Uso Efikas di Pregunta

KOMO ku pregunta ta eksigí un kontesta—sea verbal òf mental—nan ta pone bo oyentenan konsentrá riba loke bo ta bisa nan. Bo por usa pregunta pa kuminsá un kòmbersashon i pa disfrutá di un interkambio stimulante di ideanan. Komo oradó i komo maestro, bo por usa pregunta pa lanta interes, pa yuda un persona rasoná riba un tema òf pa enfatisá loke bo ta bisa. Ora bo ta hasi bon uso di pregunta, bo ta animá otro hende pa reflekshoná en bes di djis sinta skucha. Pone un meta i hasi bo preguntanan di tal manera ku nan ta yuda bo logra bo meta.

Pregunta pa Kuminsá Kòmbersashon. Ora bo ta partisipá den sirbishi di vèlt, probechá di oportunidatnan pa invitá e hendenan pa ekspresá nan mes, si nan ta deseá esei.

Hopi di nos ta kuminsá kòmbersashonnan interesante ku e simpel pregunta: “Bo a yega di puntra bo mes . . . ?” Si e pregunta ta trata un asuntu ku realmente ta preokupá hopi hende, esei ta kasi un garantia ku nos lo disfrutá mashá di nos predikashon. Asta den kaso ku e persona nunka no a pensa riba e pregunta, kisas esei lo por lanta su kuriosidat. Bo por introdusí un gran variedat di tema ku preguntanan manera: “Kiko bo ta pensa . . . ?,” “Kon bo ta haña . . . ?” i “Bo ta kere ku . . . ?”

Ora e evangelisadó Felipe a aserká un ofisial di korte di Etiopia ku tabata lesa e profesia di Isaías na bos haltu, Felipe a djis puntr’é: “Bo ta komprondé loke bo ta lesa?” (Echo. 8:30) E pregunta aki a habri kaminda pa Felipe splika e bèrdatnan tokante Hesukristu. Ku un pregunta similar, algun Testigu djawe a topa hende ku tabata ansioso pa haña un komprondementu kla di un sierto bèrdat bíbliko.

Hopi hende ta mas dispuesto pa skucha bo si promé ku esei bo duna nan chèns pa ekspresá nan opinion. P’esei ora bo hasi un pregunta, skucha e kontesta ku sumo atenshon. Reakshoná riba su komentario di un manera amabel i sin kritik’é. Ora ta posibel, elogi’é di un manera sinsero pa su komentario. Na un okashon un eskriba a “kontestá ku inteligensia,” i Hesus a elogi’é bisando: “Bo no ta leu for di e reino di Dios.” (Mar. 12:34) Asta si bo no ta kompartí e opinion di e persona, bo por gradisié ku el a ekspresá su opinion. Kisas loke el a bisa a revelá un aktitut ku bo tin ku tene na kuenta ora bo ta papia tokante e bèrdat bíbliko kuné.

Pregunta pa Introdusí Ideanan Importante. Ora bo ta papia ku un grupo òf ku un persona, purba usa pregunta pa dirigí atenshon na puntonan importante. Hasi sigur ku bo preguntanan ta trata asuntunan ku realmente ta interesá bo ouditorio. Tambe bo por usa pregunta ku ta lanta kuriosidat pasobra e kontesta no ta bisto mesora. Si bo hasi e pregunta anto kaba pousa brevemente, bo ouditorio probablemente lo skucha loke ta sigui ku mayor interes.

Na un okashon profeta Mikéas a hasi un seri di pregunta. Promé el a puntra kiko Dios ta spera di esnan ku ta ador’é. Kaba el a hasi kuater pregunta mas ku a sugerí posibel kontestanan. Tur e preguntanan ei a prepará e lektor pa e kontesta sabí ku kua el a konkluí su rasonamentu. (Mik. 6:6-8) Pakiko bo no ta purba hasi algu similar ora bo ta siña otro hende?

Pregunta pa Rasoná Riba un Tema. Bo por usa pregunta pa yuda hende komprondé e lógika di un argumentu. Yehova a hasi esaki ora el a dirigí un deklarashon formal serio kontra Israel, manera nos por lesa na Malakías 1:2-10. Na promé lugá el a bisa nan: “Mi a stima boso.” Komo ku nan no a apresiá e amor ei, el a puntra nan: “Esau no tabata Yakòb su ruman?” Anto Yehova a mustra riba e kondishon desolá di Edòm komo un evidensia ku debí na e maldat di e nashon ei, e no a stima nan. Kaba Yehova a usa vários ilustrashon kombiná ku pregunta pa enfatisá ku Israel no a reakshoná manera mester ta riba su amor. Algun di e preguntanan ta ser formulá komo si fuera ta e saserdotenan infiel ta hasi nan, miéntras ku Yehova mes ta hasi nan e otro preguntanan. E diálogo emoshonante ta kapta nos atenshon ku su lógika inegabel i su mensahe inolvidabel.

Algun oradó ta hasi bon uso di pregunta na un manera similar. Ounke nan no ta spera di haña un kontesta verbal, e oyentenan ta respondé nan preguntanan mentalmente, komo si fuera nan ta den un diálogo.

Ora nos ta kondusí un studio di Beibel, nos ta usa un método ku ta eksigí partisipashon di e studiante. Klaru ku e studiante lo benefisiá mas si e kontestá ku su mes palabra i no djis lesa loke tin imprimí. P’esei den un forma bondadoso, hasi preguntanan adishonal pa yuda e studiante rasoná. Ora ta trata ideanan klave, anim’é pa usa Beibel pa duna kontesta. Tambe lo bo por puntr’é: “Ki relashon tin entre loke nos ta papiando aki ku loke nos a kaba di studia? Dikon e ta importante? Ki efekto e mester tin riba nos bida?” Ku e método aki lo bo haña mihó resultado ku si bo ekspresá bo mes konvikshon òf duna splikashonnan detayá, pasobra asin’aki bo ta yuda e studiante usa su “mente” p’e adorá Dios.—Heb. 5:14.

Si un studiante no kapta un sierto idea, tene pasenshi. Podisé e ta komparando loke bo ta bisa ku loke e tabata kere pa hopi aña. Purba trata e asuntu for di un otro ángulo. Sin embargo, tin biaha bo tin ku usa rasonamentu masha básiko. Hasi hopi uso di e Skritura. Usa ilustrashonnan kompañá pa pregunta simpel ku ta invitá e persona pa rasoná riba e evidensia.

Pregunta pa Laga e Persona Ekspresá Loke Realmente E Ta Opiná. Ora hende ta kontestá pregunta, no ta semper nan ta revelá nan berdadero opinion. Kisas nan ta kontestá loke nan ta pensa ku abo kier tende. P’esei nos mester purba saka afó kiko ta kiko. (Pro. 20:5) Bo por imitá Hesus i puntra: “Bo ta kere esaki?”—Huan 11:26.

Ora hopi disipel di Hesus a sinti nan ofendí pa loke el a bisa i a bandon’é, Hesus a invitá su apòstelnan pa ekspresá kiko nan tabata pensa. El a puntra: “Boso tambe kier bai anto?” Pedro a revelá loke nan tur a sinti, bisando: “Señor, serka ken nos lo bai? Abo tin e palabranan di bida eterno. I nos a kere i a haña sa ku abo ta Esun Santu di Dios.” (Huan 6:67-69) Na un otro okashon Hesus a puntra su disipelnan: “Ta ken e hendenan ta bisa ku e Yu di hende ta?” Anto el a hasi un otro pregunta ku a invitá nan pa ekspresá loke tabatin den nan kurason. “Ma ta ken boso ta bisa ku ami ta?” Pedro a kontestá: “Abo ta e Kristu, Yu di e Dios bibu.”—Mat. 16:13-16.

Den un studio bíbliko lo bo por haña bon resultado si bo trata sierto temanan di e mesun manera. Lo bo por puntra: “Kiko bo kompañeronan di skol (òf koleganan di trabou) ta opiná di e asuntu aki?” Kaba bo por puntra: “Kiko abo ta pensa?” Ora ku bo sa realmente kiko e persona ta pensa, lo bo por yud’é mas mihó.

Pregunta pa Pone Énfasis. Por usa pregunta tambe pa enfatisá sierto ideanan. Apòstel Pablo a hasi esaki, manera ta pará skirbí na Romanonan 8:31 i 32: “Si Dios ta pa nos, ken por ta kontra nos? Esun ku no a spar ni su mes Yu, ma a entreg’é pa nos tur, lo e no duna nos tur-tur kos tambe huntu kuné?” Ripará ku den kada kaso e pregunta ta amplia riba e idea ekspresá den e frase promé kuné.

Despues di registrá Yehova su sentensia kontra e rei di Babilonia, profeta Isaías ta agregá ku pleno konvikshon: “I ora SEÑOR soberano tuma un desishon, ken por kibr’é? I ora e hisa man, ken por bah’é?” (Isa. 14:27, BPK) E preguntanan ei ta indiká indirektamente ku niun hende no por hasié. Nan no mester di kontesta.

Pregunta pa Eksponé Ideanan Inkorekto. Preguntanan bon pensá ta masha útil pa eksponé ideanan inkorekto. Promé ku Hesus a kura un hòmber, el a puntra e fariseonan i algun eksperto di e Lei: “Lei ta permití pa kura riba dia di sabat, sí òf nò?” Despues di kura e hòmber, el a sigui ku un otro pregunta: “Kua di boso, si su yu òf su bue kai den pos, lo no sak’é mesora riba dia di sabat?” (Luk. 14:1-6) Niun hende no a kontestá, i Hesus no a spera un kontesta tampoko. E preguntanan a saka na kla e ideanan inkorekto di e hòmbernan ei.

Tin biaha asta kristiannan berdadero por tin ideanan robes. Den promé siglo, algun kristian di Korinto tabata hiba nan rumannan korte pa resolvé problemanan ku, si bo wak bon, nan mester a solushoná entre nan mes. Kon apòstel Pablo a atendé e asuntu? El a hasi un seri di pregunta al kaso pa korigí nan manera di pensa.—1 Kor. 6:1-8.

Ku práktika lo bo siña usa pregunta na un manera efikas. Pero kòrda hasié ku rèspèt, foral si bo ta papia ku hende mas grandi òf ku un persona ku bo no konosé personalmente òf ku hende den puesto di outoridat. Usa pregunta pa presentá e bèrdat bíbliko na un manera atraktivo.