a pone hende pensa. Na otro okashonnan e tabata puntra esun ku a bini serka dje ta kon e mes a komprondé e teksto. I hopi bes el a sita tekstonan bíbliko direktamente òf indirektamente. (Mat. 4:3-10; 12:1-8; Luk. 10:25-28; 17:32) Den promé siglo, normalmente nan tabata warda ròlnan di e Skritura den snoa. No tin prueba ku Hesus tabatin un kolekshon personal di e ròlnan aki; pero sí e tabata konosé e Skritura bon i a referí hopi bes na dje ora e tabata siña hende. (Luk. 24:27, 44-47) Ku rason e por a bisa ku loke el a siña hende no tabata di dje mes, sino ku el a papia loke el a tende for di su Tata.—Huan 8:26.

Nos kier sigui e ehèmpel di Hesus. Nos no a tende Dios papia personalmente manera Hesus a tend’é, pero sí nos tin e Beibel ku ta e Palabra di Dios. Ora nos ta us’é pa kontestá pregunta, nos ta evitá di hala atenshon na nos mes. Asina nos ta mustra ku en bes di ekspresá e opinion di un hende imperfekto, nos ta firmemente determiná pa laga Dios ta esun ku ta bisa kiko ta e bèrdat.—Huan 7:18; Rom. 3:4.

Ta klaru ku no ta un asuntu di djis usa Beibel, sino ku nos kier us’é di tal manera ku esun ku skucha nos lo saka máksimo probecho. Nos kier p’e skucha ku un mente habrí. Dependiendo di e aktitut di e persona, lo bo por dirigié na e Skritura dor di bisa: “Bo no ta di akuerdo ku mi ku loke realmente ta konta ta kiko Dios ta bisa di esaki?” Òf lo bo por bisa: “Bo tabata sa ku Beibel ta papia di nèt e punto ei?” Si bo ta papiando ku un persona ku no tin rèspèt pa Beibel, lo bo tin ku usa un otro introdukshon. Lo bo por bisa: “Permití mi lesa un profesia di hopi tempu pasá pa bo.” Òf kisas bo por bisa: “E buki mas plamá den historia humano ta bisa ku . . .”

Tin biaha bo por skohe pa djis bisa un teksto den bo mes palabra. Sin embargo ora ta posibel, ta mihó bo habri Beibel mes i lesa loke e ta bisa. Mustra e persona e teksto bíbliko den su mes Beibel ki ora ku esei ta práktiko. E uso direkto aki di Beibel hopi bes ta kousa un impreshon profundo riba hende.—Heb. 4:12.

Ansianonan kristian tin un responsabilidat spesial pa usa Beibel ora di kontestá pregunta. Un di e rekisitonan pa sirbi komo ansiano ta ku e ruman “ta tene firme na e palabra fiel ku ta segun e siñansa.” (Tito 1:9) Un ruman den kongregashon por tuma un desishon serio den bida despues di haña konseho for di un ansiano. P’esei ta masha importante pa e konseho aki ta firmemente basá riba e Skritura. E ansianonan su ehèmpel den esaki por influensiá e manera di duna siñansa di hopi otro ruman.