Aike el Kot el Kldei el Ringel

A rechad er a Israel a ble le force er tir el mo meringel loureor el sibai. Me a Jehovah ulderchii a Moses me a Aron me lengai aika el tekoi el mora Farao: ‘Bechititerir a rechedak me lorael me bo lsebechir el mo mengull er ngak er a ked.’ A kedidai a rengul Farao a dilu el kmo: ‘Ngkmal diak kumekerreu a tekingel a Jehovah e kmal diak bok bechititerir a rechad er a Israel me lorael.’ Ngliluut el kmal mo omekringel a urerir a rechad er a Israel. Me nguaisei, a Farao a mo suubii a ringelel sel bo domtok er a Jehovah. Ngmilekerang a Jehovah? Ngmilekdubech a Teruich el Ringel el mora rechad er a Ekipten. A Jehovah dilu er a Moses el kmo: ‘A Farao a diak lorrenges er ngak. A tutau e ngmora Omoachel Nail. Me ke mong e dmu er ngii el kmo, kau el diak mkengei er a rechedak me lorael a uchul me a rokui el ralm er a Nail a di mo rasech.’ A Farao ulemes er a Aron el nguu a skersel el cholebedii a Nail me a omoachel a ulebult el mo rasech. A omoachel a mlo mekngit a bul me a ngikel a mlad me ngii a mlo diak a fresh el ilumel el ralm er a Nail. Me nguaisei, engdi a Farao dimlak el kengei el mechititerir a rechad er a Israel me lorael.

Euid el klebesei er uriul e a Jehovah ulderchii a Moses el lmuut el mora Farao el loba tia el klumech: ‘A lak bechititerir a rechedak me lorael e a Ekipten el rokir a di mo mui er a dechedech.’ Me a Aron a uldersii a skersel me a dechedech a milekekii a beluu el rokir. A rechad a miltik a dechedech er a chelsel a blirir, er bebul a duklir, me a belatingir. Te di mlo iliuekl er a dechedech! A Farao a dilu er a Moses me loluluuch er a Jehovah me leterebengii tia el ringel. A Farao a tilbir el kmo ngmo mechititerir a rechad me te merael. Me a Jehovah tirrebengii a ringel me a rechad er a Ekipten a chiludel ngii el ulekoad el dechedech me ngmlo meklou el bluotel me a beluu a mlo mekngit a bul. Me nguaisei engdi a Farao a dimlak lebechititerir a rechad er a Israel me lorael.

Me a Jehovah dilu er a Moses el kmo: ‘A Aron a kirel cholebedii a chutem me a chebechab lobult el mo rekas.’ Me a rekas a milekekii a beluu el rokir. A rebebil er a chedal a Farao a dilu er ngii el kmo: ‘Tia el ringel a mlara Dios el mei.’ Engdi a Farao a di dimlak lebechititerir a rechad er a Israel me lorael.