Pornografia​—Ta Inofensivo òf Perhudisial?

Unda ku bo bira bo ta haña pornografia.a Bo ta hañ’é tantu den propaganda, moda, pelíkula, músika, revista, komo den weganan di vidio, na televishon, riba smartphone, ‘tablet,’ website i awor via un servisio pa kompartí potrèt online. Ta parse ku pornografia a bira algu masha komun. Aktualmente, mas i mas hende ta entretené nan mes ku mas i mas pornografia kompará ku kualke otro tempu den historia.—Wak e kuadro “Estadístika di Pornografia.”

E opinion di hende tokante pornografia tambe ta kambiando. Profèser Gail Dines a skirbi: “Awe e imágennan a bira asina ekstremo ku loke ántes hende tabata konsiderá komo pornografia pisá awor a bira normal.”

Kiko abo ta pensa di e tendensia akí? Pornografia ta un forma di dibertishon inofensivo, perhudisial òf e no ta dje malu ei? Hesus a bisa: “Tur bon palu ta pari bon fruta, ma tur palu putrí ta pari fruta ku no ta sirbi.” (Mateo 7:17) Ki sorto di “fruta” pornografia ta produsí? Pa nos por haña e kontesta, laga nos trata algun pregunta básiko tokante pornografia.

Kon pornografia ta afektá hende individual?

LOKE EKSPERTONAN TA BISA: Pornografia ta sklabisá hende. P’esei, algun investigadó i terapista ta asta kompar’é ku ‘crack,’ un tipo di kokaina.

Brian,b kende tabata sklabisá na pornografia via Internet, a bisa: “Nada no por a pone mi stòp. Mi tabata sinti komo si fuera mi tabata drogá. Mi tabata sinti mi asina kulpabel ku mi kurpa tabata tembla i mi tabata haña doló di kabes. Mi a lucha pa stòp, pero a dura hopi aña promé ku mi por a vense mi adikshon.”

Hende ku ta bisiá na pornografia hopi bes ta praktik’é na skondí. Nan ta aisla nan mes i no ta onesto. Pues, no ta nada straño anto ku nan ta solitario, ta sinti bèrgwensa, ansiedat, depreshon i rabia. Den algun kaso, nan tin e tendensia di kometé suisidio. Sergio, kende tabata download pornografia riba su telefòn selular kasi tur dia, a bisa: “Mi a aisla mi mes i tabata desesperá. Mi tabata sinti mi kulpabel, solitario i tabata sinti ku mi no tabatin ningun salida. Ademas, mi tabata sinti ku mi no ta bal nada. Mi tabatin asina tantu bèrgwensa ku mi tabatin miedu di pidi yudansa.”

Asta si un hende wak pornografia djis un ratu so òf pa kasualidat, esei por tin resultado lamentabel. Dr. Judith Reisman, kende ta bon konosí pa su investigashon riba tereno di pornografia, a duna un splikashon dilanti di un komité di Senado Merikano, i a bisa: “Imágennan visual pornográfiko ta keda grabá den bo mente i ta kambia bo manera di pensa. E ta graba un imágen instantáneo i permanente den bo memoria kontra bo boluntat, i esaki ta masha difísil òf imposibel pa eliminá.” Susan, kende tin 19 aña di edat i ku a hañ’é ku pornografia riba Internet, a bisa: “E imágennan ei ta grabá den mi mente i nan ta presentá diripiente. Ta parse ku nunka mas lo mi por eliminá nan kompletamente for di mi mente.”

KONKLUSHON: Pornografia ta sklabisá hende i ta hasi hopi daño na su víktimanan.—2 Pedro 2:19.

Kon pornografia ta afektá famianan?

LOKE EKSPERTONAN TA BISA: “Pornografia ta kibra matrimonio i ta kibra famia.”—The Porn Trap, di Wendy i Larry Maltz.

Pornografia ta kousa daño na matrimonio i na famianan, pasobra e . . .

• Ta debilitá e konfiansa, amor i e relashon íntimo entre pareha.—Proverbionan 2:12-17.

• Ta promové egoismo i ta pone e usuario distansiá su mes emoshonalmente for di su kasá i no ta keda satisfecho mas kuné.—Efesionan 5:28, 29.

• Ta stimulá fantasia i deseo seksual robes.—2 Pedro 2:14.

• Ta insitá e persona pa obligá su kasá kometé aktonan seksual baho kuné.—Efesionan 5:3, 4.

• Ta pone e hende bira infiel na su kasá tantu emoshonalmente komo literalmente.—Mateo 5:28.

Beibel ta bisa parehanan kasá pa no ‘traishoná’ otro. (Malakías 2:16) Infidelidat ta un forma di traishon ku por kibra un matrimonio i por hiba na separashon i divorsio. Ora esei sosodé, e yunan ta bira víktima.

Pornografia por afektá yunan direktamente tambe. Brian, kende nos a menshoná anteriormente, ta splika: “Ora mi tabatin mas o ménos dies aña di edat, pa kasualidat mi a topa ku un par di revista pornográfiko di mi tata miéntras mi tabata hunga e wega di tapa kara. Mi a kuminsá wak nan den sekreto sin ku mi a komprondé pakiko e potrètnan ei tabata atraé mi. Asina mi a kuminsá ku un bisio masha destruktivo ku mi mester a sigui lucha kuné komo adulto.” Vários estudio riba e tereno akí ta mustra ku pornografia por influensiá adolesentenan pa bira seksualmente aktivo na edat mas yòn. Ademas, nan ta kuminsá hiba un bida inmoral, ta bira violento den asuntu seksual, i ta bira mentalmente i emoshonalmente instabil.

KONKLUSHON: Pornografia ta ruiná e relashon entre miembronan di famia i ta kousa hopi doló i sufrimentu.—Proverbionan 6:27.

Kiko Beibel ta bisa tokante pornografia?

E PALABRA DI DIOS TA BISA: “Mata e inklinashonnan di boso kurpa pa loke ta fornikashon, impuresa, pashon, mal deseo i golosidat, lokual ta idolatria.”​—Kolosensenan 3:5.

Ku poko palabra, Yehovac Dios ta odia pornografia. Esei no ke men ku Yehova ta desaprobá di relashon seksual. Ta e mes a krea hende ku e órganonan seksual ku por ser usá den matrimonio komo fuente di plaser, pa un pareha kasá por hala mas serka di otro i pa nan por sinti e goso di haña yu​.—Santiago 1:17.

Pero, kon nos por sa ku Yehova ta kondená pornografia? Laga nos wak algun motibu.

• Yehova sa ku pornografia por daña bida di hende​.—Efesionan 4:17-19.

• E ta stima nos i ke protehá nos​.—Isaías 48:17, 18.

• E ke pa nos matrimonio bai bon i pa famianan keda huntu​.—Mateo 19:4-6.

• E ke pa nos ta moralmente limpi i respetá derecho di otro hende.​—1 Tesalonisensenan 4:3-6.

• E ke pa nos respetá nos kapasidat di prokreá i us’é na un manera onorabel​.—Hebreonan 13:4.

• E sa ku pornografia ta un refleho di e punto di bista trosí, egoista i satániko ku hende tin di sèks.​—Génesis 6:2; Hudas 6, 7.

KONKLUSHON: Pornografia ta daña un hende su amistat ku Dios.​—Romanonan 1:24.

Sinembargo, Yehova tin masha kompashon pa hende ku ke libra nan mes for di e gara di pornografia. Beibel ta bisa: “SEÑOR ta yen di kompashon i grasia, kende no ta rabia lihé, i ta abundá den miserikòrdia. Pasobra e sa di kiko nos ta trahá; e ta kòrda ku ta stòf nos ta.” (Salmo 103:8, 14) Yehova ta invitá hende humilde pa hala serka dje pa ‘haña miserikòrdia i risibí bondat inmeresí pa yuda nan na e momento apropiá.’​—Hebreonan 4:16; wak e kuadro “Kon pa Vense Adikshon na Pornografia.”

Hopi hende a aseptá e yudansa di Dios. Pero su yudansa tabata benefisioso? Wak kiko Beibel ta bisa tokante algun hende ku a vense nan bisio: “Dios a hasi boso limpi, . . . el a santifiká boso . . . , a deklará boso hustu den nòmber di nos Señor Hesukristu huntu ku [Dios] Su spiritu.” (1 Korintionan 6:11) Meskos ku apòstel Pablo, e personanan ei por bisa: “Pa tur kos mi tin forsa pa medio di esun ku ta duna mi poder.”​—Filipensenan 4:13.

Susan, kende a logra vense su adikshon na pornografia, a bisa: “Yehova ta e úniko persona ku por yuda bo vense bo adikshon. Si bo resa pidié su guia i yudansa, bo por haña un posishon limpi su dilanti. E lo no laga bo na kaya.”