7 el Suobel
A Uleklatk Er A Irechar
A Jehovah a diak lekengei er a remekngit el chad el mo tomellii a Paradis. Ngdi a resechelil a mo kiei er ngii. Ngera mo duubech el mo er a remekngit el chad? Obo modengelii a nger er tiang, molatk er a mera el cheldechedechal a Noah. A Noah a mle kiei er a betok el telael el rak er a mla me mong. Ngmle ungil el chad el mle blechoel el melasem er a tkurrebab el klisichel el mo meruul a soal a Jehovah. Engdi tirke el bebil er a rechad er a beluulechad a mirruul a mekngit el tekoi. Me nguaisei a Jehovah a dilu er a Noah el kmo Ng mo olekngemed er a rokui el mekngit el chad el oeak a ieleb. Ngdilu er a Noah el mo rullii a arhe me lak bo lemad ngii ma telungalek er ngii sel lemei a Ieleb.—Genesis 6:9-18.
A Noah ma telungalek er ngii a tileketekii a arhe. A Noah a ulemeklatk er a rechad el kmo ngmerku a Ieleb, engdi te dimlak lorrenges er ngii. Te millemolem el meruul aike el mekngit el tekoi. Uriul er a bo lemerek a arhe, e a Noah a ngilai a rokui el charm el losiseb er a chelsel sel arhe, e ngii ma telungalek er ngii a dirrek el mlo soiseb er a chelsel. E sola e a Jehovah a ultengelii a mesisiich el eolt. Ngmlo chull el 40 el llomes ma 40 el klebesei. A ralm a mlei el elebii a beluulechad el rokir.—Genesis 7:7-12.
A remekngit el chad a urridii a klengar er tir, engdi Noah ma telungalek er ngii a silobel. A Jehovah a ulsobelterir er a Ieleb el mo er a beluulechad el klikiid er a chelebirukel. (Genesis 7:22, 23) A Biblia a melekoi el kmo nglmuut el mo er ngii a taem e a Jehovah a mo olekngemed er tirke el diak el sorir el meruul a melemalt el tekoi. A rungil el chad a diak bo lengemed. Te mo kiei el mo cherechar el ngar er a Paradis el chutem.—2 Petrus 2:5, 6, 9.
Chelecha el sils e te betok el chad a meruul a mekngit el tekoi. A beluulechad a mui er a mondai. A Jehovah a blechoel el oldurech er a Resioning er ngii el mo omeklatk er a rechad, engdi oumesingd er tir a diak el sorir el orrenges er a tekingel a Jehovah. Ngdiak el sorir el ngodechii a blekerdelir. E diak el sorir el kongei er aike el lolekoi a Dios el kirel a melemalt ma diak lemelemalt el tekoi. Ngera mo duubech el mo er tirka el chad? Te mo ngodechii a blekerdelir er a ta er a klebesei? Te betok a diak bo lengedechii a blekerdelir. Ngmerekung a taem e a remekngit el chad a mo nguemed e dikea lluut el me ngar.—Psalm 92:7.
Ngdiak bo lengemed tia el chutem; ngbai mo mukbeches el mo paradis. Tirke el mo sechelil a Dios a mo kiei el mo cherechar el ngar er a Paradis el chutem.—Psalm 37:29.