Parti 3
Con Nos Por Sa Cu Tin un Dios
1, 2. Cua principio ta yuda nos determiná si tin un Dios of no?
UN MANERA pa determiná si tin un Dios of no ta dor di aplicá e principio bon establecí aki: Loke a ser trahá ta rekerí un trahador. Mas complicá e cos trahá ta, mas capas e trahador mester ta.
2 Por ehempel, wak rond den bo cas. Mesa, stul, lesenar, cama, wea, panchi, tayó i otro utensiyonan pa come tur ta rekerí un trahador, mescos tambe, muraya, flur i plafon. Sin embargo, e cosnan ei ta comparativamente fácil pa traha. Ya cu cosnan simpel ta rekerí un trahador, no ta lógico cu cosnan compleho ta rekerí un trahador asta mas inteligente?
Nos Universo Inspirador di Temor
3, 4. Con e universo ta yuda nos pa sa cu Dios ta existí?
3 Un oloshi ta rekerí un trahador di oloshi. Ki tal di nos sistema solar infinitamente mas compleho, cu e solo i su planetanan birando rond di dje cu un precision di fraccion di seconde siglo tras siglo? Ki tal dje galaxia inspirador di temor den cua nos ta biba, yamá e Via Láctea [Melk Weg], cu su mas di 100 biyon strea? Bo a yega di para anochi pa contemplá e Via Láctea? Bo tabata impresioná? Anto pensa riba e increiblemente enorme universo cu ta contené biyones di galaxianan incontabel manera nos Via Láctea! Tambe, e cuerponan celestial ta asina confiabel den nan movementunan siglo tras siglo, cu nan a ser compará cu oloshinan di precision.
4 Si un oloshi, cu ta relativamente fácil, ta implicá existencia di un trahador di oloshi, siguramente e universo infinitamente mas compleho i inspirador di temor ta implicá existencia di un diseñador i trahador. Ta p’esei e Bijbel ta invitá nos pa ‘hisa nos wowo na laira i wak,’ i despues e ta puntra: “Ken a crea e cosnan aki?” E contesta: “Ta Esun [Dios] kende ta producí e ehército di nan asta na number, tur di nan e ta yama asta na nomber. Debí na e abundancia di energia dinámico, e tambe siendo vigoroso den poder, ni un di nan e ta falta.” (Isaías 40:26) Pues, e universo ta debe su existencia na un poder invisibel, cu ta controlá i ta inteligente—Dios.
Tera Diseñá na Manera Unico
5-7. Cua echonan tocante e tera ta mustra cu e tabatin un Diseñador?
5 Mas científiconan studia e tera, mas nan ta realisá cu e ta diseñá na manera único pa habitacion humano. E ta net n’e distancia corecto for di solo pa haña e cantidad apropiado di lus i calor. Un bes pa aña e ta drei rond dje solo, cu net e ángulo corecto di inclinacion, haciendo temporadanan posibel den hopi parti dje tera. E tera tambe ta drei rond di su mes as cada 24 ora, percurando periodonan regular di lus i scuridad. E tin un atmósfera cu net e mescla corecto di gasnan asina cu nos por hala rosea i ser protegá di radiacion perhudicial for di espacio. Tambe e tin e awa i suela vital cu ta necesario pa cuminda crece.
6 Sin tur e factornan ei, i otronan, trahando huntu, bida lo tabata imposibel. Tur esei tabata un accidente? Science News ta bisa: “Ta parce como si fuera tal condicionnan particular i precis difícilmente por a presentá pa casualidad.” Nó, nan no por a presentá asina. Nan a enbolbé diseño cu propósito dor di un Diseñador magnífico.
7 Si bo a drenta den un cas excelente i a haña cu e tabata generosamente surtí cu cuminda, cu e tabatin un sistema excelente di calefaccion i di airecondicioná, i cu e tabatin bon instalacion di tuberia pa suministrá awa, kico lo bo a concluí? Cu tur esei a bin di su so? Nó, siguramente lo bo a concluí cu un persona inteligente a diseñ’é i a trah’é cu sumo interes. E tera tambe tabata diseñá i trahá cu sumo interes afin di percurá loke su habitantenan tin mester di dje i e ta hopi mas compleho i bon suministrá cu cualkier cas.
8. Kico mas tin encuanto e tera cu ta mustra Dios su interes amoroso pa nos?
8 Tambe, considerá e gran cantidad di cosnan cu ta agregá goso na bida. Mira e enorme variedad di flornan cu colornan bunita cu nan aroma agradabel cu hende ta disfrutá di dje. Anto tin un gran variedad di cuminda asina delicioso pa nos gusto. Tin mondi, ceru, lago i otro creacionnan cu ta agradabel pa mira. Ki tal tambe di bunita bahamentu di solo cu ta aumentá nos disfrutamentu di bida? I den e region di bestia, nos no ta keda encantá cu e travesuranan i naturalesa cariñoso di yu di cachó, yu di pushi i otro yunan di bestia? Pues e tera ta percurá hopi sorpresanan encantador cu no ta absolutamente necesario pa sostené bida. Esakinan ta mustra cu e tera tabata diseñá cu interes amoroso, cu hende na mente, asina cu nos lo no a simplemente existí sino lo a disfrutá di bida.
9. Ken a traha e tera i pakico el a trah’é?
9 P’esei, e conclusion razonabel ta pa reconocé e Dunador di tur e cosnan aki, mescos cu e escritor bíblico a haci cu a bisa di Jehova Dios: “Bo mes a traha e cielu i e tera.” Pa ki propósito? E ta duna e contesta dor di describí Dios como “e Formador dje tera i e Trahador di dje, E, Esun cu a establec’é firmemente, cu no a cre’é simplemente pornada, cu a form’é asta pa ser habitá.”—Isaías 37:16; 45:18.
E Asombroso Cel Bibiente
10, 11. Pakico un cel bibiente ta asina asombroso?
10 Ki tal di cosnan bibiente? Nan no ta rekerí un trahador? Por ehempel, considerá un par dje rasgonan asombroso di un cel bibiente. Den su buki Evolution: A Theory in Crisis, biólogo molecular Michael Denton ta declará: “Asta esun di mas simpel di tur sistema bibiente riba tera awe, esta celnan di bacteria, ta obhetonan sumamente compleho. Aunke e celnan di bacteria di mas chikitu ta increiblemente chikí, . . . cada un en realidad ta un berdadero fábrica microminiaturisá cu ta contené miles di partinan exkisitamente diseñá di makinaria molecular elaborá . . . hopi mas complicá cu cualkier mashin construí dor di hende i absolutamente sin paralelo den e mundu no-bibiente.”
11 Encuanto e código genético den cada cel, e ta declará: “E capacidad di DNA pa warda informacion ta surpasá enormemente e capacidad di cualkier otro sistema conocí; e ta asina eficiente cu tur e informacion necesario pa specificá un organismo asina compleho manera hende ta pisa ménos cu un par di mil di miyonésimo parti di un gram. . . . Banda dje nivel di ingeniosidad i complehidad cu e makinaria molecular di bida ta exhibí, asta nos [productonan] di mas avansá ta parce crudo. Nos ta sinti nos humiyá.”
12. Kico un científico a bisa encuanto e orígen di e cel?
12 Denton ta agregá: “E tipo mas simpel di celnan conocí ta asina compleho cu ta imposibel pa aceptá cu un obheto asina por a ser bentá den otro diripiente dor di un of otro suceso raro i sumamente improbabel.” E mester tabatin un diseñador i trahador.
Nos Celebro Increibel
13, 14. Pakico e celebro ta asta mas asombroso cu un cel bibiente?
13 E científico aki despues ta bisa: “Papiando di cosnan compleho, un cel individual no ta nada ora compar’é cu un sistema manera e celebro di un mamífero. E celebro humano ta consistí di rond di dies mil miyon cel di nervio. Cada cel di nervio ta producí alrededor di entre dies mil i cien mil fibranan conectivo cu cua e ta haci contacto cu otro celnan di nervio den e celebro. Na tur huntu e cantidad total di coneccionnan den e celebro humano ta acercá . . . un mil miyon di miyon.”
14 Denton ta sigui: “Asta si solamente un di cien parti dje coneccionnan den e celebro tabata specíficamente organisá, esaki ainda lo a representá un sistema cu ta contené hopi mas tantu cantidad di coneccionnan specífico cu den henter e red di comunicacion riba Tera.” Anto e ta puntra: “Cualkier sorto di proceso basá puramente riba casualidad hamas lo por a forma tal sistemanan?” Claramente, e contesta mester ta nó. E celebro mester tabatin un Diseñador i Trahador interesá.
15. Ki comentarionan otro persona ta haci encuanto e celebro?
15 E celebro humano ta laga asta e computernan di mas avansá parce primitivo. Escritor científico Morton Hunt a bisa: “Nos memoria activo ta carga varios biyon di biaha mas informacion cu un computer di investigacion grandi di nos tempu.” Pues, e ciruhano di celebro dokter Robert J. White a concluí: “No ta kedá mi ningun alternativa sino di reconocé e existencia di un Intelecto Superior, responsabel pa e diseño i desaroyo dje relacion increibel entre celebro i mente—algu fuera di hende su alcance pa comprondé. . . . Mi mester kere cu tur esaki tabatin un cuminsamentu inteligente, cu un Persona a haci’é sosodé.” Mester tabata tambe un Persona cu a mustra interes.
E Sistema di Sanger Unico
16-18. (a) Den ki maneranan e sistema di sanger ta único? (b) Na cua conclusion nos mester yega?
16 Considerá, tambe, e sistema di sanger único cu ta transportá nutricion i oxígeno i ta protegá contra infeccion. Encuanto e cel di sanger corá, un componente principal dje sistema aki, e buki ABC’s of the Human Body ta declará: “Un solo gota di sanger ta contené mas cu 250 miyon cel di sanger separá . . . E curpa ta contené kisas 25 triyon di nan, si plama nan, tin suficiente pa tapa cuater cancha di tenis. . . . Nan ta ser reemplasá, na un velocidad di 3 miyon cel nobo cada seconde.”
17 Encuanto cel di sanger blancu, un otro parti dje sistema di sanger único, e mesun fuente aki ta conta nos: “Mientras cu tin un solo sorto di cel corá, cel di sanger blancu ta bini den hopi variedad, cada tipo cu e capacidad di bringa e batayanan dje curpa den un manera diferente. Por ehempel, un tipo ta destruí celnan morto. Otro tiponan ta producí anticuerpo contra virus, ta kita veneno di substancianan stranhero, of literalmente ta come i digerí bacteria.”
18 Ki un sistema asombroso i sumamente organisá! Siguramente cualkier cos cu ta asina bon hincá den otro i asina cabalmente protectivo mester tin un organisador masha inteligente i interesá—Dios.
Otro Maraviyanan
19. Con e wowo ta, ora e ser compará cu instrumentonan trahá dor di hende?
19 Tin hopi otro maraviya den e curpa humano. Unu ta e wowo, diseñá asina magníficamente cu ningun cámara por duplik’é. Astrónomo Robert Jastrow a bisa: “E wowo ta parce di a ser diseñá; ningun diseñador di telescop por a haci mihor.” I e publicacion Popular Photography ta relatá: “Wowo humano ta mira un extension hopi mas grandi di detaye cu un película. E [wowo] ta mira den tres dimension, den un ángulo masha hanchu mes, sin deformacion, den movecion continuo . . . No ta hustu pa compará e cámara cu wowo humano. E wowo humano ta mas manera un supercomputer increiblemente avansá cu inteligencia artificial, abilidad di procesá informacion, velocidad i formanan di funcioná cu ta leu for di cualkier aparato, computer of cámara traha dor di hende.”
20. Cua ta algun otro aspectonan asombroso dje curpa humano?
20 Pensa tambe, dje manera cu tur e órganonan elaborá di curpa ta cooperá huntu sin nos esfuerso conciente. Por ehempel, nos ta hinca hopi diferente tipo di cuminda i bebida den nos stoma, sin embargo e curpa ta procesá nan i ta producí energia. Purba na hinca un variedad asina di cosnan den e tanki di gasolin di un auto i wak con leu e ta bai! Anto tin e milager di nacementu, produciendo un yuchi encantador—un copia di su mayornan—den solamente nuebe luna. I kico dje abilidad di un mucha di djis un par di aña bieu pa siña con pa papia den un idioma compleho?
21. Considerando e maraviyanan dje curpa, kico personanan razonabel ta bisa?
21 Sí, e hopi creacionnan asombroso i elaborá den e curpa humano ta yena nos cu temor i reverencia. Ningun ingeniero lo por duplicá e cosnan ei. Nan lo por ta simplemente e obramentu di casualidad ciegu? Siguramente cu nó. En bes di esei, ora nan ta considerando tur e aspectonan maraviyoso dje curpa humano, personanan razonabel ta bisa, manera e salmista a bisa: “Lo mi alabá bo [Dios] pasobra den un manera cu ta inspirá temor mi ta maraviyosamente trahá. Bo obranan ta maraviyoso.”—Salmo 139:14.
E Constructor Supremo
22, 23. (a) Pakico nos lo mester reconocé e existencia dje Creador? (b) Kico e Bijbel corectamente ta bisa tocante Dios?
22 E Bijbel ta declará: “Naturalmente, tur cas a ser construí dor di un persona; pero Dios a construí tur cos cu ta existí.” (Hebreo 3:4, The Jerusalem Bible) Ya cu cualkier cas, con simpel cu e por ta, mester tin un constructor, anto e universo hopi mas compleho, huntu cu e enorme variedad di bida riba tera, tambe mester tabatin un constructor. I ya cu nos ta reconocé e existencia di hende cu a inventá aparatonan tal como avion, television i computernan, nos lo no mester reconocé tambe e existencia di Esun cu a duna hende e celebro pa traha tal cosnan?
23 E Bijbel sí ta haci’é, yamand’é “e Dios berdadero, Jehova, . . . e Creador di cielu i e Gran Persona cu ta extendé nan; Esun cu ta extendé e tera i su producto, Esun cu ta duna rosea na e hendenan riba dje.” (Isaías 42:5) E Bijbel corectamente ta declará: “Bo ta digno, Jehova, asta nos Dios, pa ricibí gloria i onor i poder, pasobra bo a crea tur cos, i pa causa di bo boluntad nan a existí i tabata creá.”—Revelacion 4:11.
24. Con nos por sa cu tin un Dios?
24 Sí, nos por sa cu tin un Dios dor dje cosnan cu el a traha. “Pasobra calidadnan invisibel [di Dios] ta ser mirá claramente desde creacion di mundu padilanti, pasobra nan ta ser ripará dor dje cosnan cu [Dios] a trahá.”—Romano 1:20.
25, 26. Pakico e maluso di algu no ta un argumento cu e no tin un trahador?
25 E echo cu algu trahá a ser malusá no kier men cu e no tabatin un trahador. Un avion por ser usá pa propósitonan pacífico, como transporte aéreo. Pero e por ser usá tambe pa destruccion, como un avion di bombardeo. E echo cu e ta ser usá pa ocasioná morto no kier men cu e no tabatin un trahador.
26 Di igual manera, e echo cu hende asina tantu biaha a resultá malu no kier men cu nan no tabatin un Trahador, cu no tin Dios. P’esei, corectamente e Bijbel ta observá: “E perversidad di boso, hombernan! E trahador di pochi di clei mes mester ta considerá igual cu e clei? Pasobra e cos trahá lo mester bisa encuanto su trahador: ‘E no a trahá mi’? I e cos formá mes realmente ta bisa encuanto su formador: ‘E no a mustra comprondementu’?”—Isaías 29:16.
27. Pakico nos por spera pa Dios contestá nos preguntanan encuanto sufrimentu?
27 E Creador a mustra su sabiduria mediante e complehidad asombroso di loke el a traha. El a mustra cu realmente e ta interesá den nos dor di traha e tera net bon pa biba ariba, dor di traha nos curpa i mente di un manera asina maraviyoso i dor di traha asina tantu cos bon pa nos disfrutá di dje. Siguramente lo el a mustra igual sabiduria i interes dor di duna di conocé e contesta na preguntanan tal como: Pakico Dios a permití sufrimentu? Kico lo e haci encuanto esei?
[Plachi na página 5]
E tera, cu su atmósfera protector, ta un cas único diseñá pa nos dor di un Dios cu ta interesá
[Plachi na página 6]
E tera tabata trahá cu interes amoroso di manera cu nos por a disfrutá di bida plenamente
[Plachi na página 7]
‘Un solo celebro ta contené mas coneccion cu henter e red di comunicacion riba Tera.’—Biólogo molecular
[Plachi na página 8]
“E wowo ta parce di a ser diseñá; ningun diseñador di telescop por a haci mihor.”—Astrónomo