Referensia pa Material i Tarea pa Reunion Nos Bida i Sirbishi Kristian
3-9 DI YÜLI
TESORO DI E PALABRA DI DIOS | ÈSDRAS 4-6
“No Stroba e Trabou”
w86-S 1/2 29, kuadro §2-3
Wowo di Yehova Tabata Riba “e Ansianonan di e Hudiunan”
Despues ku algun di e hudiunan a bolbe for di Babilonia, a sigui un periodo di 16 aña di inaktividat. E profetanan Ageo i Zakarías a logra kita e hudiunan su apatia, i e trabou di rekonstruí e tèmpel di Yehova a sigui. Pero poko despues, algun funshonario di Persia a oponé e trabou. E opositornan a puntra: “Ken a duna boso òrdu pa konstruí e kas akí.”—Èsdras 5:1-3.
E kontesta pa e pregunta ei tabata importante. Si e ansianonan lo a laga nan mes ser intimidá, e rekonstrukshon di e tèmpel lo a para inmediatamente. Si e ansianonan a provoká e funshonarionan akí, nan lo por a prohibí e trabou mesora. Pues, e ansianonan (ku sin duda a ser dirigí pa Gobernador Zorobabel i Sumo Saserdote Yeshua) a formulá un kontesta ku tabata efektivo pero na mes momento nan a demostrá takto. Nan a rekordá e funshonarionan di un dekreto ku nan a lubidá riba dje pa hopi tempu. Esta, e dekreto di Siro ku a duna e hudiunan pèrmit pa sigui ku e trabou di rekonstrukshon. Komo ku e funshonarionan aki tabata sa ku e personan nunka tabata revoká un lei establesí, nan a aktua sabí i a disidí pa no oponé e dekreto di Rei. Pues, e trabou por a sigui te ora ku Rei Darío a duna su aprobashon ofisial!—Èsdras 5:11-17; 6:6-12.
Hoya Spiritual
w93-S 15/6 32 §3-5
Bo Por Konfia Loke Beibel Ta Bisa?
E moneda a ser trahá na Tarso, un siudat situá den e parti zùitwèst di loke awor nos konosé komo Turkia. E moneda a ser produsí durante e reinado di e gobernador perso Mazaeus den siglo kuater promé ku Kristu. E inskripshon ta identifik’é komo gobernador di e teritorio “wèst di riu Eufrátes.”
Pero, dikon e frase aki ta interesante? Pasobra lo bo haña e mesun título den bo Beibel. Èsdras 5:6–6:13 ta papia di un korespondensia entre e rei perso Darío i un gobernador ku yama Tatnai. E korespondensia tabatin di haber ku e konstrukshon di e tèmpel hudiu na Herúsalèm. Èsdras tabata un kopiadó di Dios su Lei ku tabata ábil den su trabou, pues ta di spera ku loke el a skirbi ta eksakto. Lo bo mira na Èsdras 5:6 i 6:13 ku el a yama Tatnai “gobernador di teritorio wèst di riu Eufrátes.”
Èsdras a skirbi su relato rònt di aña 460 promé ku Kristu, mas o ménos 100 aña promé ku nan a inskribí e moneda. Algun hende lo pensa ku e título ku Èsdras a duna un gobernador di antigwedat ta un detaye insignifikante. Pero si bo por konfia e eskritornan di Beibel asta den detaye chikitu asina, esei no ta duna bo mas konfiansa den tur loke nan a skirbi?
10-16 DI YÜLI
TESORO DI E PALABRA DI DIOS | ÈSDRAS 7-8
“Èsdras Su Kondukta A Duna Onor na Yehova”
si-S 75 §5
Buki di Beibel di Numbernan 13—1 Krónikanan
5 Ningun hende no tabata mas kualifiká ku Èsdras pa hinka e historia outéntiko i eksakto akí den otro. Pasobra “Èsdras a prepará su kurason pa studia Lei di Yehova, pa aplik’é i pa siña e pueblo di Israel e leinan i e dekretonan ku Lei tabata kontené.” (Èsdras 7:10) Yehova a yuda Èsdras ku su spiritu santu. E gobernante mundial di Persia por a mira Dios su sabiduria den Èsdras, i el a duna Èsdras poder pa atendé ku asuntu sivil den e distrito di Huda. (Èsdras 7:12-26) Pues, ku outoridat di Dios i di Rei, Èsdras por a hinka su relato den otro usando e mihó dokumentonan ku tabata disponibel.
it-1-S 1186 §4
Humildat
Ta Duna Guia Adekuá. Un hende ku ta humiá su mes dilanti di Dios por konta ku Dios su guia. Èsdras tabatin un responsabilidat grandi pa organisá e biahe di regreso di Babilonia pa Herúsalèm pa mas ku 1.500 hòmber, sin konta e saserdotenan, e sirbidónan di tèmpel i e hende muhénan i muchanan. Ademas, nan tabatin un gran kantidat di oro i plata huntu ku nan pa hasi e tèmpel di Yehova bunita. Nan tabatin mester di protekshon durante di e biahe, pero Èsdras no kier a puntra e rei di Persia pa laga un grupo militar bai huntu ku nan pa no parse ku nan tabata dependé riba poder di hende. Pasobra mas promé, el a bisa e rei: “Dios ta ku tur hende ku ta busk’é.” P’esei, el a laga e pueblo yuna, pa asina nan por a humiá nan mes dilanti di Yehova. Nan a pidi Dios pa yudansa, i el a skucha nan i protehá nan di enemigu ku por a ataká nan na kaminda. P’esei, nan biahe tabata eksitoso. (Èsd 8:1-14, 21-32) Dios a bendishoná profeta Daniel ora el a manda un angel serka dje ku un vishon miéntras e tabata den eksilio na Babilonia. Dios a hasi esaki pasobra Daniel a humiá su mes dilanti di dje ora e tabata buska guia i komprondementu.—Dan 10:12.
28 DI OUGÙSTÙS–3 DI SÈPTÈMBER
TESORO DI E PALABRA DI DIOS | NEHEMÍAS 12-13
“Demostrá Lealtat na Yehova ora di Skohe Amigu”
it-1-S 117 §8
Amonita
Despues ku a saka Tobías for di e tereno di e tèmpel, Dios su lei na Deuteronomio 23:3-6 a ser lesá i apliká. E lei ei a prohibí amonita i moabita pa forma parti di e pueblo di Dios. (Neh 13:1-3) A establesé e restrikshon akí mas o ménos 1.000 aña mas promé ora e amonitanan i moabitanan a nenga di yuda e israelitanan ora ku nan tabata yegando e tera primintí. Ta parse ku e restrikshon ei tabata ke men ku ningun amonita ni moabita no por a legalmente forma parti di e nashon di Israel i risibí tur derecho i privilegio ku un israelita tabata risibí. E no tabata ke men ku e amonitanan i moabitanan no por a asosiá ku e israelitanan òf ku nan no por a biba meimei di nan i benefisiá di e bendishonnan ku Dios tabata drama riba su pueblo. Tuma por ehèmpel Zélek, un di David su guereronan balente, i e moabita Rut.—Rut 1:4, 16-18.
Hoya Spiritual
it-2-S 444 §2
Músika
Kantamentu ku tabata tuma lugá na e tèmpel tabata di gran importansia. Esaki ta bisto na tur e biahanan ku Beibel ta papia di e kantantenan i tambe e echo ku nan “no mester a hasi otro trabou” ku a ser asigná na otro levita, ya asina nan por a dediká nan mes kompletamente na nan sirbishi di kantamentu. (1Kró 9:33) Despues ku nan a bolbe for di Babilonia “e kantantenan” a keda fungi komo un grupo spesial di levita. (Èsd 2:40, 41) Asta e rei perso Artahérhes (Longimano) a faboresé nan ora ku el a inkluí nan den un grupo spesial di hende ku no mester a paga “niun klase di belasting.” (Èsd 7:24) Mas despues, e rei a duna òrdu pa establesé “un areglo fiho pa kubri e nesesidatnan diario di e kantantenan.” Aunke ta Artahérhes ta esun ku ta risibí krédito pa e òrdu aki, probablemente, ta Èsdras ta esun ku a duna e òrdu akí ku outoridat ku Artahérhes a dun’é. (Neh 11:23; Èsd7:18-26) Pues, esei ta yuda nos komprondé ku aunke tur e kantantenan tabata levita, Beibel ta referí na nan komo un grupo spesial: “e kantantenan i e levitanan.”—Neh 7:1; 13:10.