E Debido Luga Dje Adoracion Di Jehova Den Nos Bida
“Henter e dia lo mi bendicioná bo, i lo mi alabá bo nomber pa tempu indefiní, asta pa semper.”—SALMO 145:2.
“AMI Jehova bo Dios ta un Dios cu ta exigí debocion exclusivo.” (Exodo 20:5) Moises a tende e declaracion ei for di Jehova, i mas despues el a ripiti’é ora el a dirigí su mes n’e nacion di Israel. (Deuteronomio 5:9) No tabatin duda den Moises su mente cu Jehova Dios a spera di Su sirbidornan pa nan ador’E exclusivamente.
2 Ora nan tabata kamper cerca di Ceru di Sínai, e israelitanan i e “inmenso compania mixto” cu a bandoná Egipto cu nan, tabata testigo di algu excepcional. (Exodo 12:38) E no tabatin ningun parecido na e adoracion dje diosnan di Egipto, cuanan a ser humiyá dor dje dies golpinan, of plaganan. Segun cu Jehova a manifestá su presencia na Moises, fenómenonan inspirador di temor a tuma lugá: bos [strena], weerlicht, i e zonidu durísimo di un cachu cu a pone henter e campamentu tembla. Despues a bini candela i huma segun cu henter e ceru a sagudí. (Exodo 19:16-20; Hebreo 12:18-21) Si cualkier israelita tabatin mester di mas prueba cu loke tabata sosodiendo tabata extraordinario, esei a bini pronto. No a tarda muchu cu Moises a baha for dje ceru despues cu el a ricibí un segundo copia dje leynan di Dios. Segun e relato inspirá, “e cueru di [Moises] su cara a emití rayonan i [e pueblo] a haña miedu di acerk’é.” En berdad, un experencia inolvidabel i sobrehumano!—Exodo 34:30.
3 P’e nacion típico ei di Dios, no tabatin duda tocante e lugá cu e adoracion di Jehova a ocupá. E tabata nan Libertador. Nan a debe nan bida mes na dje. Tambe e tabata nan Legislador. Pero nan a tene e adoracion di Jehova na promé lugá? I kico di Dios su sirbidornan di tempu moderno? Ki lugá e adoracion di Jehova ta ocupá den nan bida?—Romano 15:4.
Israel Su Adoracion di Jehova
4 Si bo por a tira un bista di laira dje campamentu di Israel den e desierto, kico lo bo a mira? Un inmenso seri di tent, pero ordená, alohando posiblemente tres miyon persona of mas, agrupá segun divisionnan di tres tribu pa parti nort, sur, oost i west. Mirando mas djacerca, lo bo a nota tambe un otro agrupacion mas cerca dje centro dje campamentu. E cuater gruponan mas chikitu aki di tent a alohá e famianan dje tribu di Levi. N’e centro mes dje campamentu, den un área separá dor di un muraya di paña, tabatin un construccion único. Esaki tabata e “tent di reunion,” of tabernáculo, cua e israelitanan “di curason sabí” a edificá segun e diseño di Jehova.—Número 1:52, 53; 2:3, 10, 17, 18, 25; Exodo 35:10.
5 Na cada un dje rond di 40 sitionan cu Israel a kamper durante nan biahe trabahoso den desierto, nan a lanta e tabernáculo, i el a bira e centro di actividad di nan campamentu. (Número, capítulo 33) Apropiadamente, Bijbel ta describí Jehova como bibando meimei di su pueblo n’e centro mes di nan campamentu. Su gloria a yena e tabernáculo. (Exodo 29:43-46; 40:34; Número 5:3; 11:20; 16:3) E buki Our Living Bible ta comentá: “E santuario portátil aki tabata importantísimo, siendo cu el a crea un centro religioso di reunion p’e tribunan. Asina el a tene nan uní durante e hopi añanan di dualmentu den desierto i a haci accion uní posibel.” Mas cu esei, e tabernáculo a sirbi como un recordatorio constante cu e israelitanan su adoracion di nan Creador tabata central den nan bida.
6 Despues cu e israelitanan a yega den e Tera Primintí, e tabernáculo a sigui ser e centro di Israel su adoracion. (Hosué 18:1; 1 Samuel 1:3) Cu tempu, Rey David a proponé pa edificá un structura permanente. Esaki a resultá di ta e tempel, construí mas despues dor di su yu Sálomon. (2 Samuel 7:1-10) Na su inauguracion un nubia a baha pa indicá Jehova su aprobacion dje edificio ei. “Mi e edificá exitosamente un cas di habitacion elevá exaltá pa bo,” Sálomon a resa, “un lugá establecí pa bo biba aden pa tempu indefiní.” (1 Rey 8:12, 13; 2 Crónica 6:2) E tempel recien construí a bira awor e centro p’e nacion su prácticanan religioso.
7 Tres biaha pa aña, tur israelita masculino a subi pa Jerusalem pa asistí na celebracionnan festivo n’e tempel como reconocimentu dje bendicion di Dios. Apropiadamente, e reunionnan aki a ser designá como “fiestanan periódico di Jehova,” enfocando atencion riba adoracion di Dios. (Levítico 23:2, 4) Muhernan deboto a asistí huntu cu otro miembronan di famia.—1 Samuel 1:3-7; Lucas 2:41-44.
8 E salmistanan inspirá a reconocé elocuentemente con prominente adoracion tabata den nan bida. “Ki bunita bo magnífico tabernáculo ta, O Jehova di ehércitonan!” e yunan di Core a canta. Nan siguramente no tabata alabando un simpel edificio. Mas bien, nan a hisa nan bosnan den alabansa na Jehova Dios, declarando: “Mi propio curason i mi mes carni ta sclama gososamente n’e Dios bibu.” E sirbishi dje levitanan a duna nan gran felicidad. “Felis ta esnan cu ta biba den bo cas!” nan a proclamá. “Ainda nan ta sigui alabá bo.” Realmente, henter Israel por a canta: “Felis ta e hombernan kende nan forsa ta den bo, den kendenan su curason e camindanan trahá ta. . . . Nan lo sigui cana di energia vital pa energia vital; cada un ta presentá na Dios den Sion.” Aunke e biahe di un israelita pa Jerusalem por tabata largu i pisá fatigante, su forsa a ser renobá ora el a yega e capital. Su curason a yena cu goso segun cu el a glorificá su privilegio di adorá Jehova: “Pasobra un dia den bo pationan ta mihó cu mil den otro lugá. Mi a scoge pa para n’e drempel den e cas di mi Dios mas bien cu move rond den e tentnan di maldad. . . . O Jehova di ehércitonan, felis ta e homber cu ta confiando den bo.” Expresionnan asina ta revelá e prioridad cu e israelitanan ei a duna n’e adoracion di Jehova.—Salmo 84:1-12.
9 Lamentablemente, Israel a faya na mantené adoracion berdadero como e cos principal den nan bida. Nan a permití debocion na diosnan falsu debilitá nan celo pa Jehova. Consecuentemente, Jehova a bandoná nan den man di nan enemigunan, permitiendo nan ser hibá den exilio na Babilonia. Ora nan a ser restorá na nan patria despues di 70 aña, Jehova a proveé Israel e spiertamentunan conmovedor dje fiel profetanan Ageo, Zacarías i Malaquías. Sacerdote Esdras i Gobernador Nehemías a stimulá e pueblo di Dios pa reedificá e tempel i pa reinstituí adoracion berdadero ei. Pero segun cu siglonan a pasa, adoracion berdadero a bira atrobe un prioridad abou den e nacion.
Celo den Promé Siglo pa Adoracion Berdadero
10 Na Jehova su tempu señalá, e Mesías a aparecé. Individuonan fiel tabata sperando den Jehova pa salbacion. (Lucas 2:25; 3:15) E relato di Evangelio di Lucas ta describí particularmente Ana di 84 aña di edad como un biuda “kende nunca tabata falta n’e tempel, rindiendo sirbishi sagrado di dia i anochi cu yunamentu i rogamentu.”—Lucas 2:37.
11 “Mi cuminda,” Jesus a bisa, “ta pa mi haci e boluntad di esun cu a mandá mi i terminá su trabou.” (Juan 4:34) Corda con Jesus a reaccioná ora el a confrontá e cambiadónan di placa den e tempel. El a boltu nan mesanan i tambe e bankinan dje comerciantenan cu tabata bende palomba. Marco ta relatá: “[Jesus] no tabata laga ningun hende carga un herment dor dje tempel, pero el a sigui siña i bisa: ‘No ta pará skirbí, “Mi cas lo ser yamá un cas di oracion pa tur nacion”? Pero boso a haci’é un cueba di ladron.’ ” (Marco 11:15-17) Sí, Jesus ni sikiera a permití hende corta caminda dor dje patio dje tempel ora nan tabata carga artículonan pa un otro parti dje stad. Jesus su accionnan a reforsá su conseho duná anteriormente: “Sigui busca, anto, promé e reino i [Dios su] husticia.” (Mateo 6:33) Jesus a laga un ehempel maraviyoso pa nos rindiendo su debocion exclusivo na Jehova. E berdaderamente a practicá loke el a predicá.—1 Pedro 2:21.
12 Tambe Jesus a establecé un patronchi pa su disipelnan sigui den e manera cu el a cumpli cu su comision di libra e hudiunan oprimí, pero fiel, dje carganan di prácticanan religioso falsu. (Lucas 4:18) Den obedencia n’e mandamentu di Jesus pa haci disipel i bautisá nan, e cristiannan di promé cu curashi a proclamá Jehova su boluntad en coneccion cu nan Señor resucitá. Nan a agradá Jehova masha cu e prioridad cu nan a duna na Su adoracion. Pues, Dios su mes angel milagrosamente a libra apostel Pedro i Juan for di detencion i a instruí nan: “Bai boso caminda, i, despues cu boso lanta para den e tempel, sigui papia cu e pueblo tur e dichonan tocante e bida aki.” Cu energia renobá, nan a obedecé. Tur dia, tantu den e tempel di Jerusalem como di cas pa cas “nan a sigui sin stop siñando i declarando e bon nobo tocante Cristo, Jesus.”—Echo 1:8; 4:29, 30; 5:20, 42; Mateo 28:19, 20.
13 Segun cu e oposicion contra nan predicacion a aumentá, Dios a dirigí su fiel sirbidornan pa skirbi conseho oportuno. “Tira tur boso ansiedad riba [Jehova], pasobra e ta interesá den boso,” Pedro a skirbi djis despues di aña 60 E.C. “Mantené boso huicio, sea vigilante. Boso adversario, e Diabel, ta cana rond manera un leon cu ta gruña, buscando un hende pa devorá. Pero tuma boso posicion contra dje, firme den fe, sabiendo cu e mésun cosnan en cuanto sufrimentu ta realisando nan mes den henter e asociacion di boso rumannan den e mundu.” Siguramente e confiansa dje cristiannan di promé a ser fortalecé dor dje palabranan ei. Nan tabata sa cu despues cu nan a sufri pa un poco tempu, Dios lo a terminá nan entrenamentu. (1 Pedro 5:7-10) Durante e dianan final ei dje sistema di cosnan hudiu, cristiannan berdadero a elevá e adoracion amoroso di Jehova na halturanan nobo.—Colosense 1:23.
14 Manera apostel Pablo a pronosticá, apostasia, un alehamentu for di adoracion berdadero, a tuma lugá. (Echo 20:29, 30; 2 Tesalonicense 2:3) Testimonio dje último décadanan di promé siglo a acumulá evidencia di esaki. (1 Juan 2:18, 19) Satanas a sembra exitosamente cristiannan di imitacion meimei di esnan berdadero, haciend’e difícil pa distinguí e “mal yerba” aki for di cristiannan semehante na trigu. No obstante, den transcurso dje siglonan, algun individuo a pone adoracion di Dios na promé lugá, asta riscando nan bida. Pero ta te n’e último décadanan di “e tempu señalá dje nacionnan” Dios a recogé su sirbidornan pa elevá adoracion berdadero.—Mateo 13:24-30, 36-43; Lucas 21:24.
Jehova Su Adoracion Elevá Awe
15 Na 1919, Jehova a autorisá e resto ungí pa efectuá un campaña mundial di duna testimonio cu curashi cu a elevá e adoracion dje Dios berdadero. Cu e drentamentu dje “otro carnénan” simbólico for di 1935 en adelante, e coriente di hende cu ta subi spiritualmente na “e ceru dje cas di Jehova” a crece i sigui crece. Durante e aña di sirbishi di 1993, 4.709.889 Testigo di Jehova a alab’é invitando otronan pa uni den su adoracion elevá. Ki un contraste esaki ta forma cu e condicion spiritualmente degradá dje “ceritunan” sectario dje imperio mundial di religion falsu, notablemente den cristiandad!—Juan 10:16; Isaías 2:2-4; Miquéas 4:1-4.
16 Partidarionan di religion falsu ta mira nan misanan i nan catedralnan i asta nan cleronan como “elevá,” atribuyendo na nan títulonan grandioso i onornan. Pero nota loke Isaías a profetisá: “E wowonan halsá di hende terenal mester ser rebahá, i e halsamentu di hende mester incliná abou; i solamente Jehova mester ser poní na haltu riba e dia ei.” Na ki tempu esaki lo sosodé? Durante e inminente tribulacion grandi ora “e diosnan sin balor mes lo disparcé completamente.” En bista dje inminencia dje tempu inspirador di temor ei, tur sirbidor di Dios mester examiná seriamente ki lugá e adoracion di Jehova tin den nan bida.—Isaías 2:10-22.
17 Como un hermandad internacional, Testigonan di Jehova ta bon conocí pa nan celo den predicacion dje Reino. Nan adoracion no ta djis un religion di muestra, reservá pa mas of ménos un ora pa siman. No, e ta henter nan moda di biba. (Salmo 145:2) En berdad, aña pasá mas cu 620.000 Testigo a organisá nan asuntunan pa participá den e ministerio cristian di tempu completo. E sobránan siguramente no ta neglishá e adoracion di Jehova. E tin un lugá importante ta figurá prominentemente den tantu nan combersacionnan di tur dia como nan predicacion público, asta si nan obligacionnan di famia ta rekerí pa nan traha duru na trabounan seglar.
18 E biografia di Testigonan publicá den E Toren di Vigilancia ta duna un mihó idea dje manera cu vários ruman homber i muher a tene e adoracion di Jehova na promé lugá den nan bida. Un ruman muher hóben, kende a dedicá su bida na Jehova cu seis aña di edad, a fiha e sirbishi di misionero como su meta. Boso, rumannan homber i muher hóben, ki meta boso por scoge cu lo yuda boso tene e adoracion di Jehova como e cos di mas importante den boso bida?—Mira e artículo “Siguiendo Tras di un Meta Fihá cu Seis Aña di Edad,” den E Toren di Vigilancia [na ingles] di 1 di mart, 1992, página 26-30.
19 Un ruman muher biuda di edad ta proveé un otro ehempel excelente den pone e adoracion di Jehova na su debido lugá. El a haña gran animacion pa perseverá for di esnan cu el a yuda siña e berdad. Nan tabata su “famia.” (Marco 3:31-35) Si bo hañá bo den mésun circunstancia, lo bo aceptá e apoyo i yudansa di esnan mas hóben den e congregacion? (Por fabor, nota con ruman Winifred Remmie a expresá su mes den “Mi A Respondé den Tempu di Cosecha,” publicá den E Toren di Vigilancia [na ingles] di 1 di juli, 1992, página 21-3.) Boso, sirbidornan di tempu completo, demostrá cu e adoracion di Jehova realmente ta bini na promé lugá den boso bida dor di sirbi humildemente caminda boso ta asigná, sometiendo boso mes boluntariamente na direccion teocrático. (Por fabor, nota ruman Roy Ryan su ehempel, manera el a ser relatá den e artículo “Pegando n’e Organisacion di Dios,” den E Toren di Vigilancia [na ingles] di 1 di december, 1991, página 24-7.) Corda cu ora nos ta duna prioridad n’e adoracion di Jehova, nos tin e siguransa cu lo e percurá pa nos. Nos no tin nodi di ta ansioso en cuanto di unda e necesidadnan di bida lo bini. E experencianan dje dos ruman muhernan Olive i Sonia Springate ta ilustrá esaki.—Mira e artículo “Nos A Busca Promé e Reino,” den E Toren di Vigilancia di 1 di februari, 1994, página 20-5.
20 Individualmente, anto, nos no tin cu haci nos mes algun pregunta penetrante? Ki lugá e adoracion di Jehova ta ocupá den mi bida? Mi ta bibando conforme cu mi dedicacion pa haci e boluntad di Dios lo mihó cu mi por? Den ki áreanan di bida mi por mehorá? Un consideracion pensativo dje siguiente artículo lo duna nos oportunidad pa reflehá riba con nos ta usa nos recursonan na armonia cu nos prioridad scogí den bida—e adoracion dje Soberano Señor Jehova, nos Tata amoroso.—Eclesiastes 12:13; 2 Corintio 13:5.
[Study Questions]
1. Relacioná cu adoracion, kico Jehova ta rekerí?
2, 3. (a) Kico a convencé e israelitanan cu loke a sosodé cerca dje Ceru di Sínai tabata extraordinario? (b) Ki preguntanan nos lo examiná tocante e adoracion di israelita i di Dios su sirbidornan djawe?
4. Con e campamentu di Israel tabata areglá durante nan estadia temporal den e desierto, i kico tabatin n’e centro dje campamentu?
5. Kico tabata e propósito dje tabernáculo den Israel?
6, 7. Ki structura pa adoracion a reemplasá e tabernáculo, i con el a sirbi e nacion di Israel?
8. Con Salmo 84:1-12 ta duna testimonio dje importancia dje adoracion di Jehova?
9. Kico a sosodé cu e nacion di Israel ora nan a faya na mantené e adoracion di Jehova como e cos principal den nan bida?
10, 11. Cua lugá e adoracion di Jehova tabatin den bida di personanan fiel tempu cu Jesus tabata riba tera?
12. Con e disipelnan di Jesus a demostrá e prioridad cu nan a duna n’e adoracion di Jehova?
13, 14. (a) For di tempu dje cristiannan di promé, kico Satanas a purba haci cu e sirbidornan di Dios? (b) Kico fiel sirbidornan di Dios a sigui haci?
15. Desde 1919, con e profecianan di Isaías 2:2-4 i Miquéas 4:1-4 a ser cumplí?
16. Kico tur sirbidor di Dios mester haci en bista di loke ta ser profetisá na Isaías 2:10-22?
17. Con Jehova su sirbidornan awe ta demostrá e prioridad cu nan ta duna n’e adoracion di Jehova?
18, 19. Cita ehempelnan di animacion cu bo por a haña dor di lesa biografianan di Testigonan.
20. Ki preguntanan pertinente nos mester haci nos mes awor?
[Caption on page 12]
Como Repaso
◻ Relacioná cu adoracion, kico Jehova ta rekerí?
◻ E tabernáculo a sirbi como recordatorio di kico?
◻ Den e promé siglo E.C., ken tabata ehempelnan sobresaliente di celo pa adoracion berdadero, i di ki manera?
◻ Desde 1919, con e adoracion di Jehova a ser elevá?