Tin un Persona Tras di Tur Maldat?

“MI A mira Diabel.” Esei ta loke un komandante militar di e ehérsito di Nashonnan Uní a bisa despues di a presensiá e masakre horendo ku a tuma lugá na Ruanda na aña 1994 sin ku e por a hasi nada pa stòp esaki. Un otro persona ku tambe tabata testigu di e masakre ei a bisa: “Si un hende ainda ta tribi di bisa ku Satanas no ta eksistí, lag’é topa mi na un graf masal na Ruanda.” Ta Diabel ta tras di tur e kosnan teribel akí bèrdat?

Mayoria di hende no ta kere ku e violensia i krueldat sin sentido ku ta asina komun awe ta obra di un spiritu malbado. Al kontrario, hopi hende ta pensa ku ta e malu ku tin den hende ta kousa e kosnan ei; pues, pa nan, e kousa prinsipal tras di tur maldat ta hende su inklinashon egoista i malbado. Otronan ta bisa ku ta un grupo di hende riku i poderoso ku ta forma parti di un organisashon mundial i sekreto ta manipulá otro hende pa dékadanan kaba ku e propósito di dominá henter mundu. I di mes, tin tambe esnan ku ta kulpa nan gobièrnu- i gobernantenan pa tur e inhustisia i sufrimentu ku tin den nan pais.

Kiko abo ta kere? Dikon tin asina tantu maldat, krueldat, violensia i sufrimentu den mundu awe apesar di tur e esfuersonan pa kaba ku esakinan? Dikon hende ta sigui ignorá e konsekuensianan di nan aktonan i ta parse di ta sigui un rumbo ku lo kaba ku nan? Tin un persona tras di tur maldat? Ken realmente ta goberná mundu? E kontesta lo por sorprendé bo.