Babier el Mlara Governing Body

Betik er a Rengmam el Lomerk er a Klumech er a Renged:

Kam imagine er kau el ta er a rechapostol el dechor er a Rois er Olib, e a Jesus a me duum. Uchei er a lengasech el mora eanged e ngkmo: “Sel le mer kemiu a Chedaol Reng, e ng mor ngii a klisichiu, me kom mo ochotek er a Jerusalem, ma Judea el rokir, ma Samaria, el mo lmuut er a bek el beluu er a beluulchad.” (Rel. 1:8) Ngngua ngera feeling er kau?

Ke ulterekokl el feel er a klou el berraod le tia kora kmal klou el ureor. Ke locha melatk, ‘Ngmekera kemam el di mekesai el disaiplo e sebecham el omerk el “mo lmuut er a bek el beluu er a beluulchad”?’ Ke locha lmatk a tekingel a Jesus er sel kesus er a uchei er a lemad er a lolekoi el kmo: “‘Ng diak a sibai el ngarbab er a mastang er ngii.’ A lsekum tuleldechelakl er ngak, e te dirrek el mo oldechelakl er kemiu; ma lsekum tuleltirakl osisecheklek, e te dirrek el mo oltirakl osisechekliu.” (Jn. 15:20, 21) Sel molatk aika el tekingel e ke locha mo oker, ‘Ak mekera mo ungil el merkii a klumech er a Rengedel a Dios sel bo kchebangel a ultok me a odechelakl?’

Kede chelebangel er a osisiu el blekeradel er chelecha el taem. Kid el Sioning er a Jehovah kired el omerk er a klumech el “mor a bek el bedengir a re chad er ker me ker” er a “bek el beluu er a beluulchad.” (Mt. 28:19, 20) Kede mekera mo kutmeklii tia el ureor, tokubets sel dodengei el kmo a rechad a omtok er kid el kirel?

A Rellir a Re Apostol ouchais er kid er a rolel a Jehovah ngilsuterir a rechapostol me a rekldemir el Kristiano er a taem er tir el kutmeklii a ngerechelir. Tia el babier el monguiu er ngii er chelechang a mileketmokl lolengeseu er kau el merriter aike el tekoi el lurruul. Nglocha kmal mo mechas a rengum le ngkmal klou a klaisisiu er aike el lurruul a remesiungel a Dios er a taem er a rekot el Kristiano me a rechedal a Dios er chelecha el taem. Ke mo mesa el kmo ngdi osisiu a ureor el doruul er ngii e dirrek el osisiu a rolel a dongetmokl er ngii. Sel bo mkerekikl el melatk aika el cheldecheduch e ngmo smisichii a klaumerang er kau el kmo, a Jehovah el Dios a dirk melemolem lomekrael er a moues el cheldebechelel.

Ngomeltkam e dirrek el nglungucham el kmo a omerriter er kau er a babier er a Rellir a Re Apostol a mo oterekeklii a rengum el kmo, a Jehovah mo ngosukau me a chedaol reng er ngii a mo smisichau el outekangel. Sel moltaut aike el desuub er tia el book e ngmo ngosukau el melemolem el omerk er a ungil chais el kirel a Renged e ngosukau el mo ngosuterir a rechad el mo merael er a rael el mora klengar.​—Rel. 28:23; 1 Ti. 4:16.