Referensia pa Material i Tarea pa Reunion Nos Bida i Sirbishi Kristian

10-16 DI YANÜARI

TESORO DI E PALABRA DI DIOS | HUESNAN 17-19

“Nos Ta Haña Nos ku Problema ora Nos Desobedesé Dios Su Lei”

it-2-S 398

Mikaia

1. Un hòmber di Efraim. Mikaia a kibra e di ocho mandamentu di e Dies Mandamentunan (Éks 20:15) ora el a hòrta 1.100 pida plata di su mama. Ora el a konfesá i debolbé e pidanan di plata, su mama a bisa: “Mi ta dediká kompletamente e plata for di mi man na SEÑOR, pa mi yu traha un imágen grabá i un imágen bashá; p’esei, mi ta debolbé bo nan.” Despues, el a hiba e 200 pidanan di plata serka un platé. E platé a traha “un imágen grabá i un imágen bashá” ku despues a resultá den kas di Mikaia. Mikaia, kende tabatin “un kas pa diosnan,” a traha un efot i terafin i a pone un di su yunan fungi komo saserdote p’e. Aunke ta parse ku el a hasi esaki pa duna onor na Yehova, e tabata algu hopi malu pasobra el a kibra e mandamentu ku ta prohibí idolatria. (Éks 20:4-6) Ademas, e no a respetá Yehova su areglo di adorashon, esta, e tabernakel i saserdotenan di Yehova. (Hue 17:1-6; Deu 12:1-14) Despues, Mikaia a laga Jonatan, un desendiente di Moises su yu hòmber Gerson, biba den su kas. El a kontratá e levita hóben akí komo un saserdote p’e. (Hue 18:4, 30) Mikaia a sinti satisfecho ku loke el a hasi, i el a saka e siguiente konklushon robes: “Awor mi sa ku SEÑOR lo prosperá mi.” (Hue 17:7-13) Pero Jonatan no tabata un desendiente di Aron, pues, e no tabata kualifiká pa sirbi komo saserdote. Esei a hasi Mikaia su eror mas grave ainda.—Num 3:10.

it-2-S 399 §1

Mikaia

Un poko despues, Mikaia huntu ku un grupo di hòmber a persiguí e yu hòmbernan di Dan. Ora nan a alkansá e yu hòmbernan di Dan i nan a puntra Mikaia i su hòmbernan kiko a pasa, el a bisa: “Mi diosnan ku mi a traha, i tambe e saserdote, boso a kohe bai kuné. I kiko ami a keda kuné?” E ora ei, e yu hòmbernan di Dan a spièrta Mikaia ku nan lo atak’é si e sigui protestá i sigui nan tras. Ora Mikaia a mira ku e yu hòmbernan di Dan tabata muchu mas fuerte ku su hòmbernan, el a bira bai su kas bèk. (Hue 18:22-26) Despues e yu hòmbernan di Dan a destruí Lais i a konstruí e stat di Dan na e sitio ei. Jonatan i su yu hòmbernan a bira saserdote di e yu hòmbernan di Dan, kende “a lanta pa nan mes e imágen grabá, ku Mikaia a traha, (i esaki a keda einan) tur e tempu ku e kas di Dios [e tabernakel] tabata na Silo.”—Hue 18:27-31.

17-23 DI YANÜARI

TESORO DI E PALABRA DI DIOS | HUESNAN 20-21

“Sigui Buska e Guia di Yehova”

w11-S 15/9 32 §2

Bo Por Imitá Fínehas ora Bo Ta Enfrentá Difikultat?

Despues ku e hòmbernan di Gabaa, di e tribu di Benyamin, a violá i mata un levita su konkubina, e otro tribunan a bai guera kontra e tribu di Benyamin. (Hues. 20:1-11) Nan a hasi orashon i a pidi Yehova yudansa promé ku nan a bai bringa, pero dos bes nan a pèrdè e bataya i hopi hende a muri. (Hues. 20:14-25) Akaso nan lo a konkluí ku nan orashonnan no a yuda? Di bèrdat Yehova kier a mira nan tuma akshon kontra e maldat ku a tuma lugá?

w11-S 15/9 32 §4

Bo Por Imitá Fínehas ora Bo Ta Enfrentá Difikultat?

Ki lès nos por siña for di esaki? Algun problema den kongregashon no ta keda solushoná mesora apesar di e ansianonan su esfuerso sinsero i hopi orashon na Yehova pa yudansa. Si esei sosodé, ta bon pa e ansianonan kòrda Hesus su palabranan: “Sigui pidi [òf, hasi orashon], i boso lo risibí; sigui buska, i boso lo haña; sigui bati na porta, i lo habri pa boso.” (Luk. 11:9) Asta si ta parse ku Yehova ta tarda pa kontestá un orashon, superintendentenan por tin sigur ku Yehova lo kontestá na su debido tempu.

21-27 DI FEBRÜARI

TESORO DI E PALABRA DI DIOS | 1 SAMUEL 6-8

“Ken Ta Bo Rei?”

it-2-S 813 §2

E Reino di Dios

Un Petishon pa un Rei Humano. Kasi 400 aña despues di e Éksodo i mas ku 800 aña despues ku Dios a sera un pakto ku Abraham, e israelitanan a pidi pa un rei humano guia nan. Nan tabata ke un rei humano meskos ku e otro nashonnan. Ku e petishon ei nan a rechasá Yehova su gobernashon riba nan. (1Sa 8:4-8) Ta bèrdat ku e pueblo tabatin motibu pa spera ku Dios lo establesé un Reino manera el a primintí Abraham i Yakòb. Tin vários motibu dikon nan por a kere esei: (1) E profesia ku Yakòb a duna tokante Huda riba su kama di morto. (Gén 49:8-10) (2) Loke Yehova a bisa e israelitanan despues di e Éksodo. (Éks19:3-6) (3) E kondishonnan di e pakto di Lei. (Deu 17:14, 15) (4) Loke tin den un parti di e mensahe ku Dios a laga Balam duna. (Num 24:2-7, 17) Ana, Samuel su mama ku tabata un sirbidó fiel, a ekspresá e speransa ei den su orashon. (1Sa 2:7-10) Sinembargo, Yehova no a revelá su “sekreto sagrado” relashoná ku e Reino i e no a indiká na ki tempu lo e establesé e Reino ei ni kon lo e ta hinká den otro, sea riba tera òf den shelu. Pues, e pueblo no tabatin derecho pa pidi pa un rei humano.