Mengasireng el Tekoi el Dilubech er a Bekerkard el Daob

Sera bo lodengei a Farao el kmo a rechad er a Israel a mla tuobed er a Ekipten e ngliluut el change er a uldesuel e mle soal a lluut el mei. Ngdilu er a resoldau er ngii el kmo: ‘Mketmokl a rokui el kuruma er ngak er a mekemad e dorael el mo oltoir er tir! Ngdimlak el kired el mechititerir me lorael.’ Me ngii me a rechedal a mlo oltoir er a rechad er a Israel.

A Jehovah ulemekrael er a rechedal loba chelsakl el eabed sel mellomes e oba chelsakl el ngau sel klebesei. Ngulemekrael er tir el mora Bekerkard el Daob e dilu er tir me lokedechor a tento er tir er isei.

E seikid e a rechad er a Israel a milsang a Farao me a resoldau er ngii el loltoir er tir. Te millengel er a rechad er a Israel er a Bekerkard el Daob. Me a rechad a lilangel el mora Moses el kmo: ‘Kid a medei! Ulekum ke bai di milchikemam er a Ekipten.’ Engdi a Moses a dilu el kmo: ‘Lak omedakt. Ka di mchelellakl e mesa el kmo ngmo mekera lolsobel er kid a Jehovah.’ A Moses a mera el uluumerang er a Jehovah!

A Jehovah dilu er a rechad er a Israel me letatam a tento er tir e bo lekltmokl el merael. Tiakid el kesus e a Jehovah ngiluu sel chelsakl el eabed el loia er a delongelel a rechad er a Ekipten me a rechad er a Israel. Ngdi mle milkolk a side er a rechad er a Ekipten engdi a side er a rechad er a Israel a mle mellomes.

A Jehovah dilu er a Moses me lodersii a chimal el bedul a daob. E a Jehovah mocha rullii a mesisiich el eolt me ngmilloko el ta el kesus. A daob a ulebii me ngmlo er ngii a rael er a belngel. Tirka el betok el miliol el chad er a Israel a mirrael er ngii el medirt el chutem e mla er ngii a kboub el daob er bitang me a bitang.

A Farao me a resoldau er ngii a ulkiuellir el mo er tia el medirt el bertakl. E a Jehovah rulleterir el mo diak lodengei a loruul me a ochil a kuruma er tir a milengubet. Me a resoldau a mocha melekoi el kmo: ‘Dechiis! A Jehovah oumekemad el kirir.’

A Jehovah dilu er a Moses el kmo: ‘Modersii a chimam er bedul a daob.’ Seikid aika el klboub el daob a di rirebet er bebrir tirka el soldau er a Ekipten. Me a Farao me a rokui el chedal a di mlad. Ngdiak a ta er tir el silobel.

Ngar er a bita el side er a daob e a klou el seked er a rechad a milengitakl loldanges er a Dios el kmo: “Ak mengitakl el mora Jehovah e le ngmla mukebkall. A uos me a rumekall a uos a lulerros er tir er a daob.” Me a rechad a milengitakl e a redil a milloik e outumetum a tambourine. Te rokui el kmal mle dmeu a rengrir el mla mo mimokl.