Testigunan di Yehova na Nueva Zelandia—Un Menasa pa Públiko?

Dia 21 di òktober 1940, Nueva Zelandia a deklará ku Testigunan di Yehova ta un peliger pa e pais i un menasa pa públiko. Apesar di e difikultatnan ku e deklarashon ei di gobièrnu a kousa, e Testigunan di Yehova no a spanta. Por ehèmpel, nan a sigui tene nan reunionnan apesar di kore e riesgo di ser ataká i arestá.

Un ruman ku yama Mary ta kasá ku Andy Clarke, kende no ta un Testigu di Yehova. E hòmber ei a mira kon determiná su esposa tabata pa sigui asistí na e reunionnan apesar di e menasa ku tabatin. Andy tabatin miedu ku su kasá lo a ser arestá ora ku e bai reunion. P’esei, Andy a disidí di hasi algu ku normalmente lo e no a hasi. El a kuminsá kompañá Mary ora e tabata bai su reunionnan. El a bisa Mary: “Si nan arestá bo, nan lo tin ku arestá mi tambe.” Djei padilanti, el a kompañá Mary bai tur reunion. Ku tempu, e tambe a batisá komo Testigu di Yehova. Mary su determinashon pa keda fiel durante persekushon ta solamente un di e hopi ehèmpelnan na Nueva Zelandia durante Segundo Guera Mundial.

Spiritualmente Fuerte Durante Enkarselashon

Un dia, polis a arestá John Murray di 78 aña ora e tabata prediká di kas pa kas i papia tokante Beibel. Korte a akus’é di ta partisipá den aktividat di un organisashon rebelde. Desénas di Testigu mas mester a aparesé den korte. Algun di nan a haña but i algun di nan a ser enkarselá pa un máksimo di tres luna.

E Testigunan di Yehova a nenga di partisipá den aktividat militar debí na nan konsenshi bíblikamente entrená. (Isaías 2:4) Vários ruman a haña nan ku prueba severo den tempu di guera ora nan a ser yamá pa servisio militar. Un kantidat di 80 Testigu di Yehova a ser mandá na e kamponan di konsentrashon pasobra nan no kier a partisipá den guera. Nan a sigui adorá Yehova ku goso apesar di e maltrato severo i e frialdat ekstremo di wenter.

E Testigunan ku tabata den prizòn a kuminsá organisá nan aktividatnan spiritual mesora. Nan a forma un kongregashon chikitu i a tene e reunionnan ku regularidat. Nan a hasi areglo tambe pa prediká na e otro prizoneronan. Den algun di e kamponan ei, e Testigunan a asta haña pèrmit pa organisá asamblea di sirkuito bou di supervishon di un bewaker. Algun di e prezunan a siña konosé e bèrdat tokante Beibel den e kamponan ei i nan a batisá einan.

Bruce, e yu mas chikí di Mary i Andy, menshoná anteriormente, a mira e tempu den e kampo di konsentrashon komo un oportunidat pa krese den sentido spiritual. Bruce ta konta: “Ta komo si fuera mi tabata bai skol, pasobra mi por a tene hopi kòmbersashon profundo ku e rumannan mas eksperensiá den e kampo i mi por a siña hopi for di nan.”

Na 1944, e gobièrnu a opta pa laga algun Testigu ku tabata den kampo di konsentrashon sali liber. Pero e outoridatnan militar a protestá kontra esei. Nan tabata konvensí ku si nan duna e Testigunan libertat, nan lo a sigui papia ku otro hende tokante nan kreensianan. Den un rapòrt nan a skirbi: “Ora enkarselá nan, bo tin un tiki kontrol riba nan aktividatnan fanátiko, pero kambia bo no por kambia e hendenan ei nunka.”

Nan No Ta un Menasa pa Públiko

Debí na tur e publisidat tokante prohibishon di e Testigunan, algun hende a bira kurioso pa sa ken Testigunan di Yehova ta. Ku tempu, vários di nan a realisá ku e Testigunan di Yehova no ta forma ningun menasa pa públiko. Nan a ripará ku Testigunan di Yehova ta hende trankil ku ta stima pas. E resultado ta ku e kantidat di Testigu di Yehova na Nueva Zelandia a oumentá for di un kantidat di 320 pa 536 durante 1939 pa 1945!

Algun funshonario a rekonosé sinseramente ku e prohibishon kontra e Testigunan di Yehova no tabatin base. Despues ku un hues a skucha e akusashonnan kontra un ruman hòmber ku tabata prediká, e hues a nenga di trata e kaso ei. E hues a bisa: “Si tin ku konsiderá partimentu di Beibel komo un echo kondenabel, esei ta bai kompletamente kontra mi komprondementu i kontra di mi interpretashon di lei.”

Ora ku finalmente nan a kita e prohibishon na fin di e guera, e Testigunan tabata mas determiná ku nunka pa papia ku hende tokante e Reino di Dios. Na 1945, e sukursal na Nueva Zelandia a manda un karta pa tur kongregashon. Den e karta nan a skirbi: “Laga kada un di nos usa takto i mustra amor i rèspèt na tur hende. Evitá diskushon fuerte. Tene na mente ku hende ku nos topa ta kere fielmente den loke nan ta siña den nan religion i ta hasi esfuerso pa biba di akuerdo ku esei. . . . Un gran kantidat di nan ta ‘karne’ di Señor ku nos tin ku guia na Yehova i na e Reino.”

Den nos tempu, e Testigunan di Nueva Zelandia ta sigui kompartí e mensahe di Beibel ku e habitantenan i e turistanan. Un dia, un grupo di 4 Testigu na Turangi a papia ku 67 turista for di 17 diferente pais den apénas un par di ora!

Pues, no tin duda, e habitantenan di Nueva Zelandia ta konsiderá e Testigunan komo hende pasífiko ku no ta forma un peliger. Nan ta berdadero kristian ku ta respetá Beibel masha hopi mes. Tur aña sentenáres di hende ta bira Testigu di Yehova. Na 2019, tabatin mas ku 14.000 Testigu ku tabata sirbi Yehova ku goso na Nueva Zelandia.