OMESODEL A SUOBEL ER A MEDAL TIA EL BABIER | A ULEBONGEL NGKMEDANG?

A Ulebongel Ngkmedang?

A Dios ngmo mechititerir a rechad me te melemolem el mengedereder el mo lmuut er sel taem el di el tir el okngemedeterir? Ngdiak, kede milsaod er a uchei el kmo ngmo torob a ringel me a chelebuul el bla lechebangel a rechad el betok el rak. Me ngika el Ulemeob er a rechad me tia el chutem a soal a bo modengelii sel taem el bo loruul er tia el tekoi. Ngmekerang a loruul el uaisei?

Ka molatk er tia el okesiu: A rechad el ngar er a meklou el beluu a locha mo osiik a ulekrael el ngar er a Internet me a lechub e te omes a map er a uchei er a lebo er a omerael. Me sel lomes a sign er a rael me a lmuut el bebil er a tekoi el losaod er ngii aika el ulekrael, e ngmo ulterekokl a rengrir el kmo te kmeda er sel basio el lebo er ngii. Me ngdi osisiu, a Tekingel a Dios a mesaod el kirel a meklou el tekoi el mo duubech er a beluulechad. Me sel domes aika el meklou el tekoi el dubechang, e ngmo ulterekokl a rengud el kmo a ulebongel a kmedang.

A Biblia a mesaod el kmo ngmo er ngii a taem el betok el meklou el tekoi a mo duubech er a beluulechad er a osisiu el taem, el kuk mo ngodech er a ngii di el taem er a reksi er a beluulechad. E aika el tekoi a mo ochotii el kmo ngkmedang a ulebongel. Molatk a bebil er aika el tekoi el medung er a Tekingel a Dios.

1. A MEKLOU EL MONDAI ER A BELUULECHAD A ulaoch el ngar er a Mateus er a 24 el bliongel a omasech a betok el tekoi el mo duubech er a beluulechad. Me aikang a kakerous el telengtengil a olangch el ochotii el kmo ngdi kmedu el mei a “ulebongel er a beluulchad.” (Mateus 24:​3, 14) Me aikang a uldimukl er ngii a meklou el mekemad, me a bosech er a kall, me a desiu er ker me ker. Ngdirrek el mo oberk a mekngit me a bltikerreng er a rebetok a mo mechitechut, me a remengeteklel a klechelid a mo mengeblad er a rechad. (Mateus 24:​6-​26) Me alta chouaika el tekoi a mla ngar er ngii er a irechar el mei, engdi sel lolekedang a ulebongel e ngii el rokui a mo duubech er a osisiu el taem. Me aika el ongingil el edei el tekoi a dirrek el mo duubech er tiaikid el taem.

2. A BLEKERDELIR A RECHAD A Biblia a kmo, “sel bo lekeed a ulebongel er a beluulchad” e ngkmal mo mekngit a blekerdelir a rechad. Te “di mo omdasu er a di tir, e di sorir a udoud, e di oumead er tir e ngarbab a rengrir; te mo mekngit a ngerir el mor a re chad, e diak lorrenges a tekingir a re demerir ma re derrir, e diak loreng a saul, ma diak le sorir el melatk er a chelid. Ng mekngit omerellir el mor a re chad, e diak lousubes a telemellir a re chad; toltuub er a re chad, e mekngit a blekerdelir, e bekeu el sorir el omekcharm er a re chad, e ouketui a ungil tekoi. Te cheblad, e meterkakl el diak lomekerreu, e belkuuk er a kldidairreng, e kuk sorir a tametereng el ngar uchei er a Dios.” (2 Timothy 3:​1-4) Me alta e a rechad a dirrek el mle mekngit a blekerdelir er a ngar er a mong, engdi ngar er a uriul sils e ngmo “medbedubech a ikel mor ngii a ringel er ngii,” e le rechad a kmal mo imis el mekngit a blekerdelir. Me kau, ke mla mtebengii el kmo a rechad a kmal mla mo mekngit a blekerdelir?

3. A RECHAD A MELEMALL ER A BELUULECHAD A Biblia a kmo, a Dios a mo ‘melemall er tirkel melemall er a beluulchad.’ (Ocholt 11:​18) Ngoeak a ngera el rolel e a rechad a mo melemall er a beluulechad? A Biblia a mesaod el kirel a taem er a Noah el kmo: A “rokui el chad a mle mekngit el ngar medal a Dios ma kngterir a uleberk er a beluulchad el rokir. A Dios a milsa beluulchad el kmal mekngtei.” Me ngdilu el kmo: “Ak di mo okngemedeterir el diak a mo medechel.” (Genesis 6:​11-13) Me kau, ke mla mtebengii el kmo a beluulechad a kmal miong er a klakoad me a uldikel? Me a lmuut el tang, a klekedall er a mekemad a kmal mla mo imis el meklou e mesisiich, me chelechang a kot el taem er a reksi er a klechad el sebechir a rechad el di tir el okngemedeterir. A rechad a dirrek el melemall er a beluulechad el okiu a kuk ta er a rolel. Te melemall er a daob, me a dellomel, me a charm, me a eolt el douteliil er ngii. E aika el rokui el tekoi a meklou a ultutelel el uchul me ngsebechel el melemolem a klengar er a beluulechad.

Di lekau el oker el kmo, ‘A dart el rak er a mla me mong, e a rechad ngmla er ngii a klisichir el di tir el okngemedeterir?’ Nglocha diak. Engdi chelechang, e a rechad a mengudel a kmal mesisiich el klekedall er a mekemad e dirrek el melemall er a chutem el dekiei er ngii. A technology a dirrek el kmal mereched el olengeriakl, me a rechad el ousbech aikang a locha diak a ungil el klemedengei er tir me a ka lsebechir el omtebechel a telemellel a mekngit el tekoi el mo duubech. Me nguaisei, engdi a klengar er tia el chutem a diak lultuil er a rechad. E le Dios a mo okngemedeterir a remelemall er a beluulechad er a uchei er a di el tir el tomellii. E tiang a telbilel!

4. A BERKEL A KLUMECH ER A BELUULECHAD EL ROKIR A Biblia a dirrek el ulemlaoch el kirel sel taem el olekedang a ulebongel el kmo: “Tial Ebangkelio el kirel ngii el Renged a mo mosisechakl er a beluulchad el rokir el kirel el mo ocholt el mor a rokui el chad, e sola e ng mochu er ngii a ulebongel er a beluulchad.” (Mateus 24:​14) Tia el klou el ureor er a berkel a klumech a kmal mo ngodech er a ureor el lurruul a oumesingd el klechelid er aike el mereko el betok el dart el rak. Ngdi ngar er a uriul sils e a ileakl el klumech a mo oberk el ngii a “Ebangkelio el kirel ngii el Renged.” Me kau ke medengelii a ta er a klechelid el blechoel el mesaod er tia el klumech? Me a lsekum a rebebil a omomes er tir el ua lolisechakl er tia el klumech, e tirkang te di omerk er ngii er a chelsel a beluam, me a lechub e te mla merkii tia el ungil chais “el mo ocholt el mor a rokui el chad”?

A Web site el www.jw.org a dirrek el melisiich er a “Ebangkelio el kirel ngii el Renged.” E tia el site a olecholt a babier el mesaod er ngii el ngar er a kuk betok er a 700 el omelekoi. Kau ke medengelii a tekoi el uai ngii el melisiich er tia el ungil chais er a beluulechad el rokir? A betok el rak er a uchei er a lebo er ngii a Internet, e a rechad a mle medengelterir a Resioning er a Jehovah el kmo te omerk er a ungil chais el kirel a Rengedel a Dios. E sera rak er a 1939 el mei, e a bek el Ongkerongel a ngar er ngii a tekoi el “Ouchais er a Rengedel a Jehovah” el llechukl er a medal. Me a ta er a babier el mesaod el kirel a klechelid a melekoi el kirel a ureor el loruul er ngii a Resioning er a Jehovah el kmo, “ngdiak a mo uai ngii er a klisichel me a kllungel.” Me a urerir a blechoel el melisiich er a ungil chais el kmo, ngkmal di kmedung e a Rengedel a Dios a mo meruul a tekoi el uchul me ngmei “a ulebongel er a beluulchad.”

A KLOU A ULTUTELEL EL TAEM ER A REKSI

Kau ke mla mtebengii el kmo, aika el eua el tekoi el losaod a Biblia a ngar er ngii er tia el taem el dekiei er ngii? Tia el babier a mla mo betok er a 100 el rak el losaod a tekoi el duubechang er a beluulechad el ngosuterir a rechad el mo medengei el kmo a ulebongel a kmal kmedang. Me nguaisei, engdi a rebebil a diak lekengei aika el tekoi. Te melekoi el kmo a betok er aika el tekoi a di uldesuir a rechad, me a rechad a sebechir el ousbech a statistics el di melisiich a uldesuir. Te dirrek el melekoi el kmo, ngmla mo sebeched el remenges a chais er a cheroid el beluu a uchul me a rebetok a di omdasu el kmo a blekeradel er a beluulechad a di merael el mo mekngit. Me nguaisei, engdi a rebetok a mla omtab aike el tekoi el duubechang e kongei el kmo kede kiei er a ulebengelel a klou a ultutelel el taem er a reksi.

A rebebil el chellimosk el chad a dirrek el kongei el kmo kede kmeda er a taem el mo er ngii a betok el omelodech er tia el chutem. El ua tiang, sera rak er a 2014 e a Science and Security Board er a Bulletin of the Atomic Scientists a ulemeklatk er sel United Nations Security Council el kirel a betok el kdekudel el tekoi el sebechel el okngemedeterir a rokui el chad. Tirka el scientist a dilu el kmo, te mla merriter aika el kdekudel el tekoi e oumerang el kmo ngsebechel el mo uchul a klou el tellemall me a kodellir a rokui el chad. A rebetok el chad a dirrek el oumerang el kmo, kede mla soiseb er a klou a ultutelel el taem er a reksi. Me tirke el oltobed er tia el babier me a rebetok el chad el menguiu er ngii a ulterekokl a rengrir el kmo tiang a kmal ileakl el taem me a ulebongel a kmal kmedang. Engdi ngsebechel el mo dmeu a rengum e diak ko medakt er a ngar medam el klebesei. E ngera uchul? E le ngsebechem el mo suobel er a ulebongel er a beluulechad!

[Omesodel a siasing el ngar er a 7 el llel]

TIRKANG TE DI MESAOD EL KIREL A ULEBONGEL?

A Resioning er a Jehovah a diak di losaod el kirel a ulebongel. Te ulemerk er a ungil chais el betok er a dart el rak. El ua tiang, ngmla er ngii a cheldecheduch er a klou el ongdibel er a 1958 el kmo, “A Rengedel a Dios a Mengedereder, Me Ngkmedang a Ulebongel er a Beluulechad?” Ngmilsaod el kmo, a “rengedel a Dios a mei el diak lolekngemed er a chutem e ngbai mo olekngemed er a beluulechad er a Satan. Me a rengedel a Dios a diak lemei el meleseb er tia el chutem, e ngbai mei el oltaut er a soal a Dios er a beluulechad el di uai ngii er a eanged. Me tiaikid a uchul me a beluulechad a ta er a blebelel a Dios el kirel melemolem el ngar er ngii, me a Dios a mo omekerreu er ngii el diak a ulebengelel.

[Omesodel a siasing el ngar er a 7 el llel]

A Rengedel a Dios a oberkang er a beluulechad el rokir el ngar er a betok el dart el omelekoi