Ulebongel el Cheldecheduch el Obengterir Tirke el Mo Metecholb

A techolb a blechoel el mo er ngii er aike el ta el sils el ongdibel me a meklou el ongdibel er a Resioning er a Jehovah. Ngar er a orokiolel sel cheldecheduch el kirel a techolb, e ngike el oltobed er a cheldecheduch a mo olengit er tirke el mo metecholb me bo el dechor e bo el klou a ngerir longer aika el teblo el ker:

1. Kau ke mla obult er a kngtim e mla nguu a klengar er kau el msa Jehovah e mla kongei er a rolel e ngolsobel lokiu a Jesus Kristus?

2. Kau ke medengei el kmo a techolb el bo mnguu a ochotau el kmo, ke mla mo ta er a Sioning er a Jehovah me ke chedal a cheldebechelel?

A ulterekokl el nger er aika el ker a ‘ochotii’ el kmo tirka el mo metecholb a mui el oumerang er a olubet e mla ngmai a klengar er tir el msa Jehovah. (Rom 10:9, 10, BT) Me nguaisei engdi tirke el mo metecholb a kirir el mo ungil el omtab aika el ker er uchei me bo el sebechir el onger el mera el ngar er a rengrir.

Kau ke mla meluluuch el mora Jehovah e nguu a klengar er kau el msang, e kongei el mo mengull er ngii el di ngii el tang e nguu a soal el mo kot el klou a ultutelel er a klengar er kau?

Kau, ngmla mo ulterekokl a rengum el mo metecholb er sel kot el mereched el techall el mo er ngii?

Ngera ungil bail el kirel a techolb? (1 Ti. 2:9, 10; Jn. 15:19; Fil. 1:10)

Ngkirel ‘lulengeasek a teletelel a biled’ el olecholt el kmo kede “oltirakl er a Dios.” Me tirke el mo metecholb a diak loubail a metacherbesul a teletRelel el bail er a omengedub me a lechub e ngbail el ngar ngii a llechukl er ngii. A bilir a kirel ungil el kltmokl, e selilek, e ungil er a ues, e chatter er a tekoi el bo er ngii.

Ngkirel el mo uangera blekerdelel a chad sel lemetecholb? (Lk. 3:21, 22)

A techolb er a Jesus a kiltmeklii a kerebai el kirel a techolb er a Rekristiano er chelecha el taem. Ngmle medengei el kmo a techolb a kmal klou a ultutelel el tekoi, e tiang a mlocholt lokiu a blekerdelel me a omerellel. Me nguaisei, a basio el ngar ngii a techolb a diak el blil a mekngit el ngellakel, ngomilil, ngomengedub, me a lechub e ngomeruul el mo melemall er a klungel a ultutelel tia el tekoi. Ngika el miltecholb el Kristiano a diak el kora olecholt er ngii el ua lengiluu a nguked. A techolb a uchul a klou el deurreng, engdi tia el deurreng a kirel el mocholt lokiu a ungil omerelled.

A obo blechoel ngar er a miting e mteloi er a rechad er a ongdibel, e ngmekera ikang a lengesukau el otutii a telbilel a rengum el mora Jehovah?

A uriul er a obla metecholb, e ngera me ngklou a ultutelel el molemolem el oltirakl er a ungil el schedule er a omesubem el di kau el tang, e bo blechoel el teloi er a ureor er a berkel a klumech?

ULEKRAEL EL MORA REMECHUODEL ER A ONGDIBEL

A lsekum a dirkak lemetecholb el publisher a ouchais el kmo ngsoal el mo metecholb, e ngkirir el melisiich er ngii el mo omes aike el “Ker el Mo er Tirke el Sorir el Mo Metecholb,” el ngar er a 12-50 el llel. E kirel el mo omes er “A Klumech el Mora Dirkak el Metecholb el Publisher,” el omuchel er a 7 el llel. Tiang a mesaod er a rolel a longetmokl er ngii el mo mengedecheduch er a remechuodel. Ngmelekoi el kmo ngike el soal el mo metecholb a sebechel el ousbech a notes er ngii me tia el babier sel bo losaod aike el ker ngii me a remechuodel. Me nguaisei, ngdiak a ultutelel a bo lomelekl aika el ker el lobengkel a ta er a chad er a uchei er a bo losaod er ngii lobengterir a remechuodel.

A chad el soal mo metecholb a kirel louchais er a tebechelel a chelechad er a remechuodel. Me ngika el soal mo metecholb sel bo el merek el chemuiu aike el “Ker el Mo er Tirke el Sorir el Mo Metecholb,” e a tebechelel a chelechad er a remechuodel a mo oker er ngii el kmo ngmla rullii a telbilel a rengul el lokiu a nglunguuch el mora Jehovah el mo meruul a soal. Me a lsekum ngmla rullii a telbilel a rengul, e a tebechelel a chelechad er a remechuodel a mo olengit er a reteru er a remechuodel el mo mesaod aike el “Ker el Mo er Tirke el Sorir el Mo Metecholb” el obengkel. Ngkakerous el remechuodel a oungerachel a derta er aike el part. Ngdiak a belkul longiil el mo er sel lebo er ngii a subed el kirel a ta el sils el ongdibel me a lechub a klou el ongdibel e lebochu losaod aike el ker tir me a chad el mo metecholb.

Aika el eru el part a blechoel meketmokl er a chelsel a ta el sikang engdi ngdiak a telemellel a bo el telkib el kemanget. Ngkirir lomuchel e mengesimer a derta er ngii el part el oeak a nglunguuch. Me sel ledak e losaod aika el tekoi e ngdiak el kirir el di orreched. A remechuodel el mloterekokl er tir tia el ngerachel a kirir rullii el mo kot el klou a ultutelel el tekoi el bo loruul er ngii.

Ngungil a lsekum a remechuodel a mo mesaod aika el ker el obengkel a derta er tirke el mo metecholb, er a bai loldak er tir el rokui e loruul er tia el tekoi. Me a chad sel longer a derta el ker e ngsebechir el mo medengelii a klungel a klemedengei er ngii. Ngdirrek el mo ulterekokl a uldesuir el kmo ngrredemelel a nguu a techolb. Me a lmuut el tang, ngike el soal mo metecholb a locha beot er ngii el ouchais er a uldesuel sel di lengii el tang. Me nguaisei, engdi a rubekel a sebechir el dmak el terung el mesaod aika el tekoi lobengterir a remechuodel.

A lsekum e ngike el soal el mo metecholb a odos, e ngkirir el chadecheduch er a basio el ungil el meues er a rechad engdi ngdiak el morenges. E a lsekum e ngkirel ngar ngii a chad el obengterir, e ngkirel ta er a remechuodel me a lechub e ngta er a remesiou er a ongdibel. E tiang a di mo oltirakl er a part el bo lomelekl el ua losaod a ongingil el parakurab.

Ngar er aike el ongdibel el mekesai a remechuodel er ngii, e a remesiou er a ongdibel el tir a mla ochotii el kmo te ungil el melilt a tekoi e oba sekutaberreng a sebechir el omelekl aike el ker el ngar er a “Part 1: Klaumerang er a Rekristiano.” Engdi te di remechuodel a sebechir el meruul er sel “Part 2: Klengar er a Rekristiano.” A lsekum a ongdibel a diak a odam el rredemelel a mo omelekl aika el ker, e a odam el oldingel a ongdibel a kirel el mo medengei me bo el sebechel el olengit a ngesou er sel kot el kmeed el ongdibel.

A lsekum ngike el soal el mo metecholb a kekerei el ngalek, e a demal me a delal el ngar er a klemerang a kirir el obengkel. E a lsekum e ngdiak el sebechir, e te teru er a remechuodel (me a lechub e ngta er a remechuodel me a ta er a remesiou er a ongdibel, e tia di mo ultuil er a tekoi el bo losaod) a kirir el teloi a omesaod.

A remechuodel a kirir el oterekeklii el kmo a chad el soal mo metecholb a ngar ngii a ungil klemedengei er ngii er a uchetemel a osisecheklel a Biblia. Ngdirrek el kirir el mo medengei el kmo ngmera el medengelii a kerresel a klemerang e olecholt er a omengull el kirel a cheldebechelel a Jehovah. A lsekum a chad a diak lodengei a uchetemel a osisecheklel a Biblia, e a remechuodel a mo kutmeklii a rolel e ngsebechel el mongeseu el mo rredemelel a techolb er a kuk ta er a taem. A rebebil a ousbech a taem el ochotii el kmo te omes er a ureor er a berkel a klumech el klou a ultutelel me a rekuk bebil a kirir lochotii el kmo te kongei el olengesenges aike el tekoi el mla meketmokl er a ongdibel. Misei e a remechuodel a kirir el oba sekutaberreng sel lousbech er tia el taem el obengterir me bo el sebechir el merriter el kmo ngika el chad a mera el rredemelel a techolb. Me alta e a klou el taem a bo lousbech el mesaod a bebil ker e a bebil a di ousbech er a kedeb el taem, engdi ngkirir lomelekl a rokui el ker.

A remechuodel el miltutk el mo omelekl aika el ker a mo kldibel er a uriul er sel ongeru el omesaod e merriter el kmo a chad ngmo metecholb me a lechub e ngdiak. Te melatk er a blekerdelel a klengar er ngii, me a duch er ngii, me a kakerous el tekoi el chelebangel. E sorir el mo medengei el kmo ngii el chad a mla mekur a deleuill er ngii me a Jehovah e bleketakl er a rengul a meklou a ultutelel el klemerang er a Biblia. Me ngoeak a bltkil a rengmiu me a ngelsumiu, e a chad el mo metecholb a mo ungil kltmokl el churrengelii a klou a ultutelel el ngerechelel er a berkel a ungil chais.

Uriul er tiang, e a tang me a lechub e te teru er tirke el miltutk el mechuodel a mo oumiting lobengkel e ouchais er ngii el kmo ngrredemelel a mo metecholb me a lechub e ngdiak. A lsekum e ngrredemelel, e te mo omelekl er a “Ulebongel el Cheldecheduch el Obengterir Tirke el Mo Metecholb,” el ngar er a 51-53 el llel. E a lsekum e ngdirkak el rekir a omesubel er a Biblia Olisechakl me a Bltikerreng er a Dios el babier, e ngkirir el melisiich er ngii el mo mesuub aika el babier er a uriul er a lemetecholb. Mouchais er ngii el kmo a sils el blo lemetecholb er ngii a mo llechukl er a Congregation’s Publisher Record er ngii. E momeklatk er ngii el kmo a remechuodel a ousbech aika el tekoi me bo el sebechel a cheldebechel el melemolem el mengetmokl a urerir a Resioning er a Jehovah el meliuekl er a beluulechad, e dirrek me bo el sebechel el teloi er aike el tekoi el longetmokl a ongdibel e lengai a omelisiich me a ulekrael er a remechuodel. Me a lmuut kung, a remechuodel a sebechir el lomeklatk er a rebeches el publisher el kmo a ngii di el omesodel a tekoi el kirir a meketmokl loltirakl er a Global Data Protection Policy of Jehovah’s Witnesses, el ngar er a jw.org. Tia el omesaod a diak el bo lengelakl er a 10 el bung.

A ta el rak er a uriul er a bla lemetecholb, e a reteru er a remechuodel a kirir el mo oumiting el obengkel el melisiich er ngii e msang a ungil el ulekrael. A ta er tirka el mechuodel a kirel el ngike el odam el oungerachel er a group er ngii. A lsekum e ngika el dirk miltecholb a kekerei el ngalek, e a demal me a delal el tir a ngar er a klemerang a kirir el obengkel. Ngkirir el melechesuar a bltikerreng me a omelisiich el ngar tia el miting. Me a remechuodel a mo mesaod er a ngesecheklel a omesiungel, me a rolel e ngsebechel el melemolem er a ungil omesubel el di ngii el tang, e menguiu er a Biblia er a bek el sils, e teloi er a temel a omengull el telungalek er a bek el sandei, e blak a rengul el ngar er a miting e teloi er ngii, e oldingel a obliil er a bek el sandei. (Efe. 5:15, 16) E a lsekum e ngdirkak bo lemerek a omesubel er a Biblia Olisechakl me a Bltikerreng er a Dios el babier, e a remechuodel a mo olengit er a ta er a chad me lengesuir el rukui a omesubel aika el babier. A remechuodel a kirir el blechoel chemat er ngii el okiu a bltikerreng. Ngkirel el di tang me a lechub e ngerung a omellach me a ulekrael el lomsang.