6 el Suobel

A Paradis A Kmedang!

Aike el mekngit el tekoi el ngar er ngii er a chelechang er tia el chutem a ochotii el kmo a Paradis a kmedang. A Biblia a millekoi el kmo kede mo mesang a meringel el blsechel er a uchei er a lebo er ngii a Paradis. Kede kiei er sel taem er a chelechang! Aikakid a bebil er a tekoi el ledilu Biblia el kmo ngmo duubech:

A meklou el mekemad. “Ele ngmo kautok ar beluu mar beluu, ma renged ma renged.” (Matteus 24:7) Me tia el ulaoch a mla tmaut. Sera rak er a 1914 el mei, e ngmla er ngii a eru el mekemedil a beluulechad ma betok el mekekere el mekemad. A betok el milliol el chad a mlad er ngii.

A rakt er ker ma ker. Ngmo er ngii a “bekoiueiuul el rakd er ker me ker.” (Lukas 21:11) Tiang ngmlo klemerang? Chochoi. A kasinoma, ma rekdel a chaidireng, ma haibio, ma malaria, ma AIDS, ma kuk bebil er a rakt a milekodeterir a rebetok el milliol el chad.

A bosech er a kall. Ngar er a beluulechad el rokir e ngngar er ngii a rechad el kmal ngesonges a kelir. A betok el milliol el chad a mad er a klengerenger er a bek el rak. Tiakid a ta er a olangch el kmo ngkmal di kmedung e ngmo er ngii a Paradis. A Biblia a melekoi el kmo: “E morngii a bosech.”—Markus 13:8.

A desiu. “E morngii a . . . desiu er ker me ker.” (Matteus 24:7) Tia dirrek el klemerang er a chelecha el taem. Te betok el milliol el chad a mlad er a desiu er sera 1914 el mei.

A remekngit el chad. A rechad a mo “nguibes a udoud” e “betik a rengrir ra di tir.” Te mo “betik a rengrir ra tametereng el kuk ngaruchei ra le betik a rengrir ra Dios.” A rengalek a mo “omtok rar demerir mar derrir.” (2 Timoteus 3:1-5) Ngdiak mkengei el kmo te betok a rechad el uaisei er a chelecha el sils? Te diak longull er a Dios, e omtok er tirke el melasem el mesuub el kirel a Dios.

Delengerenger. E dirrek a “chelebirukel chomerk er ngii.” (Matteus 24:12) Ke locha mo kongei el kmo a delengerenger a kuk mekngit er aike el mla me mong el rak. A rechad er ker ma ker a lorechorech a kloklir, ma lechub e te mecheblad, ma lechub e te metemall.

Aika el rokui el tekoi a olecholt el kmo a Rengedel a Dios a kmedang. A Biblia a melekoi el kmo: “Me cho mesengei a ikal tekoi el mo uaisei, e bo modengei el kmo a rengedel a Dios a kmedang.” (Lukas 21:31) Ngerang a Rengedel a Dios? Ng gobelment er a Dios el ngar er a eanged el mo kutmeklii a Paradis er tia el chutem. A Rengedel a Dios a mo omtechei a rokui el gobelment er a klechad.—Daniel 2:44.