Referensia pa Material i Tarea pa Reunion Nos Bida i Sirbishi Kristian
5-11 DI SÈPTÈMBER
TESORO DI E PALABRA DI DIOS | 1 REINAN 9-10
Hoya Spiritual
w08-S 1/11 22 §4-6
Bo Tabata Sa?
Kuantu oro Rei Sálomon tabatin?
Beibel ta bisa ku Híram, rei di Tiro, a manda kuater tòn di oro pa Sálomon, Reina di Saba a dun’é un kantidat similar, i e barkunan di Sálomon a trese mas ku 15 tòn di oro for di Ófir. E relato ta bisa: “Pa aña, Sálomon tabata risibí mas o ménos 23 tòn di oro.” (1 Reinan 9:14, 28; 10:10, 14) Esei ta posibel? Kon grandi e reservanan di oro di algun rei di antigwedat tabata?
Un inskripshon antiguo, ku eksperto di Beibel ta konsiderá konfiabel, ta bisa ku Fárao Tutmosis III di Egipto (dos milenio promé ku Kristu) a hiba 13,5 tòn di oro na e tèmpel di Amón-Ra na Karnak. Durante siglo ocho promé ku Kristu, Rei Tíglat-Pileser III di Asiria a haña kuater tòn di oro komo tributo for di Tiro, i Sargon II a duna e diosnan di Babilonia e mesun kantidat di oro komo regalo. Aparentemente Rei Filipo II di Masedonia (359-336 P.K.) tabata saka mas ku 28 tòn di oro tur aña for di e minanan na Pangeo na Trasia.
Ora Filipo su yu, Alexander e Grandi (336-323 P.K.) a konkistá e stat perso di Susa, ta parse ku el a bai ku 1.180 tòn di oro for di Susa i kasi 7.000 tòn for di henter Persia. Pues, ora nos mira e kantidat di oro ku e reinan di antigwedat tabatin, ta bisto ku Beibel no a eksagerá e kantidat di oro ku Rei Sálomon tabatin.
26 DI SÈPTÈMBER–2 DI ÒKTOBER
TESORO DI E PALABRA DI DIOS | 1 REINAN 15-16
“Abo Tin Kurashi Meskos ku Asa?”
w12-S 15/8 8 §4
“Boso Esfuersonan Lo Ser Rekompensá”
Apénas 20 aña despues ku Huda i Israel a ser dividí den dos reino, Huda a ser korumpí kompletamente pa práktikanan religioso pagano. Ora Asa a bira rei na 977 promé ku Kristu, asta e palasio di rei a ser kontaminá ku adorashon di e diosnan kananeo di fertilidat. Pero e relato inspirá di Asa su reinado ta bisa ku e “tabata hasi loke tabata korekto i bon den bista di Yehova, su Dios.” Asa “a kita e altarnan di e diosnan di otro nashon i e lugánan sagrado. El a bati e pilánan sagrado kibra, i el a kap e palunan sagrado basha abou.” (2 Kró. 14:2, 3) Ademas, Asa a saka “e hòmbernan ku tabata praktiká prostitushon” for di Huda, pasobra nan tabata tene relashon ku otro hòmber komo parti di nan práktika religioso pagano. Asa no a djis eliminá adorashon falsu. Pero tambe el a urgi e pueblo “pa sirbi Yehova, Dios di nan antepasadonan, i pa kumpli ku tur loke Lei a ordená.”—1 Rei. 15:12, 13; 2 Kró. 14:4.
it-1-S 222
Asa
Aunke ku tin biaha Asa a demostrá falta di sabiduria i disernimentu spiritual, su bon kualidatnan i e echo ku el a keda leu for di apostasia a pone ku Yehova a sigui mir’é komo un sirbidó fiel, i e ta ser konsiderá un di e reinan fiel di Huda. (2Kr 15:17) Durante Asa su reinado di 41 aña, Israel tabatin ocho diferente rei: Yeróboam, Nádab, Basa, Ela, Zimri, Omri, Tibni (kende a oponé Omri i a goberná parti di Israel) i Ákab. (1Re 15:9, 25, 33; 16:8, 15, 16, 21, 23, 29) Ora Asa a muri, su yu hòmber Yehósafat a bira rei.—1Re 15:24.
17-23 DI ÒKTOBER
TESORO DI E PALABRA DI DIOS | 1 REINAN 21-22
“Imitá e Manera Ku Yehova Ta Ehersé Outoridat”
it-2-S 51
Yehova di Ehérsitonan
Ora Hosue a wak vishon di un angel serka di Yériko, i el a puntra e angel si e ta na banda di Israel òf na banda di e enemigu, e angel a kontestá: “Nò, mas bien mi a bin awor komo Kapitan di e ehérsito di [Yehova].” (Hos 5:13-15) Profeta Mikéas a bisa Rei Ákab i Rei Yehósafat, “Mi a mira Yehova sintá riba su trono ku henter e ehérsito di shelu pará banda di dje, na su man drechi i na su man robes,” refiriendo sin duda na Yehova su yu hòmbernan spiritual. (1Re 22:19-21) E ekspreshon “[Yehova] di ehérsitonan” den plural ta apropiá, pasobra e ehérsito di angel no ta ser deskribí solamente den divishon di kerubin, serafin i angel (Isa 6:2, 3; Gén 3:24; Rev 5:11) pero tambe komo grupo organisá. P’esei, Hesus a bisa ku e por a manda yama “mas ku 12 legion di angel.” (Mat 26:53) Ora Ezekías a roga Yehova pa yudansa, el a yam’é “[Yehova] di ehérsitonan, e Dios di Israel, kende ta sintá riba trono ariba di e kerubinnan.” Aparentemente e tabata referí na e arka di pakto i e figuranan di kerubin riba su tapa ku tabata simbolisá Yehova su trono selestial. (Isa 37:16; kompará ku 1Sá 4:4; 2Sá 6:2.) Eliseo su sirbidó ku tabata yen di miedu a haña kurashi ora el a haña un vishon milagroso. Den e vishon ei el a mira e stat kaminda Eliseo tabata biba sitiá i rònt di dje tabatin seru ku “masha hopi kabai di kandela i garoshi di guera di kandela.” Nan tabata parti di Yehova su ehérsito di angel.—2Re 6:15-17.
it-2-S 368 §7
Mentira
Yehova Dios ta permití “un influensia engañoso” obra riba hende ku ta preferá engaño “pa nan kere e mentira” i no e bon notisia tokante Hesukristu. (2Te 2:9-12) E bèrdat tras di e prinsipio akí tabata bisto vários siglo promé den e kaso di e rei israelita Akab. Algun profeta engañoso di e tempu ei a sigurá Akab ku lo e tin éksito den e bataya kontra Ramot-galaad, miéntras ku Yehova su profeta Mikaias a profetisá kalamidat. Manera Yehova a revelá na Mikaias den un vishon, Yehova a permití un angel bira “un spiritu di mentira” den boka di e profetanan di Akab. Ku otro palabra, e angel akí lo a influensiá nan pa nan no papia bèrdat, sino loke nan mes kier a bisa i loke Akab kier a tende. Aunke Akab a haña spièrtamentu, el a preferá di ser engañá, i esei a kost’é su bida.—1Re 22:1-38; 2Kr 18.
31 DI ÒKTOBER–6 DI NOVÈMBER
TESORO DI E PALABRA DI DIOS | 2 REINAN 3-4
Hoya Spiritual
it-2-S 728 §3
Profeta
“E yu hòmbernan di e profetanan.” Manera Gesenius’ Hebrew Grammar ta splika (Oxford, 1952, pág. 418), e palabra hebreo ben (yu hòmber di) òf benehʹ (yu hòmbernan di) por indiká ku un persona ta “miembro di un asosiashon òf sosiedat (òf tribu, òf kualke grupo).” Pues, “e yu hòmbernan di e profetanan” por referí na un skol di instrukshon pa esnan ku a haña e asignashon akí òf simplemente na un asosiashon kooperativo di profeta. Beibel ta bisa ku tabatin e tipo di gruponan ei na Bètel, Yériko i Guilgal. (2Re 2:3, 5; 4:38; kompará ku 1Sá 10:5, 10.) Sámuèl tabata dirigí un di e gruponan ei na Rama (1Sá 19:19, 20), i ta parse ku Eliseo tambe tabata hasi meskos den su tempu. (2Re 4:38; 6:1-3; kompará ku 1Re 18:13.) Beibel ta menshoná ku nan tabata traha nan mes lugá di biba i ku nan tabata usa hèrmènt fiá. Esei por indiká ku nan tabata hiba un bida simpel. Aunke ku tin biaha nan tabata kompartí lugá di biba i kuminda, ta posibel ku nan tabata haña asignashon individual pa bai i profetisá.—1Re 20:35-42; 2Re 4:1, 2, 39; 6:1-7; 9:1, 2.