Nos Tera Maltratá

NA AÑA 1805, e famoso eksploradónan Meriwether Lewis i William Clark a alkansá Riu Columbia den loke awe ta e estado di Washington, Merka.a Loke a kapta nan atenshon mas ku e riu mes tabata e gran abundansia di salmou ku tabatin den dje. Nan a skirbi den nan dagboek: “Kasi bo no por imaginá bo kuantu dje piskánan aki tin.” “Koriente di awa ta hiba nan i nan ta yega kantu na granèl. E úniko kos ku e indjannan tin ku hasi ta kohe nan, habri nan i laga nan seka riba stèngel trahá di palu.” En bèrdat, tabatin asina tantu salmou ku e indjannan tabata seka nan i usa nan komo karbon!

E situashon djawe ta bastante distinto. Segun un informe di Newsweek: “Pa mas ku un dékada kaba sientífikonan sa ku hende ta sakando piská for di laman promé ku e piskánan haña chèns di reprodusí.” Por ehèmpel, segun kálkulonan, 90 porshento di e poblashon di salmou den nort di Oséano Atlántiko a disparsé kaba.

Pero no ta piská so ta kabando. Hende ta gastando e rekursonan natural manera kombustibel fosil, mineral i produktonan di selva na un ritmo alarmante. E Fondo Mundial pa Naturalesa ta informá ku entre 1970 pa 1995 tera a pèrdè 30 porshento di su rekursonan natural. Hopi bes e sakamentu di e rekursonan di tera ta manera un kuchú di dos banda, pasobra e métodonan ku nan ta usa por destruí e lugá di biba di hopi tipo di mata i bestia.

Tin hende ta rasoná ku ya ku ta hende a krea e problemanan aki, nan lo mester por resolvé nan tambe. Pa sita un ehèmpel, den añanan resien polushon di aire a mengua den hopi stat industrialisá. E rayonan di speransa ei ta nifiká ku hende tin kontròl riba e situashon?

[Nota]

[Rekonosementu pa Potrèt na página 3]

© Kevin Schafer/CORBIS