Momes el Mo er a Dios el Kirel a Deurreng er a Chebechiil

A Jehovaha el Dios a kiltmeklii a kot el chebechiil. A Biblia a ouchais er kid el kmo ngmilebii a kot el redil “e ngoura ngiil redil el msa sechal.” Me a Adam a kmal mlo dmeu a rengul me ngdilu el kmo: A “chiuesel a mlengai er a chiuesek, ma techel a bedengel a mlengai er a techel a bedengek.” (Genesis 2:22, 23) A Jehovah a dirk soal a rebechiil el chad a bo el deu a rengrir.b

Me sel obo bechiil, e ke omdasu el kmo a rokui el tekoi a di mo ungilbesul.c Me alta ke omdasu el kmo nguaisei, engdi ngmo lmuut er a rebechiil el sechal me a rebechiil el redil el kmal kaubltikerreng me te dirrek el mo chelebangel a mondai. (1 Korinth 7:28) Me ngar er a chelsel tia el babier, e ke mo metik a omellach er a Biblia, el a lsekum e ke mo oltirakl, e ngrullii a chebechiielem me a telungalek er kau el mo er ngii a deurreng er a chelsel.​—Psalm 19:8-11.

1 MKENGEI ER A NGERACHEL EL JEHOVAH A MILSKAU

A LOLEKOI A BIBLIA: A bechiil el sechal a bdelul a delengchokl.​—Efesus 5:23.

Me a lsekum e kau a bechiil el sechal, e a Jehovah a mengerechir er kau el mo kerekikl el omekerreu er a bechim. (1 Petrus 3:7) Ngrirellii el mo kldemem er a chebechiil me ngsoal a obo molecholt er a omengull me a bltikerreng el mo er ngii. (Genesis 2:18) Ngkirem el kmal mo betik a rengum er a bechim me bo el sebechem el meruul aike el soal el ngaruchei er aike el soam.​—Efesus 5:25-29.

Me a lsekum e ke bechiil el redil, e a Jehovah a mengerechir er kau el mo olecholt er a dmolech el omengull el mo er a bechim e mo olengeseu er ngii el mengetmokl a ngerechelel. (1 Korinth 11:3; Efesus 5:33) Bo mui el olengeseu a tekoi el bla letib el mo meruul e mngesuir el kutmokl el mera el ngar er a rengum. (Kolose 3:18) E sel moruul el uaisei, e ke mo ungil er medal a bechim me a Jehovah.​—1 Petrus 3:1-6.

SEBECHEM EL MERUUL:

• Moker er a bechim el kmo ke mekerang e mo ungil el bechiil el sechal me a lechub e ke mo ungil el bechiil el redil. Bo mungil el orrenges e moruul aike el sebechem me bo mungil el bechiil

• Moba kllourreng. Ngousbech er a klou el taem el rullemiu el mo mesuub el kmo ko mekerang e mo odeuir a rengul a ta me a tang

2 BO MERA EL OMEKERREU ER A ULDESUEL A BECHIM

A LOLEKOI A BIBLIA: Bo lebiusech a medam el omes aike el mo uchul a klungiolel a bechim. (Filipi 2:3, 4) Momdasu er a bechim el kmo ngkmal mekreos e bo modengei el kmo a Jehovah a mengerechir er a remesiungel el mo “ungil er a re bek el chad.” (2 Timothy 2:24) “A lak dungil el dobedebek a tekoi e dolekoi e ng ua saider el merus, e a dungil el dobedebek a tekoi e dolekoi e ng sebechel el omekungil.” Me bo mungil el melilt a tekoi el molekoi. (Osisechakl 12:18) A reng er a Jehovah a mo ngosukau el mo mengedecheduch el oba delemedemek me a bltikerreng.​—Galatia 5:22, 23; Kolose 4:6.

SEBECHEM EL MERUUL:

• Moluluuch el olengit a ngeso me bo mchelellakl, e bo mungil el omdasu er a uldesuel a bechim er a uchei er a omosaod a meklou a ultutelel el tekoi el obengkel

• Bo mungil el omdasu a tekingem me a rolel a omolekoi

3 MOMDASU EL UA TA EL CHAD

A LOLEKOI A BIBLIA: Me sel bo bechiil, e ko mocha “tal chad” kau me a bechim. (Mateus 19:5) Engdi kemiu a dirk teru el kakerous el chad me ngkakerous a uldesuiu. Me ngkiriu el mesuub el mo ta uldesuiu me a rengmiu. (Filipi 2:2) A kltarreng a klou a ultutelel sel molib a tekoi. A Biblia a melekoi el kmo: “Mnga ngesou er a ungil uldasu me bo mungil er a ikel moruul.” (Osisechakl 20:18) Bechei a omellach er a Biblia me lomekrael er kemiu sel molilt a meklou a ultutelel el tekoi.​—Osisechakl 8:32, 33.

SEBECHEM EL MERUUL:

• Mouchais er a bechim aike el kmal ngar er a uldesuem, ngdiak el ike el di klemedengei me a lechub e ngosengem er a tekoi

• Moker er a bechim er a uchei er a omolib a tekoi el bo moruul