Bon Notisia pa Tur Hende

E resurekshon di Hesus a duna su disipelnan mas fe i entusiasmo. Por ehèmpel, apòstel Pablo a biaha dor di henter Asia Menor i e regionnan di Laman Mediteráneo pa forma kongregashon nobo i fortalesé e kristiannan pa para firme ora di enfrentá inmoralidat i persekushon violento. Apesar di tur e difikultatnan ei, hopi hende a bira kristian.

Mas despues Pablo mes a kai será. Sinembargo, asta for di den prizòn el a skirbi diferente karta pa animá i konsehá e kongregashonnan kristian. El a spièrta nan di un peliger mas grandi ainda: apostasia. Bou di guia di Dios su spiritu santu, Pablo a premirá ku “lobo feros” lo a drenta mei mei di nan i “trose e bèrdat” pa asina “pone e disipelnan bai nan tras.”—Echonan 20:29, 30.

Na final di e promé siglo, e apostasia akí a kuminsá. Rònt di e tempu ei, Hesus resusitá a duna apòstel Huan e Revelashon, un bista simbóliko di loke lo pasa den futuro. Anto, manera Huan a skirbi, ni enemigu di Dios ni maestro falsu no por stroba e propósito di Dios pa tera i pa humanidat kumpli. “Tur nashon, tribu, idioma i pueblo” lo tende e bon notisia tokante e Reino di Dios. (Revelashon 14:6) Henter nos planeta lo bira un paradeis i ken ku ke hasi e boluntat di Dios lo biba den dje!

Abo no ta haña ku esei ta un “bon notisia”? Si ta asina, hasi esfuerso pa bo siña mas tokante Dios su mensahe pa humanidat ku Beibel ta papia di dje i kon e por benefisiá bo tantu awor komo den futuro.

Bo por lesa Beibel online, na mas ku 50 idioma, na www.jw.org. Riba e website ei bo por analisá tambe den bo mes idioma e foyeto Dios Tin Bon Notisia pa Nos!, e buki Kiko Beibel Ta Siña Realmente? i otro publikashonnan ku ta splika dikon nos por konfia loke Beibel ta bisa i kon nos por apliká su konsehonan práktiko den nos bida personal i di nos famia. Tambe bo por pidi kualke Testigu di Yehova pa mas informashon.

​—Basá riba Echonan, Efesionan, Filipensenan, Kolosensenan, Filemon, 1 Huan i Revelashon.