Ngtecha Job?

Ngmla er ngii ta el chad el kiliei er a beluu er a Uz el milengull er a Jehovah. A ngklel a Job. Ngika kmal mle merau e klou a telungalek er ngii. Ngmle ungil a blekerdelel e ullengeseu er a remechebuul el chad; ngullengeseu er a redil el mla mad a rebecherir me a rengalek el diak a redemerir me a rederrir. Me a Job el mirruul a llemalt ngbelkul a kmo ngdimlak a ta el lebo er ngii a mondai er ngii?

A Job a dimlak lodengei el kmo a Satan el Diabelong a omes er ngii. A Jehovah dilu er a Satan el kmo: ‘Ngerang? Ke mla mtebengii a mesiungek el Job? Ngdiak a chad el uai ngii er a beluulechad. Ngorrenges er ngak e meruul a llemalt.’ Me a Satan a dilu el kmo: ‘Of course a Job olengesenges er kau. Ke protect er ngii e omekngeltengat er ngii. Ke mla msang a chetemel me a chermel. Aika omngai er ngii el rokui e ngmo stob el mesiou er kau.’ Me a Jehovah dilu el kmo: ‘Ngsebechem el melasem er a Job. Engdi ngdiak el sebechem el mekodir.’ Ngera uchul me a Jehovah a milecherei a Satan me ngmelasem er a Job? Ngmle ulterekokl a rengul el kmo a Job a mo melemolem loba blakerreng.

A Satan a riruul a betok el tellemall el melasem er a Job. A kot e ngulderecheterir a rechad el lokedongall el Sabean el mo ruchorech a chermel a Job el kerbou me a donkey. E mo merek e otengelii a ngau el mekoad a rokui el chermel el sib. A lmuut el ta er a delebechel er a rechad lokedongall el Kaldean a rirechorech a chermel el kiamo. A remesiungel el ulemekerreu aika el rokui el chermel a dirrek el mlad. E ngii a duubech sel kot el mekngit er aika el tellemall. A rengelekel a Job er a lemeteruud sel blai el lurruul er a mur er ngii el otelecheterir, e te rokui el di mlad. Me a Job a kmal milecham a rengul engdi ngdimlak el stob el mengull er a Jehovah.

A Satan a mle soal a Job a lluut el menga el mo chuarm me ngrirellii me ngobuu a btuu er a bedengel el rokir. A Job a kmal mle imis el chuarm er a ringel. Ngdimlak lodengelii a uchul me aika el rokui el tekoi a dilubech el mo er ngii. Me nguaisei engdi ngmillemolem el mengull er a Jehovah. A Dios a miles aika el rokui e kmal mle dmeu a rengul er a Job.

A Satan a mocha oldurech er a retedei el chad el mo melasem er a Job. Te dilu er ngii el kmo: ‘Kau a ulterekokl el mla mora klengit e omart er a kngtim me a Dios a omals er kau.’ Me a Job a dilu el kmo: ‘Ngdirkak a ta el mekngit el bla krellii.’ Engdi tiakid e a Job a mlo omdasu el kmo ng Jehovah a uchul aika el mondai er a klengar er ngii me ngdula el kmo a Dios a diak el melemalt omerellel el mo er ngii.

A kekerei el chad el ngklel a Elihu a ulerrenges er tir e dimlak longerodech. Sera bo longedecheduch e ngdilu el kmo: ‘Aika el rokui el bla mdung a di cheleuid. A Jehovah lmuut el ngarbab er aike el sebeched el mtab. Ngkmal diak el sebechel rullii a mekngit. Ngmes a rokui el tekoi e olengeseu er a rechad er a mondai er tir.’

A Jehovah mocha mengedecheduch er a Job. Ngdilu el kmo: ‘Ke mla er ker er a krellii a eanged me a chutem? Ngera uchul me ke melekoi el kmo ngdiak el melemalt omerellek? Ke mengedecheduch engdi ngdiak modengelii a uchul me aika el tekoi a uaisei.’ Me a Job a dula kmo ngmlo mekngit. Ngdilu el kmo: ‘Ak mle cheleuid. Ak rirenges el kirem engdi chelechang e ak mera el mocha medengelkau. Ngdiak a tekoi el diak el sebechem el rullii. Mousubes aike el tekoi el kdilung.’

Sera bo el merek tia el omeasem el mlora Job e a Jehovah a rirellii a Job el lmuut el mo mesisiich a bedengel e milsang a lmuut el betok er aike el lullab er a uchei. Me a Job a kiliei el kemanget el taem el happy a klengar er ngii. A Jehovah ulemekngeltengat er a Job er a blekongesenges er ngii mo lmuut er a chelsel a ringel. Kau, ke mo ua Job e di melemolem el mengull er a Jehovah er a chelsel a ngii di el ngerang?