Aike el Ongingil el Kllolem el Ringel

A Moses me a Aron a mlora Farao loba klemechel a Dios: ‘A lak obechititerir a rechedak me lorael e ak mo odurokl a eaes el mei er a beluu.’ Me a klou el delebechel el eaes a siliseb er a rekeblirir a rechad er a Ekipten el remerau me a remechebuul. A beluu el rokir a di mlo mui er a eaes. Engdi beluu er a Gosen el lekiliei er ngii a rechad er a Israel a dimlak a eaes er ngii. Ngomuchel er tia el ongeua el ringel e a tellemall a di mlora rechad er a Ekipten. Me a Farao a dilu el kmo: ‘Moluluuch el mora Jehovah me lengai aika el eaes el choroid. A rechedemiu a sebechir el merael.’ Me nguaisei engdi sera lecheroid a eaes er a beluu a Jehovah e a Farao a liluut el change er a uldesuel. A Farao ngdirkak lebo el mesubed a rengul?

A Jehovah a dilu el kmo: ‘A lsekum a Farao a diak lebechititerir a rechedak me lorael e a chermir a rechad er a Ekipten a mo smecher e mad.’ A bo lekukuk e a chermir a mle kaimekmad. Engdi chermir a rechad er a Israel a dimlak lemekesakl. Me nguaisei engdi Farao a millemolem el melecherecher er a rengul e diak lebechititerir me lorael.

Me a Jehovah dilu er a Moses me lebidokl a chebul a ngau el mora eanged. Me ngulebriid er a eolt el ua mekekerei el chebechab el mo bereked er a rokui el chad er a Ekipten. Aika milekdubech a btuu el mora rechad er a Ekipten me a chermir me ngulebuu e meketkat. Me nguaisei a Farao a dirk dimlak lekengei er a rechad er a Israel me lorael.

A Jehovah ulderchii a Moses el lmuut el mora Farao loba klemechel el kmo: ‘Kau ngdirk diak mkengei er a rechedak me lorael? A klukuk e ngmo metengel a chull el kori er a beluu.’ Me a bo lekukuk e a Jehovah uldureklii a kori me a bisebusech me a ngau. Tia mle kot el meringel el chull el blo lodengelii a Ekipten er a lekot el mo beluu el mei. A rokui el kerrekar me a dellomel a di meltemall engdi aike el mlara Gosen a dimlak lemekesakl. Me a Farao a dilu el kmo: ‘Moluluuch er a Jehovah me lestob er tiang! Seikid e ngsebechiu el merael.’ Engdi sera bo lak a kori me a chull e a Farao a liluut el change er a uldesuel.

Me a Moses a dilu el kmo: ‘Chelechang e a chebud a mo kmang a dellomel el mlo medechel er a bo lemerek a chull el kori.’ A betok el miliol el chebud a kilang aike el mlo medechel el kerrekar me a dellomel er a sers. A Farao a dilu el kmo: ‘Molengit er a Jehovah me lechoroid aika el chebud.’ Engdi mo lmuut me a lecheroid ngii el chebud a Jehovah, a Farao a dirk millecherecher er a rengul.

Me a Jehovah dilu er a Moses el kmo: ‘Modersii a chimam el bedul a eanged.’ Me ngdi mle mereched a beluu el kmal mo milkolk. Ngmle edei el klebesei el rechad er a Ekipten a dimlak el sebechir el mesa ngii di el ngerang. Te di mle rechad er a Israel a mla er ngii a llomes er a chelsel a blirir.

A Farao a dilu er a Moses el kmo: ‘Kau me a rechedam a sebechemiu el merael. Kom di mechei a chermiu.’ Me a Moses a dilu el kmo: ‘Kemam a kiram el melai a chermam e le ki mo melenget el mora Dios er kemam.’ A Farao a kmal ngilasech a rengul. Nguleldiu el kmo: ‘Mcheridau! A lsekum ak lmuut el mesekau e a mekodkau.’