Kmard el Kerrekar

A Moses a kiliei er a Midian el 40 el rak. Ngmlo bechiil e mo oungalek. A ta er a klebesei e ngullab a chermel el sib er bita er a Rois Sinai e mesa kmal mengasireng el tekoi. Ngkerrekar el telaut er a ngau engdi ngdiak el meseseb! Me ngmirrael el mo er bita er ngii el mo omes el kmo ngera uchul me nguaisei, e a ngor a mlara belngel a kerrekar e dmu el kmo: ‘Moses! Lak be mkeed. Mngubet oecherem; kau a dechor er a chedaol el chutem.’ A Jehovah milengedecheduch er ngii lokiu a anghel.

A Moses a mlo omart er a medal e le ngmlo medakt. Tia el ngor a dilu el kmo: ‘Ak mla mesa ringelir a rechad er a Israel. Me ak mo olsobel er tir er a rechad er a Ekipten e ngoititerir el mora ungil el beluu. Kau ngike el mo omekrael er tir el tuobed er a Ekipten.’ A Moses a kmal mlo mechas a rengul er aika el tekoi!

Me a Moses uleker el kmo: ‘Ak mo dmu el kmo ngerang a lsekum te oker el kmo ngtecha ulderchak?’ Me a Dios a dilu el kmo: ‘Mdu er tir el kmo, a Jehovah el Dios er a Abraham, e Dios er a Isak, e Dios er a Jakob a ulderchak.’ Me a Moses a kmo: ‘E a lsekum ngdiak lorrenges er ngak?’ Me a Jehovah milsa Moses a proof lochotii el kmo ngmo ngosukii. Ngdilu er a Moses me lebideklii a skersel er a chutem. Tia el skors a ulebult el mo bersoech! E a lebdechemii a kemril a Moses e ngliluut lobult el mo skors. A Jehovah dilu er ngii el kmo: ‘Sel obo mrellii tia el mengasireng el tekoi e ngmo meketeklii el kmo ngngak a ulderchau.’

A Moses a dilu el kmo: ‘Ngak a diak meduch el mengedecheduch er a seked.’ Me a Jehovah tilbir el mo er ngii el kmo: ‘Ak mo ouchais er kau aike el bo molekoi. Ak dirrek el mo oderchii a obekum er a Aron me ngmo olengeseu er kau.’ A Moses er a bo lulterekokl a rengul el kmo a Jehovah obengkel e ngngiluu a bechil me a rengelekel el sechal e liluut el merael el mora Ekipten.