Referensia pa Material i Tarea pa Reunion Nos Bida i Sirbishi Kristian

25 DI FEBRÜARI–3 DI MART

ESORONAN DI E PALABRA DI DIOS | ROMANONAN 9-11

Buska Hoyanan Spiritual

it-1-S 456 §4

Zelo

Zelo inkorekto. Un persona por tin hopi zelo pa un sierto kousa i tòg e por ta robes i por desagradá Dios. Esei tabata e kaso ku hopi hudiu di promé siglo. Nan tabata spera di haña hustisia a base di nan mes obranan ku tabata na armonia ku e Lei di Moises. Pero Pablo a mustra ku nan zelo no tabata agradá Dios pasobra nan tabata falta konosementu eksakto. P’esei, nan no a haña e berdadero hustisia ku ta bini di Dios. Nan mester a rekonosé nan eror i bolbe na Dios pa medio di Kristu pa nan por a haña hustisia i libertat for di kondenashon di Lei. (Rom 10:1-10) Saulo di Tarso tabata un di e personanan ku tabatin zelo ekstremo pa hudaismo, te na e grado ku e tabata persiguí e kongregashon di Dios pa asina kaba kuné. E tabata kumpli ku tur aspekto di Lei. Den e sentido ei, el “a demostrá di ta ireprochabel.” (Gal 1:13, 14; Flp 3:6) Pero e zelo ku Saulo tabatin pa hudaismo tabata inkorekto. Komo ku e tabata un hòmber sinsero, Yehova, pa medio di Kristu, a demostrá bondat inmeresí na dje i a dirigié na adorashon berdadero.—1Ti 1:12, 13.