Ongeteruich el Ringel

A Moses a tilbir el kmo ngkmal diak el lluut el melasem el mo omes er a Farao. Engdi a uchei er a lorael e ngdilu er ngii el kmo: ‘A sueleb er a klebesei e a rokui el kot el ngalek er a Ekipten a mo mad. A ngelekel a Farao el sechal el mora rengelekir a resibai a mo mad.’

A Jehovah a dilu er a rechad er a Israel me loruul er a ileakl el blengur. Ngdilu el kmo: ‘Bekodir a sechal el sib me a lechub ngkaming el ta rekil e mngai a bebil er a rsechel el chosberberii a medal a tuangel. E mderur ngii el tech e mongang er ngii lobengkel a diak a omkukel el blauang. E motuu a biliu me a oecheriu e bom kltmokl el merael. Tiakid el kesus e ak mo rullemiu el mo mimokl.’ Tirka el chad er a Israel a ulterekokl el kmal mle excited!

Me a sueleb er a klebesei e a anghel er a Jehovah a mlora bek el blai er a Ekipten. Aike el blai el dimlak a olangch er a rasech er ngii a mlad a kot el ngalek er ngii. Engdi anghel a iliu er aike el blai el chesbereber er a rasech. A rokui el telungalek er a Ekipten el mlara remerau el mora remechebuul a mlad a ngelekir. Engdi ngdimlak a ta el ngalek er a Israel el mad.

Mo lmuut er a ngelekel a Farao me ngmlad. A Farao a mlo diak el sebechel mtekengelii me ngdilu er a Moses me a Aron el kmo: ‘Morael el choridemiu er tiang. Bo mongull er a Dios er kemiu. Mngai a chermiu e morael!’

Ngmle orakiruu er a lorael el tobed er a Ekipten a rechad er a Israel. Te mle chelderoder loltirakl er a telungalek me a klebliil. Te mla er ngii a re 600,000 el sechal el chad er a Israel me a rebetok el redil me a rengalek. Te dirrek el mla er ngii a rebetok el chad el mirrael lobengterir el mo mengull er a Jehovah. A rechad er a Israel a kol mocha mimokl!

Te mo meruul er tia el ileakl el blengur er a bek el rak me lak lobes er a rolel e a Jehovah ulsebelterir. Tia el blengur a mlo okedongall el Baskua.