Ngtecha Mera El Mengederedel Er A Beluulechad?

Te betok el chad a mo onger er tia el ker er a bab el loba di ta el tekoi—Dios. Engdi ngbleketakl, el kmo ngdiak a ngii di el ker er a Biblia el melekoi el kmo a Jesus Kristus ma lechub e ngDemal a mera el mengederedel er a beluulechad. Ngbai, Jesus a dilu el kmo: “Ngike el merredel er tia el beluulechad a mo modik.” Ngdilechel a tekingel el kmo: “Ngmerkung a merredel er tia el beluulechad. Engdi ngdiak a klisichel er ngak.”—Johanes 12:31; 14:30; 16:11.

Ma leuaisei e ngike el merredel er tia el beluulechad a omtok er a Jesus. Me ngka ngtechang?

Chochotel el Oeak a Blekeradel er a Beluulechad

A lta rechad a kmal blak a rengrir el mengetmokl a ungil el tekoi, engdi reksi olecholt el kmo a beluulechad a kmal chuarm. Me ngrulleterir a rumdasu el chad el mo melebedebek, el ua ta er a remeluches a babier el David Lawrence er a ldu el kmo: “‘Budech er a beluulechad’—a sorir a rokui el chad. ‘Ungil el omeruul el mo er a rechad’—a kmeed el rokui el chad er a beluulechad a melechesuar er ngii el tekoi. Ma leuaisei e ngngera telemall? Ngera me ngdi ngar er ngii a mekemad el lomtok aika el mera el lurungulir a rechad?”

Ngkora kmal kautok el omeruul, adang diak? Se lsekum a mera el luldesuir a rechad a sorir el kiei el ngar er a budech, e te bai blechoel el louketui e omekoad—el ngar er a kmal kdekudel el blekeradel. Ka molebedebek aike el kdekudel el lomeruul el bla leketmokl a rechad el mo er a tang ma tang. Te mla ousbech a delmerab er a gas, ma meklou el basio el kirir a rekelebus, ma boes el meleseb, ma mekngit el dub, ma lmuut el betok el bedengel a ringel ma ulekcharm el loruul el kmal diak lolecholt a klechubechub.

Ngsebechem el loumerang el kmo a rechad, el tir a mera el sorir e oureng er a budech ma deurreng, a sebechir, el uaisei, el di tir e remuul chouaika el mekngit el omeruul el mo er a rebebil? Ngerang ngar er ngii el klisiich el lorrimel ma lechub e ngmengetikaik er a rechad el mo melechesuar el kmo ngkmal kirir el meruul chouaika el mekngit el omeruul el mo er a rebebil? Ngmla ta el omkora melebedebek el kmo kele lengar er ngii a diak lemeues, el mekngit el reng el mengetikaik aika el mekngit el lomerellir a rechad?

Te Chobeketakl a Remerredel er Tia el Beluulechad

Ngdiak a belkul el dekora melangch er a nger er tia el tekoi, e le Biblia a bleketakl el lolecholt el kmo a mellomes a rengul, el diak lemeues el chad a mengetikaik er a rebek el chad ma beluu. Ngmelekoi el kmo: “A beluulechad el rokui a chederedall er ngike el mekngit.” A Biblia a dirrek el lochotii el kmo ngtechang sel ledu el kmo: “Ngike el lokedongall el Diabelong e Satan . . . el mengeuid er a beluulechad el rokir.”—1 Johanes 5:19; Chocholt 12:9.

A Jesus er sera “longarm er ngii a Diabelong,” e ngdimlak loker er a llemeltel a Diabelong el mengederedel er a beluulechad. A Biblia a smodii er kid a tekoi el dilubech el kmo: “Ma Diabelong a luuta el choteklii el mo er a kmal kedidai el rois, e ulleisech er ngii a rokui el renged er tia el beluulechad; e dilu er ngii el kmo, ‘A lsekum ke mo terrob el mengull el meluluuch er ngak, e ak meskau aika el rokui.’ Ma Jesus a dilu er ngii el kmo, ‘Mcheridau, kau el Satan!’”—Matteus 4:1, 8-10.

Ka molebedebek er tiang. A Satan er a longarm er a Jesus e ngulemsa “rokui el renged er a beluulechad.” Engdi, omomdasu e ngmle sebechel el mera el mengarm er a Jesus el mo nguibes a rengul a lsekum ngdimlak lemera el merredel er a beluulechad? Ngulterekokl el diak. Ngdirrek el Jesus, me ngdimlak lolekoi el lomtok er a Diabelong el kirel aika el kabelment er a beluulechad, el ngii a ulterekokl el lerirellii a lsekum a Satan a dimlak lemera el merredel. Ma leuaisei, e a Satan el Diabelong a mera el diak lemeues el merredel er a beluulechad! A Biblia a dirrek el lomekedong er ngii el kmo “ngchelid er tia el beluulechad.” (2 Korinth 4:4) Engdi, ngmlekerang chouai ngika el kmal mekngit el chad e kmal mlo mesisiich?

Ngike el mlo Satan a ulebeob el anghel er a Dios, engdi ngmlo nguibes er a deruchellel a Dios. Me ngmlo melsemai er a llemeltel a Dios el mengederedel. Me nguluusbech er a bersoech el ua lengerel el mlo chomulak er ngke el kot el redil, el Eba, me ngchiltikikii ngii ma bechil, el Adam, el mo meruul aike el soal e diak lolengesenges er a Dios. (Genesis 3:1-6; 2 Korinth 11:3) Ngdirrek el milsemai el kmo ngsebechel el choitikikterir tirke el rokui el dirkak lemechell el ngelekel a Adam ma Eba el mo cheroid er a Dios. Ma Dios a milecherei a taem me bo lsebechel a Satan el loltaut a tekingel, engdi ngdirkak el sebechel el lotaut.—Hiob 1:6-12; 2:1-10.

Me nguaisei, engdi a Satan a diak di lengii el tang el mengederedel er a beluulechad. Ngmle sebechel el choitikikterir a rebebil er a rechanghel el mo chobengkel el lomtok er a Dios. Me tirkang a mlo mekngit el reng, el loureor el lobengkel. A Biblia a melekoi el kirir sel longelechel er a Rekristiano el kmo: “Me bo lsebechiu el dechor el mtekngelii a ulekbat er a Diabelong. E kid a diak doumekemad er a tech ma rasech, kede bai oumekemad er a . . . merredel er a ilkolk er tia el beluulechad, maike el ngar er aike el beluu er a eanged el mengkit el reng.”—Efesus 6:11, 12.

Motngekelterir a Remekngit el Reng

Tirka el diak lemeues, el mekngit el mengederedel er a beluulechad a blak a rengrir el mengetikaik er a rechad, el mo cheroid er a omengull el mo er a Dios. A ta er a rolel e te meruul el uaisei a sel lolisiich er a uldasu el kmo a rechad a diak lemera el mad, engdi tekingel a Dios a bleketakl el kmo a rulekoad a diak a ngera el lolechesuar. (Genesis 2:17; 3:19; Esekiel 18:4; Psalm 146:3, 4; Olisechakl 9:5, 10) Me seikid, e a mekngit el reng, el mesuub er a delecherul a ngerel a chad el mlad, a sebechel el mengedecheduch er a rechedal ngii el chad el oeak a rultuulbladek ma lechub e “ngngor” el morenges. Sel “ngor” a lekong ngike el mlad el chad, engdi lechub e ngbai mekngit el reng!

Ma lsekum ko morrenges a uaisei el “ngor,” e lak mecheblad. Motngakl a tekoi el lolekoi, e molekoi el ua Jesus el kmo: “Mcheridau kau el Satan!” (Matteus 4:10; Jakobus 4:7) Lak bechei a klemeriarreng er kau el kirir a rediak lemeues el reng me lrellau el mo chelsechusem er a remekngit el reng. Chouaise el lomeruul a okedongall el kmo oltuulbladek, e a Dios a melekoi el kmo a rechedal a kirir el mo mengikiid er tir er a ngii di el bedengel tia el omeruul. A Biblia a melekoi el lomtok er a “ngii di el chad el losiik a ongelil . . . ma lechub a ngii di el chad el lolturk er a rultuulbladek ma lechub a remeduch el lomlaoch aike el mo duubech el tekoi er a medad ma lechub e te mengedecheduch er a rulekoad.”—Deuteronomi 18:10-12; Galatia 5:19-21; Chocholt 21:8.

A ltang kora ungil el klekool, engdi choltuulbladek a rullii a chad el mo er a cheungel a klisichir a remekngit el reng, me ngkmal kired el mengeroid er kid er ngii. Tiang a uldimukl er ngii a cholai el lousbech a crystal-ball, ma Ouija board, ma ESP, ma omenguiu el llecheklel a chim, ma rumes a btuch e omlaoch. A remekngit el reng a dirrek el merekerukem e meruul a betok el tekoi el sebechel el meues er aike el blai ma lechub e ngbasio el lengar er ngii.

A remekngit el reng a dirrek el melisiich aike el tekoi el ngii a mo uchul e a rechad a mo er a klengit, el ua babier, ma katsudo, ma lechub e ngprogram er a TV el melisiich a mekngit el lomeruul ma deleboes. A remekngit el reng a medenge el kmo a mekngit el luldasu a lsekum me ngdiak lecheroid a chad er a uldesuel e ngsebechel el mo uchul e a chad a mo meruul a mekngit el deleboes—el di uai tir el mekngit el reng.—Genesis 6:1, 2; 1 Thesalonika 4:3-8; Judas 6.

Ngklemerang el kmo, te betok a diak lekengei er tia el tekoi el kmo tia el beluulechad a chederedall er a remekngit el reng. Engdi chouaika el klaumerang er tir a diak lemechas a rengud er ngii, e le Biblia a melekoi el kmo: “E a Satan me ngdirrek el meruul er a teletelel el leko ngchanghel er a llomes.” (2 Korinth 11:14) Sel kot el klou el blulekngel a sel blekerdelel el mla rulleterir a rekmal betok el chad el mo oumerang el kmo ngii ma remekngit el anghel er ngii a diak lemera el ngar er ngii. Engdi kele mecheuid! A Diabelong ma remekngit el anghel er ngii a mera el ngar er ngii, me ngkirem el melemolem el lomtok er tir.—1 Petrus 5:8, 9.

Ngdmeu a rengud, e le ngdi kmedung e a Diabelong ma rulebengkel a mo dibus! “A beluulechad [el obengterir tirke el mengederedel el mekngit el anghel] a mo nguemed,” a Biblia a dmung, “engdi ngike el meruul a soal a Dios a di kiei el mo cherechar.” (1 Johanes 2:17) Ngkol ua ngera el deurreng a mo er ngii sel bocha lak aika el mekngit el lomerellel! Me bo lsebeched el melasem el mo bebil er tirke el chad el meruul a soal a Dios e mo oldeu a rengrir el diak a ullebengelel el ngar er a beches el blekeradel er tia el beluulechad.—Psalm 37:9-11, 29; 2 Petrus 3:13; Chocholt 21:3, 4.

A lak lemocholt, e a rokui el oidel a bades a mlengai er a tekoi er a Belau el Biblia.

[Picture on page 4]

Ngmle sebechel a Satan el msa Jesus aika el rokui el kabelment er a klechad a lsekum ngdimlak lekloklel?