4 el Suobel

Ngmekerang E Sebechem El Mesuub El Kirel A Dios

Ngsebechem el mesuub el kirel a Jehovah sel omonguiu er a Biblia. A irechar e a Dios a millilt er a bebil er a rechad el mo meluches er a uldesuel. Aike el llechukl a mlokedongall el kmo Biblia. Chelecha el sils e kede mesuub el kirel a Dios sel donguiu er a Biblia. Ngdirrek el okedongall el kmo Tekingel a Dios, e le Biblia a ngar er ngii a tekingel a Jehovah, ma lechub e ngklemechel. Ngsebeched el oumerang aike el lolekoi a Biblia e le Jehovah a diak lomulak. “A Dios [a] diak lomulak.” (Hebru 6:18) A klemerang a ngar er a Tekingel a Dios.—Johanes 17:17.

A Biblia a ta er aike el kot el mekreos el sengk er a Dios el me er kid. Ngua babier el mla er a betik a rengul el chedam el mo er a rengelekel. Ngouchais er kid el kirel a telbilel a Dios el mo ngodechii tia el chutem el mo klebokel el basio el bo dekiei er ngii—el paradis. Ngouchais er kid aike el lurruul er a ngar er a mong, ma ike el loruul er a chelechang, ma ike el bo loruul er a ngar er a medad el klebesei el kirir a reblak a rengrir el ngelekel. Ngdirrek el ngosukid el mo mesmechokl aike el mondai er kid e metik er a deurreng.—2 Timoteus 3:16, 17.

A Resioning er a Jehovah a sechelil a Dios; te mo ngosukau el mo medengei aike el osisecheklel a Biblia. Di mouchais er tir el kmo ngsoam el mo mesuub er a Biblia. Tiang a diak locheraol. (Matteus 10:8) E dirrek, e ngsebechem el mo er aike el miting er a Rekristiano. Aikang a ngar er ngii el ngar er aike el basio er a omengull el okedongall el kmo Kingdom Hall. A lsekum e ke mo er aike el miting er a Rekristiano, e ngmereched el mo klou a klemedengei er kau el kirel a Dios.

Ngsebechem el mesuub el kirel a Dios el oeak aike el tekoi el lurruul. El ua tia el kmo, a Biblia a melekoi el kmo: “A Dios [a ulemeob] ra belulechad ma bek el tekoi el ngara milidul.” (Genesis 1:1) Sera lomeob er a “eanged” a Jehovah, e ngrirellii a sils. Tiang ngera ngouchais er kid el kirel a Dios? Ngouchais er kid el kmo ngkmal klou a klisichel a Dios. Ngkmal di ngii el tang a sebechel el rullii a mesisiich el tekoi el ua sils. Ngdirrek el ouchais er kid el kmo a Jehovah a mellomes a rengul, e le ngousbech a llomeserreng el meruul er a sils, el meskid a kleald ma llomes e diak bo lak a nguil.

Aike el blebelel a Jehovah a olecholt el kmo ngbetik a rengul er kid. Molatk el kirel aike el rokui el kakerous el bedengel a rodech el ngar er ngii er tia el chutem. A Jehovah a mle sebechel el meskid a di ta el bedengel a rodech el kired—ma lechub e ngdimlak lomeob a rodech. Ngbai, a Jehovah a milskid a betok el bedengel a rodech el ngar er a betok el kakerous el teletelel, ma klungel, ma iro, ma telemtemul. Tia olecholt el kmo a Jehovah a Dios el diak di el betik a rengul e ngdirrek el kmal bekerurau e melatk er a rechad e bekokuii.—Psalm 104:24.