BO TABATA SA?

E tèmpel di Herúsalèm a ser rekonstruí despues di aña 70 di nos era?

HESUS a profetisá ku ni ún piedra di e tèmpel di Yehova lo no keda riba otro. E profesia akí a kumpli na aña 70 di nos era ora e ehérsito romano—bou di mando di Tito—a destruí Herúsalèm. (Mat. 24:2) Mas despues, emperador Flavio Klaudio Juliano a plania pa rekonstruí e tèmpel.

Juliano, ademas di tabata un pagano, tabata e último emperador di Roma. E tabata subrino di Constantino e Grandi. Aunke el a haña un supuesto edukashon kristian, despues ku nan a proklam’é komo emperador na aña 361 di nos era, el a rechasá e edukashon akí públikamente i a bira pagano. Bukinan di historia ta referí na dje komo “e Apóstata.”

Juliano tabata odia hende ku tabata yama nan mes kristian. Dikon? Un motibu kisas tabata e echo ku tempu e tabatin seis aña di edat, el a mira kon algun supuesto kristian a mata su tata i otro miembronan di su famia. Segun historiadónan di iglesia, Juliano a enkurashá e hudiunan pa rekonstruí nan tèmpel pasobra el a pensa ku esei lo a proba ku Hesus tabata un profeta falsu.a

No tin duda ku Juliano tabata ke rekonstruí e tèmpel di Herúsalèm. Pero loke historiadónan no ta sigur di dje ta si realmente el a kuminsá rekonstruí e tèmpel akí. I si el a kuminsá, nan no sa dikon e trabou di rekonstrukshon a para. Ma loke sí hende ta sigur di dje ta ku Juliano a ser matá den ménos ku dos aña despues ku el a bira emperador i ku nunka e tèmpel a ser rekonstruí.