Siensia Tin Su Límitenan

Resientemente, un kantidat di buki ku ta splika e punto di bista di e asina yamá ateistanan nobo a kuminsá sirkulá. E publikashonnan akí a hala atenshon di basta hende i a hiba na hopi debate. David Eagleman, un sientífiko ku ta studia e sistema di nèrvio, a bisa di e bukinan akí: “Algun lektor ta kere ku sientífikonan sa tur kos.” Anto el a agregá: “Pero un bon sientífiko semper tin un mente habrí, i den historia di siensia tin hopi sorpresa.”

Atraves di siglonan, sientífikonan a hasi vários deskubrimentu sorprendente den nan afan pa komprondé e maravianan di naturalesa. Ma den e proseso akí algun di e sientífikonan ei a kometé erornan grave tambe. Por ehèmpel, Isaac Newton, un di e sientífikonan di mas destaká di historia, a mustra kon e forsa di gravedat ta mantené e planeta-, strea- i galaksianan huntu den universo. El a inventá calculus, un ramo di matemátika ku ta ser usá den funshonamentu di kòmpiuter, físika nuklear i biahamentu den espasio. Sinembargo, Newton tabata práktika alkimia tambe, un supuesto ramo di siensia ku ta kombiná astrologia i fórmulanan mágiko pa purba di kombertí chumbu i otro metalnan den oro.

Mas ku 1.500 aña promé ku Newton, Tolomeo, un astrónomo griego, tabata eksplorá firmamentu ku solamente su wowonan. Anochi e tabata wak kon e planetanan ta move i tabata bon den traha mapa estelar. Pero e tabata kere ku tera ta e sentro di universo i ku tur kos tabata drei rònt di dje. E astrofísiko Carl Sagan a skirbi tokante Tolomeo: “E echo ku pa 1.500 aña hende por a aseptá su idea ku tera ta e sentro di universo ta mustra bon kla ku hende inteligente tambe por ta gran kiboká.”

Awendia sientífikonan ta konfrontá e mesun desafionan. Nan lo por kaba di komprondé tur kos di universo? Sin duda, siensia a bai hopi dilanti i el a benefisiá nos na hopi manera; tòg nos no por sera wowo pa e echo ku siensia tin su límitenan. E físiko Paul Davies a bisa: “Ta imposibel pa haña un splikashon lógiko i armonioso di e mundu rònt di nos.” E palabranan akí ta mustra un bèrdat masha kla: Nunka hende lo por kaba di komprondé tur loke tin den naturalesa. Pues nos no mester kore kere ora hende para ariba ku siensia por splika tur loke ta eksistí.

Beibel ta bisa di e maravianan di naturalesa: “Mira, esakinan ta djis un parti minimal di [Dios] su obranan; i ta un palabra suave asina nos ta tende for di dje!” (Yòb 26:14) Ainda tin masha hopi kos ku hende no ta kapas di komprondé. Pues, e palabranan ku apòstel Pablo a skirbi kasi 2.000 aña pasá ta konta te awe: “O profundidat di e rikesanan, tantu di e sabiduria komo di e konosementu di Dios! Ki inskudriñabel su huisionan ta i insondabel su kamindanan!”—Romanonan 11:33.