Ngmei a Ulebongel er Oingerang? Aike el Ledilu a Jesus

MOLATK A ERU EL TEKOI EL LEDILU JESUS EL KIREL A ULEBONGEL:

“Bo mkerekikl, ele ng diak modengelii sel sils me sel belsechel.”​—MATEUS 25:13.

“Bo mekar e mkerekikl, ele ng diak modengelii a le mer ngii isel belsechel.”​—MARKUS 13:33.

Me ngdiak a ngii di el chad er tia el chutem el medengelii sel sils el lemei a ulebongel. Me nguaisei engdi Dios a mla oterekeklii “sel sils ma . . . sikang” el lemei. (Mateus 24:36) Me tiang ngbelkul a kmo ngdiak a rolel e bo dodengei el kmo a ulebongel a kmedang? Ngdiak, ngsebeched el mo medengei e le Jesus a dilu er a redisaiplo er ngii me lomes a ileakl el tekoi el mo duubech el ngii a mo ochotii el kmo a ulebongel a kmedang.

OLANGCH

A blekeradel el mo duubech a mo olangch er a kmo “ulebongel er a beluulchad” a kmedang. A Jesus a dilu el kmo: “A meklou el beluu a mo kaumekemad; ma renged a mo kaodechelakl. A bosech ma desiu a mor ngii er a bek el beluu.” (Mateus 24:3, 7) Ngdirrek el dilu el kmo ngmo er ngii a “meringel el rakt.” (Lukas 21:11) Kau, ke mes aika el tekoi el lulemlaoch a Jesus?

A rebetok a chuarm er chelechang el mekemad, bosech, desiu, me a rakt a uchul. El ua tiang, sera 2004 e ngmla er ngii a klou el desiu er a Indian Ocean el uchul e ngmlo er ngii a tsunami el milekodeterir a rekmeed el 225,000 el chad. E ngar er a chelsel a edei el rak e a COVID-19 pandemic a milekodeterir a rekmeed el 6.9 miliol el chad er a beluulechad el rokir. A Jesus a dilu el kmo a chouaika el tekoi a olechotel a kmo, a ulebongel a kmedang.

“URIUL SILS”

A Biblia mesaod er a taem er a uchei er a ulebongel el kmo ng “uriul sils.” (2 Petrus 3:3, 4) A Ongeru el Timothy 3:1-5, BT a melekoi el kmo a rechad er a taem er a uriul sils a mo diak loltirakl a rolel a kldung. (Momes er a baks el “Uchei er a Lemei a Ulebongel.”) Kau, ke meseterir a rechad er chelecha el taem el di melatk er a di tir, merechorech a rengrir, bekeu, e diak lolecholt a bltikerreng? Tia dirrek lochotii el kmo ngkmal kmeda taem er a ulebongel.

Ngmo uangera klemengetel a uriul sils? A doltirakl aike el lolekoi a Biblia e tia el taem a di mo “kedeb.” A uriul e a Dios a mo okngemedeterir “tirkel melemall er a beluulchad!”​—Ocholt 11:15-18; 12:12.

NGKMEDANG A BARADIS ER TIA EL CHUTEM!

A Dios a mla tutkii sel sils me a sikang el bo lolekngemed er tia el mekngit el blekeradel er a beluulechad. (Mateus 24:36) E ngar ngii a lmuut el ta er a ungil chais. A Dios a “diak el soal a ngii di le chad a leriid.” (2 Petrus 3:9) Ngmesterir a techellir a rechad el mo oltirakl a ngarbab el llechul. E ngerang? E le ngsoal a desobel er a ulebongel er tia el beluulechad e bo dekiei er a beches el blekeradel sel bo le baradis tia el chutem.

Ngmla kutmeklii a rolel e a rokui el chad a sebechir el suubii a rolel e te mo kiei er a beches el blekeradel el ngar cheungel omengederederel a Rengedel. A Jesus a dilu el kmo a ungil chais er a Rengedel a Dios a mo oberk er a “beluulchad el rokir.” (Mateus 24:14) A Resioning er a Jehovah er a beluulechad el rokir a chiloit a betok el biliol el sikang el omerk e olisechakl er a rechad er a klumech er a Biblia el kirel omelatk. A Jesus a dilu el kmo tia el ureor a mo meketmokl er a beluulechad el rokir er a uchei er a lemei a ulebongel.

Ngdi kmedung e ngmokngemed a omengederederir a rechad. Engdi a ungil chais a kmo ngsebechem el mosobel er a ulebongel e mo kiei er a Baradis er tia el chutem el tilbir a Dios. A ongingil suobel a mo mesaod er a rolel e ngsebechem el mo kiei er tia el beches el blekeradel er a chutem.