Bo Ta Kla pa “Heredá e Tera”?

“FELIS ta esnan ku tin un genio suave, ya ku nan lo heredá e tera.” Nos tur ta anhelá kumplimentu di e promesa ei di Hesus. (Mat. 5:5, nota) E ungínan lo heredá e tera ora nan bira rei den shelu huntu ku Hesus. (Rev. 5:10; 20:6) Pero, mayoria di kristian lo heredá e tera ora ku nan biba pa semper riba dje. Nan lo ta perfekto, felis i lo biba na pas. Pa e bunita speransa ei bira realidat, nan lo tin ku hasi vários trabou importante. Laga nos wak tres di e trabounan ei. Nan tin ku (1) hasi e tera un paradeis, (2) hasi sigur ku hende ku resusitá tin tur loke nan mester i (3) yuda siña esnan ku resusitá. Nos lo analisá tambe loke nos por hasi for di awor pa mustra ku nos ke hasi e trabounan ei den futuro.

KLA PA HASI E TERA UN PARADEIS

Ora Yehova a duna hende e òrdu pa ‘yena e tera i hasi esaki someté na nan,’ el a laga nan komprondé ku henter e planeta lo bira Paradeis. (Gén. 1:28) Hende ku lo biba pa semper riba tera lo tin ku kumpli ku e òrdu ei. Pero den nan kaso, lo no tin un paradeis chikitu ku nan tin ku ekspandé. E Hòfi na Eden no ta eksistí mas. Djis despues di Armagedon, nos lo tin ku drecha e áreanan ku hende a daña. Esei lo ta un trabou grandi!

E israelitanan mester a hasi algu paresido ora ku nan a bolbe for di Babilonia. Pa 70 aña, Israel práktikamente no tabata habitá. Pero Isaías a profetisá ku Yehova lo a yuda nan hasi e pais bunita atrobe. Isaías 51:3 ta bisa: “Lo e hasi su lugánan desolá bira manera Eden i su desierto manera e hòfi di SEÑOR.” Anto, Yehova a yuda e israelitanan logra esei. Di mes manera, Yehova lo yuda esnan ku heredá e tera pa hasié un paradeis bunita. Tin algun kos ku bo por hasi for di awor pa mustra ku bo ke partisipá den e trabou ei.

Por ehèmpel, bo por hasi esfuerso pa tene tantu bo kas komo bo kurá limpi i na òrdu asta si bo bisiñanan no tin e kustumber ei. Bo por purba yuda tambe ku limpiesa i mantenshon di bo Salòn di Reino i Salòn di Asamblea. I si bo sirkunstansia ta permití, bo por apliká tambe komo boluntario pa yuda ku trabounan di ousilio despues di un kalamidat. Asina ei, bo ta mustra ku bo ke yuda bo rumannan. I bo no sa nunka, kisas bo por siña algun abilidat nobo. Anto si Yehova permití bo biba pa semper riba tera, bo por usa nan den futuro.

Algun ruman ta hasi limpiesa i mantenshon na un Salòn di Reino.

KLA PA YUDA HENDE KU RESUSITÁ

Mesora despues ku Hesus a resusitá e yu muhé di Yairo, el a bisa pa duna e mucha algu di kome. (Mar. 5:42, 43) No tabata dje difísil ei pa perkurá pa un hobensita di 12 aña. Pero, pensa kuantu trabou nos lo tin ora ku Hesus kumpli ku su promesa ku “tur esnan ku ta den graf lo tende su stèm i lo sali afó.” (Huan 5:28, 29) Aunke Beibel no ta duna masha detaye, ta di imaginá ku tur hende ku resusitá mester di kuminda, paña i un lugá di biba. For di awor bo por mustra ku bo ke ta einan pa yuda. Ata algun kos ku bo por hasi.

Kiko ta mustra ku for di awor bo ta kla pa heredá e tera?

E rumannan ta felis pa yama e delegadonan bon bini pa un kongreso internashonal na Paris.

Ora anunsiá bishita di e superintendente di sirkuito, bo por duna bo nòmber pa e bin kome serka bo. Ora un bètelita òf un superintendente di sirkuito haña kambio di asignashon i bin pertenesé na bo kongregashon, bo por yuda nan buska un lugá di biba. Si tin un kongreso regional òf un kongreso spesial den bo área, ofresé bo mes komo boluntario pa yuda promé òf despues di e kongreso òf pa yama e delegadonan bon bini.

KLA PA SIÑA HENDE KU RESUSITÁ

Di akuerdo ku Echonan 24:15, nos ta ferwagt ku míles di miónes di hende lo haña resurekshon. Hopi di nan no a siña konosé Yehova promé ku nan a muri. Pero, nan lo haña e oportunidat ei despues ku nan resusitá.a Sirbidónan fiel di Yehova lo bai siña hende resusitá pa siña konosé Yehova. (Isa. 11:9) Charlotte, ku a prediká na Europa, Suramérika i Afrika, ta kla pa hasi esei. Ku un smail riba su kara el a bisa: “Mi tin masha gana di siña hende ku resusitá. Ora mi lesa tokante hende ku a biba ántes, hopi biaha mi ta pensa: ‘Hòmbu, si e tabata konosé Yehova, su bida lo tabata hopi diferente.’ Mi no por warda e dia yega pa mi konta e hendenan ei tokante Yehova i kon mihó nan bida lo ta si nan sirbié.”

Asta e sirbidónan fiel di Yehova ku a muri promé ku Hesus a bini na tera lo tin hopi kos di siña. Lo ta un goso i onor pa splika Daniel kumplimentu di e profesianan ku el a skirbi pero ku e no a komprondé. (Dan. 12:8) Imaginá kon fasinante lo ta pa yuda Rut i Noemí haña sa ku nan tabata antepasado di e Mesías. E tempu ei, nos lo no tin distraishon i preshon di e mundu malbado akí. Sin duda, nos lo ta hopi felis pa hasi e trabou ei.

Un ruman muhé ta duna un señora un tratado den labanderia.

Kon bo por mustra ku bo ke yuda siña hende ku resusitá? Un di e mihó maneranan ta di hasi esfuerso pa mehorá bo abilidat di siña hende i partisipá regularmente den e trabou di prediká. (Mat. 24:14) No preokupá si edat òf algu otro ta limitá loke bo por hasi aworakí. Djis duna lo mihó di bo i lo bo mustra ku bo ta kla pa siña hende ku resusitá.

Di bèrdat bo ke heredá e tera? Bo ta ansioso pa hasi e tera un paradeis? Bo ta kla pa yuda hende ku resusitá haña un lugá di biba i pa siña nan e bèrdat? Awèl for di awor bo por mustra ku bo ta kla. Bo por probechá aworakí di e oportunidatnan pa partisipá den e trabounan similar na esnan ku ta spera bo ora bo heredá e tera.

a Wak e artíkulo “Hopi Hende Lo Ser Guiá na Hustisia” den E Toren di Vigilansia di sèptèmber 2022.