A Moses a Melilt el Mengull er a Jehovah

A telungalek er a Jakob a blo lodengelterir er a Ekipten el kmo te rechad er a Israel. Sera lemad a Jakob me a Josef e ngmlo er ngii a beches el Farao. Ngika mle medakt el kmo a rechad er a Israel a di merael el mo mesisiich er a rechad er a Ekipten. Me ngrirelleterir a rechad er a Israel el mo sibai. Ngmle force er tir el meruul a rengnga e meringel el oureor er a sers. Me nguaisei engdi sera lluut el menga el mo meringel a urerir a rechad er a Israel me tir a liluut el menga el mo betok a ildisir. Ngika el Farao a kmal dimlak el soal tiang me ngdilu el kmo a bek el ngalek er a Israel el mechell el sechal a lokodir. A rechad er a Israel a kmal mle imis el medakt.

A Johebet el redil er a Israel a milechellii a klebokel el ngalek el sechal. Ngdimlak el soal a lokodir me ngngiluu lotungii er a oruikl e mertii er a delul a mekemanget el chudel er a omoachel Nail. A Miriam el ochedal a ngalek a di mla er cheroid e omes el kmo ngngera mo duubech el mo er ngii.

A ngelekel a Farao el redil er a be lolechong er a omoachel e ngmilsang ngii el sualo. Ngmiltik er a ngalek el lmangel er a chelsel e kmal mlo chubur. Me a Miriam uleker er ngii el kmo: ‘Ngsoam a bok sikii a redil el sebechel lomtut er a ngalek el kirem?’ A ngelekel a Farao a kilengei me a Miriam a mlo nguu a delal er a Johebet el mei. Me a ngelekel a Farao a dilu er a Johebet el kmo: ‘Mnguu a ngalek e momtut er ngii el kirek e ak mo harau er kau.’

Me a ngalek er a bo leklou e a Johebet a liluut el nguu el mo msa ngelekel a Farao. A ngelekel a Farao a milengeklii el Moses e ulemekeroul er ngii el ngelekel el sechal. Me a Moses a mlukeroul el prince e mle sebechel ngmai a rokui el tekoi el soal. Me nguaisei a Moses a dimlak a ta el lobes er a Jehovah. Ngmle medengei el kmo ngdiak el chad er a Ekipten; ngchad er a Israel. A Moses a ngileltii el mo mesiou er a Jehovah.

A Moses er a bo el 40 a rekil e ngmlo soal lolengeseu er a rechedal. Sera lesa chad er a Ekipten el mengelebed er a sibai el chad er a Israel e ngkmal mlo meringel el cholebedii ngika el chad er a Ekipten me ngmlad. Ngmilertii a bedengel ngika el chad el doklii er a chelechol. A Farao er a bo lodengei e ngmle soal lomekoad er a Moses. Engdi Moses a chiliis el mora beluu er a Midian. A Jehovah ulemekerreu er ngii er a lengar er a Midian.