Un famia ta wak un bario ku a keda destruí pa desaster natural

Kiko Beibel Ta Bisa Tokante Desaster Natural?

Loke Beibel ta bisa

No ta Dios ta kousa desaster natural ku ta tuma lugá awendia. Mas bien, e ta preokupá pa hende ku a bira víktima di desaster natural. E Reino di Dios lo eliminá sufrimentu ku desaster natural ta kousa. Mientrastantu, Dios ta konsolá hende ku ta sufri debí na e efektonan di desaster natural.—2 Korintionan 1:3.

Dikon nos por tin sigur ku desaster natural no ta kastigu di Dios?

Segun Beibel, desaster natural ta diferente for di e forsanan di naturalesa ku Dios ta usa.

Desaster natural ta afektá tur hende. Di otro banda, Beibel ta mustra ku Dios a husga solamente hende malbado. Por ehèmpel, ora Dios a destruí e statnan antiguo Sódoma i Gomora, el a salba e hòmber hustu Lòt i su dos yu muhénan. (Génesis 19:29, 30) Dios a lesa kurason di hende ku a biba den e tempu ei i a kaba ku solamente mal hende.—Génesis 18:23-32; 1 Samuel 16:7.
Desaster natural sa bini diripiente i tin biaha sin previo aviso. Di otro banda, Dios a spièrta mal hende promé ku el a usa forsa di naturalesa kontra nan. E hendenan ku a hasi kaso di e spièrtamentu tabatin oportunidat pa skapa kalamidat.—Génesis 7:1-5; Mateo 24:38, 39.
Di un òf otro manera, hende a kontribuí na desaster natural. Kon? Hende a hasi daño na medio ambiente i a konstruí den área kaminda sa tin temblor, inundashon i klima severo. (Revelashon 11:18) Dios no ta kulpabel pa e desishonnan ku hende ta tuma.—Proverbionan 19:3.

Desaster natural ta proba ku nos ta biba den e último dianan?

Sí, Beibel ta profetisá ku lo tin desaster natural durante “konklushon di e era akí,” esta “den e último dianan.” (Mateo 24:3; 2 Timoteo 3:1) Por ehèmpel, ora Hesus a referí na nos tempu, el a bisa: “Lo tin skarsedat di kuminda i temblor den un lugá tras di otro.” (Mateo 24:7) Pronto, Dios lo eliminá tur kos ku ta kousa doló i sufrimentu for di riba tera, inkluso desaster natural.—Revelashon 21:3, 4.

Den ki manera Dios ta yuda víktima di desaster natural?

Dios ta konsolá víktima mediante su Palabra, Beibel. Beibel ta sigurá nos ku Dios ta interesá den nos i ku e ta sinti nos doló ora nos ta sufri. (Isaías 63:9; 1 Pedro 5:6, 7) Ademas, Beibel ta primintí ku den futuro lo no tin desaster natural mas.—Wak “Teksto di Beibel ku por konsolá víktima di desaster natural.”
Dios ta yuda víktima mediante su sirbidónan. Dios ta usa su sirbidónan riba tera pa imitá e ehèmpel di Hesus. E profesianan ta bisa ku Hesus lo konsolá “hende di kurason kibrá” i “tur esnan ku ta yora.” (Isaías 61:1, 2) E sirbidónan di Dios ta hasi esfuerso pa hasi meskos.—Huan 13:15.

Dios ta usa su sirbidónan tambe pa duna yudansa práktiko na víktima di desaster natural.—Echonan 11:28-30; Galationan 6:10.

Testigunan di Yehova ta drecha un kas na Puerto Rico — Testigunan di Yehova ta duna yudansa práktiko na víktima di orkan na Puerto Rico

Beibel por yuda nos prepará pa desaster natural?

Sí. Aunke Beibel no ta un manual pa prepará nos pa desaster natural, e ta kontené prinsipio ku por yuda nos. Por ehèmpel:

Plania di antemano pa posibel kalamidat. Beibel ta bisa: “Un hende prudente ta mira maldat i ta skonde.” (Proverbionan 22:3) Ta sabí pa nos prepará un plan di siguridat adelantá. E plan ei por inkluí prepará un pakete di emergensia den kaso di kalamidat i repasá ku famia unda ta bai topa den kaso di desaster.
Kòrda ku bida ta mas importante ku kos material. Beibel ta bisa: “Nos no a bini ku nada na mundu, i nos no por bai ku nada tampoko.” (1 Timoteo 6:7, 8) Nos mester ta dispuesto pa laga nos kas i pertenensianan atras pa por skapa di un kalamidat. Kòrda ku nos bida ta mas importante ku kualke kos material.—Mateo 6:25.

Teksto di Beibel ku ta konsolá víktima di desaster natural

Génesis 18:25: “Ku esei keda leu di bo pa hasi un kos asina, esta, mata e hustu huntu ku e malbado . . . E Hues di henter mundu lo no hasi hustisia?”

Loke esaki ta enserá: Dios semper ta hasi loke ta bon; no ta Dios su falta ora bon hende ta muri debí na desaster natural.

Salmo 46:1, 2: “Dios ta nos refugio i fortalesa, un pronto ousilio den tempu di angustia. P’esei nos lo no tin miedu, maske tera kita for di su lugá.”

Loke esaki ta enserá: Sin importá kiko ta pasa rònt di nos, nos por konfia ku Dios lo yuda nos keda fuerte.

Isaías 63:9: “Den tur nan aflikshon e tabata afligí.”

Loke esaki ta enserá: Dios tin empatia; e ta sinti pa nos ora nos ta sufri.

Huan 5:28, 29: “Lo yega e ora ku tur esnan ku ta den graf lo tende [Hesus] su stèm i lo sali afó.”

Loke esaki ta enserá: Nos tin e speransa di bolbe mira nos sernan stimá ku a muri pasobra Dios lo duna Hesus poder pa resusitá nan.

1 Pedro 5:6, 7: “Humiá boso mes anto bou di e man poderoso di Dios . . . miéntras ku boso ta tira tur boso inkietut riba dje, pasobra e ta interesá den boso.”

Loke esaki ta enserá: Dios ta interesá den nos i ke pa nos resa na dje i bis’é loke ta preokupá nos.

Revelashon 21:4: “Lo e seka tur lágrima for di nan wowo, i lo no tin morto mas; ni tristesa ni sklamashon ni doló lo no tin mas. E kosnan ku tabata pasa ántes no t’ei mas.”

Loke esaki ta enserá: Dios lo kaba ku tur kos ku ta kousa sufrimentu, inkluso desaster natural.