Ongeteruich ma Ongelolem el Suobel

A Telbilel a Rengum el Mo Mesiou er a Dios

Ngerang a kirem el meruul er ngii me bo lsebechem el mo sechelil a Dios? (1, 2)

Ngmekerang a omoruul er a telbilel a rengum el mo mesiou er a Dios? (1)

Ngkirem el mo metecholb er a oingerang? (2)

Ngmekerang e sebechem el nguu a klisiich el mo lomelemii a blakerreng er kau el mo er a Dios? (3)

1. A obo msechelil a Dios, e ngkirem el nguu a ungil el klemedengei er a klemerang el ngar er a Biblia (1 Timoteus 2:3, 4), e mo oumerang aike el tekoi el bla msuub (Hebru 11:6), e obult er a kngtim (Rellir 17:30, 31), e mo cheroid er a mekngit el lomeruul e ngodechii a rolel a klengar er kau. (Rellir 3:19) E seikid e a bltikerreng er kau el mo er a Dios a ulterekokl el motbechau el mo soam el mo tibir a rengum el mo mesiou er ngii. Tiang a belkul a kmo ngkmal di kau, el ileakl el meluluuch el mo er ngii el louchais er ngii el kmo ngsoam el lodersau el mo er ngii el mo meruul aike el soal.​—Matteus 16:24; 22:37.

2. Uriul er a omrellii a telbilel a rengum el mo er a Dios, e ngkirem el mo metecholb. (Matteus 28:19, 20) A techolb a mo chochotii er a rokui el chad el kmo kau a mla tibir a rengum el mo mesiou er a Jehovah. Seikid a uchul ma techolb a di kirir tirke el chad el mla mo ultebechel a rengrir el sebechir el di tir el melib er a rolel a omesiungir el mo er a Dios. E a chad sel lemetecholb, e a bedengel el rokir a kirel el mo moduleb er a ralm.a​—Markus 1:9, 10; Rellir 8:36.

3. Uriul er a telbilel a reng er kau, e a Jehovah a soal a klengar er kau el lotireklii a telbilel a rengum. (Psalm 50:14; Olisechakl 5:4, 5) A Diabelong a mo melasem el merrob er kau me ngmo diak mosiou er a Jehovah. (1 Petrus 5:8) Engdi molekeed er kau er a Dios el loeak a nglunguuch. (Filipi 4:6, 7) Mosuub a Tekingel er a bek el sils. (Psalm 1:1-3) Blechoel el di kmeed er a ongdibel. (Hebru 13:17) Omoruul aika el rokui el tekoi, e ke ulterekokl el mo mesisiich el melemolem er a blakerreng er kau el mo er a Dios. Me seikid e ngmo sebechem el melemolem el meruul aike el soal a Dios omoruul el diak a ullebengelel!

[Footnote]