‘Ngkol Uangera Blekeradel el Kiriu Lobang!’

“Ma le uaisei el meterakl el nguemed a ikel tekoi el rokui, e ngkol uangera chedaol blekeradel ma chomeluu ra Dios el kiriu lobang!”​—2 PETRUS 3:11.

1. Ngera uchul me a ongeru el babilengel a Petrus a kmal mle ungil el uleklatk el kirir a Rekristiano er sel taem?

SEL taem er a loluches er a ongeru el babilengel a apostol el Petrus, e a ongdibel er a Rekristiano a mla outekangel a betok el odechelakl, engdi aika el omeruul a dimlak el chitechetur me a lechub e lomekeoud er a okurulel a ongdibel. Me a Diabelong a uluusbech er a ta er a bedeklel el bla lousbech er ngii el betok el taem er a uchei. El ua losaod a Petrus, a Satan a melasem el mengeiud er a rechedal a Dios el ousbech er a reklsuul el sensei el “mederir a mui ra laokerreng,” me a “rengrir a smongang ra ngibes.” (2 Petrus 2:1-3, 14; Judas 4) Me nguaisei, a belkul sel ongeru el babilengel a Petrus a kmo molemolem el blak a rengum el mo er a Dios.

2. Ngerang a utebengall el tekoi el ngar a 2 Petrus er a 3 el bliongel, e ngera el ker a kired el di kid el oker er kid?

² A Petrus a milluches el kmo: “Ak umdasu el kmo ngmelemalt a kumeklatk er kemiu el olekar a rengmiu er sel klteketel a kngar tial bedengek, ele kmedengei el kmo, ngdi kmedal bo kbedebedii . . . Ngmo blak a renguk muriul er sel bocha krei e kemiu bo lsebechiu el dirrek el diblechoel melatk a ikal tekoi.” (2 Petrus 1:13-15) Me nguaisei a Petrus a mle medengei el kmo ngdi kmedu el mad, engdi ngkmal mle soal a Rekristiano a lolemolem el melatk a tekingel. Me a tekingel a mlo sebechel el meluches er a Biblia me ngsebeched el menguiu er a chelecha el taem. A 3 el bliongel er a ongeru el babilengel a Petrus a kmal ungil el kired e le ngmesaod el kirel a “uriul sils” er tia el blekeradel er a chelecha el taem, me a dirrek el telemellel a okesiu el eanged me a chutem. (2 Petrus 3:3, 7, 10) Ngera el uleklatk a ledillii a Petrus el kmal ungil el kired? E mekerang e tia el uleklatk a sebechel el ngosukid el mo nguu a kengei er a Jehovah?

3, 4. (a) Ngera el mesisiich el tekoi a ledillii a Petrus, e ngera el uleklatk a lebilskid? (b) E kede mo mesaod a ngera el edei el tekoi?

³ Me a uriul er a losaod er a telemellel tia el beluulechad er a Satan e a Petrus a dilu el kmo: “Ngkol uangera chedaol blekeradel ma chomeluu ra Dios el kiriu lobang!” (2 Petrus 3:11, 12) Me ngbleketakl el kmo ngdimlak loker a ker e ngbai millekoi a mesisiich el tekoi. Ngmle medengei el kmo ngdi tirke el meruul a soal a Jehovah e olecholt a blekeradel el odeuir a rengul a mo suobel er sel sils. “A taem a mla mei el [Jehovah] a mo olsobel er a re chedal.” (Isaia 61:2) A apostol a liluut el dochelii el kmo: “Kemiu el betik ra renguk, chelechal diba bocha modengelii itiang, e mongkar er kemiu me lako mechetikaik ra [reklsuul el sensei] me lak moridii a ulterekokl reng er kemiu.”​—2 Petrus 3:17.

⁴ A Petrus el ta er a mle medengelii tia el tekoi el kmo “diba bocha modengelii itiang,” a mle medengei el kmo a uriul el sils e a Rekristiano a kirir el mo kerekikl me lak lemechitikaik e bai lolemolem el blak a rengrir. A uriul e a apostol el Johanes a mileketeklii a uchul. Ngar er a ues, e ngmilsang a Satan el modik er a eanged me “ngoba meringel cheldechuderreng” el kirir tirke el “cholab a llechul a Dios ma chocholt ra Jesus.” (Chocholt 12:9, 12, 17) A reblak a rengrir el ngellitel el mesiungel a Dios me tirke el blak a rengrir el kuk ngodech el sib a ulterekokl el mo mesisiich.(Johanes 10:16) E a derta er kid a kuk mekerang? Ngsebeched el lomelemii a blakerreng er kid? Ngsebeched el mongeseu a lsekum kede (1) omekeroul a ungil el blekerdeled, (2) e melemolem el klikiid a rengud me a bedenged, (3) e mo oba tabesul el osenged er a tekoi sel bo dechelebangel a omelsemai. Me bo dosaod aika el edei el tekoi.

Momekeroul a Ungil el Blekeradel

5, 6. Ngera el blekeradel a kired el omekeroul, e ngera uchul me tiang a ousbech er a klou el ‘klisiched’?

⁵ Ngar a uchelel sel ongeru el babilengel a Petrus e ngmilluches el kmo: “Misei e moturk a klisichiu el odekiar a ungil blekeradel era kloumera er kemiu, e modekiar a klemedengei era ungil blekeradel, e modekiar chomengerem era klemedengei, e modekiar a ducherreng er chomengerem, e modekiar chomeluu ra Dios era ducherreng, e modekiar a bltikerreng era klaodam era chomeluu ra Dios, e modekiar a bltikerreng era bltikerreng ra klaodam. Le ikal tekoi a le ngarngii er kemiu e lorael el mo obdois, e ngdiak bo le ngesonges a klemedengei er kemiu el medengelii a Rubak er kid el Jesus Kristus, me ngdiak lak bo mourodech.”​—2 Petrus 1:5-8.

⁶ Ngklemerang el tekoi, ngkired el ‘oturk a klisiched’ el mo meruul a tekoi el olecholt a ungil el blekeradel. El ua tiang, ngkired el mo blechoel el ngar a miting er a Rekristiano, e menguiu a Biblia er kid er a bek el sils, e oterekokl a temed el mesuub el di kid el tang. Tiang a ousbech er a blakerreng er kid me a ungil el omengetmekled me bo el sebechel el ulterekokl a temel a omesubed, el deu a rengud el meruul er a Omengull el Telungalek. Me sel bo lulterekokl a temed el kirel aika el ungil el tekoi e ngmo beot er kid el oltirakl, el ileakl sel bo domelechesiu a klungiolel sel doltault aika el tekoi.

7, 8. (a) Ngera te melekoi a rebebil el kirel a Omengull el Telungalek er tir? (b) Ngera el klungiaol a sebechem el ngmai er tia el Omengull el Telungalek?

⁷ A ta el odos a milluches el kmo: “Ngoeak a temel a Omengull el Telungalek er kemam e a ki mesuub a betok el tekoi.” E a kuk tang er a odos a melekoi el kmo: “Ngkmal mlo mekngit a renguk er sera bo lak a omesubel a Biblia el ongdibel, e le ngkmal mle soak aike el miting. Engdi chelechang el bla lebo er ngii a Omengull el Telungalek e ak melechesuar el kmo a Jehovah a kmal medengei aike el dousbech er a ungil el blsechel.” A ta el bdelul a telungalek a melekoi el kmo: “A Omengull el Telungalek a kmal klou a lengesuir er kemam. Ngkmal ungil sel le meketmokl a miting el ileakl el kirel aike el dousbech el tekoi! Ngsebechemam el melechesuar el kmo aki meleketek aike el ungil el blekerdelel a Dios er a chelsel a klengar er kemam, e dirrek el metik er a klou el deurreng sel ki moruul a omesiungam.” Me a lmuut el ta er a chedam a melekoi el kmo: “A rengelekek a dmeu a rengrir el merriter a suobel me bo el sebechir el suub a betok. E tia el omeruul a oterekokl a uldesuam el kmo a Jehovah a medengei aike el ki mousbech e dirrek el onger a nglungucham.” Kau ke dirrek el melechesuar a osisiu el tekoi el kirel aika el ileakl el techall el lomeskid a Dios?

⁸ Lak bechei a ngii di el tekoi me leterebengii a temel a Omengull el Telungalek. A ta el obekel a melekoi el kmo: “Ngar aika el mereko el euang el sandei e ngngar er ngii a tekoi el dilubech er a telungalek er kemam el mle sebechel el mo uchul e ngmeterob a temel a omengull er kemam, engdi dimlak ki bechei aika el tekoi me leterebengii a temel a omesubam.” Me nguaisei, alta e ngmo er ngii a taem el mo kirem el ngodechii a temel a omesuub, engdi lak bechei a ngii di el tekoi me leterebengii a temel a Omengull el Telungalek er kemiu!

9. A Jehovah ngmilekerang er a lomekrael er a Jeremiah, e ngera kede suubii er a kerebai er ngii?

⁹ A profet el Jeremia a ulechotii a ungil el kerebai el kired. Nguluusbech a ulekrael el lengilai er a Jehovah e dirrek el uleba klou el omereng el saul el kirel ngii el ulekrael. A ulekrael el lengilai a mlo uchul e ngmle sebechel el meduch a rengul el outekangel e omerk a tekingel a Dios el mo er tirke el diak el semeriar el orrenges. Ngdilu el kmo: “Isei e a klmechem a kmard er a renguk el ua ngau; ng chelsimer er a chelsel a chiuesek.” (Jeremia 20:8, 9) Ngdirrek el ngilsuir el mo outekangel aike mle meringel el taem er sel ulebengelel a telemellel a Jerusalem. Chelechang e ngngar er ngii a cherrungel el Biblia el Tekingel a Dios. Sel de blechoel el mesuub er ngii e bo doba osengel a Dios el kirel a rokui el tekoi, e kede mo ua Jeremia el mle sebechel el outekangel e dmeu a rengul el meruul er a omesiungel, e uleba blakerreng er a chelsel a taem er a omelsemai, e millemolem el klikiid a rengul me a bedengel.​—Jakobus 5:10.

Bo Lak “a Cheisech ma Ka Tellemall er Kemiu”

10, 11. Ngera uchul me ngkired el mo blak a rengud “me lak a cheisech ma ka tellemall” er kid, me ngngera kired el meruul?

¹⁰ Kid el Kristiano a medengei el kmo kede kiei er a taem er a uriul el sils. Me a leuaisei, e ngdiak lemechas a rengud sel domes er a beluulechad el miong er a mekngit el omeruul, el ua rechorecherreng me a deleboes el omeruul me a koadelchad, el ngii a tekoi el Jehovah a kmal ouketui. A tekoi el lolisiich a Satan a ua itiang: ‘A lsekum a remesiungel a Dios a diak el sebechir el mo medakt, e alta e ngmo sebechir el mechitikaik.’ (Chocholt 2:13, 14) Me lak dobes er a tekingel a Petrus el kmo: “Bo le blak a rengmiu me lak a cheisech ma ka tellemall er kemiu, el chelellakl a rengmiu er medal a Dios.”​—2 Petrus 3:14.

¹¹ Sel tekoi el kmo “bo le blak a rengmiu” a di osisiu er sel uleak uchei el tekingel a Petrus el kmo “moturk a klisichiu.” Me ngbleketakl el kmo a Jehovah el ulemekrael er a Petrus el mo meluches aika el tekoi a medengei el kmo, ngkired el mo blak a rengud me bo “lak a cheisech ma ka tellemall” er kid e deklikiid er a klikingelel tia el beluulechad er a Satan. A bo leblak a rengud el mengikiid er kid a uldimukl er a dekerekikl me lak lemekesuseu a rengud el mo meruul a mekngit el tekoi. (Monguiu er a Osisechakl 4:23; Jakobus 1:​14, 15.) Me ngdirrek el kired el mo mesisiich el dechor me lak bo demechitechut er tirke el cheleuid a uldesuir el kirel a klengar er a Rekristiano, “me toltuub er [kid].”​—1 Petrus 4:4.

12. Ngera el ongelaod a debetik er ngii er a Lukas 11:13?

¹² A klechad el diak el cherrungel a uchul me ngmeringel el doruul a llemalt. (Rom 7:21-25) Ngsebeched el olengeriakl a lsekum kede olengit a ngeso er a Jehovah, el ngii a mesterir tirke el olengit er a diak lemetuk el klisichel. (Lukas 11:13) Tia el klisichel a Dios a mekeroul aike el ungil el blekeradel er a chelsel a rengud e ngosukid el mo mesisiich, el diak di sel bo dechelebangel a omelsemai er a klengar, ngdirrek el chelsel a taem er a odechelakl er a chelechang el olekedang a sils er a Jehovah.

A Omelsemai a Sebechel el Smisichau

13. Ngerang a sebechel el ngosukid el outekangel sel bo dechelebangel a omelsemai?

¹³ Kid el kiei er tia el beluulechad er a Satan a uchul me kede blechoel el mo chelebangel a omelsemai. Me lak bo lemekngit a rengud e bai domes aika el omelsemai el ua el techall el mo melisiich er a bltikerreng me a klaumerang er kid el mo er a Dios el okiu a Tekingel. A disaiplo el Jakobus a kmo: “Rudam er ngak, mousbech el kmo ngdeourreng cho mosiuekl a bek el bedengel chomengarm, e ko medengei el kmo, chomengarm ra kloumerang a mekdbechii a ducherreng.” (Jakobus 1:2-4) Lak mobes el kmo, “mar meluu ra Dios a sebechel a Rubak lolsobel er tir ra chelsel chomengarm.”​—2 Petrus 2:9.

14. Ngmekerang e smisichau a kerebil a Josef?

¹⁴ Ka molatk er a kerebil a Josef el ngelekel a Jakob, el rubekul a ulterur el mo sibai. (Genesis 37:23-28; 42:21) Me a Josef, ngurridii a blakerreng er ngii er sera bo lechelebangel er a kmal meringel el omelsemai? Me tiang ngmlo uchul a kngtil a rengul el bedul a Dios el kirel aike el tekoi el dilubech el mo er ngii? A Tekingel a Dios a bleketakl el kmo ngkmal dimlak! Me a lmuut el tang, ngliluut el ngar er ngii a betok el omelsemai el dilubech er a uriul el mo er ngii. Ngmlotelechakl el kmo ngulterebek, e mlekelebus el kirel. Ngdi ngngar er a chelsel tiaikid el blekeradel e ngmle blak a rengul el mo er a Dios. (Genesis 39:9-21) Ngmlukngeltengat er a uriul e le ngii el milechei aika el omelsemai me ngsilisichii a blakerreng er ngii.

15. Ngera sebeched el suubii er a kerebil a Naomi?

¹⁵ Me nguaisei, a omelsemai a sebechel el omekberaod e mengitechut a rengud. A Josef me a rebebil el blak a rengrir el mesiungel a Dios a ulterekokl el mlo melechesuar tia el tekoi. El ua Naomi el mlad a bechil me a teru el ngelekel el sechal. Ngdilu el kmo: “Lak moleker er ngak el kmo Naomi, e moleker er ngak el kmo Mara, el ngikel telirm a rengul, ele Dios el Olab a Bek el Klisiich a kmal mlo meringel a tekingel el mer ngak.” (Ruth 1:20, 21) Ngsebeched el melechesuar a kngtil a rengul a Naomi. Ngdi ua Josef el dimlak bo el mechitechut a blakerreng me a blekongesenges er ngii, el mlo uchul me a Jehovah a milsa omeksulel ngika el dil. (Ruth 4:13-17, 22) Me nguaisei, tia el merael el mei el Paradis, e a Jehovah a mo okngemed aike el rokui el ringel er a chelecha el taem er a chelsel tia el mekngit el beluulechad er a Satan. “A ikel dilubech el tekoi er a ngar a mong a kmal di mo diak a melatk.”​—Isaia 65:17.

16. Ngkirel mo ua ngerang a uldesued el kirel a nglunguuch, e ngera uchul?

¹⁶ A bltkil a rengul a Dios a mo ngosukid el outekangel a ngii di el omelsemai el bo dechelebangel. (Monguiu er a Rom 8:​35-39.) Alta e a Satan a diak el meterob el mengitechut er kid engdi ngmo diak el sebechel a lsekum kede ‘oterekokl a rengud’ e dirrek el mo “ulserechakl el kirel a nglunguuch.” (1 Petrus 4:7) A Jesus a kmo: “Mdiblechoel mengkar, e moluluuch el olengit a klisiich me bo lsebechiu el chemiis era ikal mochu er ngii el tekoi, e bo mdechor er medal a Ngelekel a chad.” (Lukas 21:36) Ngsebeched el mesang el kmo a Jesus a uluusbech a tekoi el “olengit” el ngii a kot el ungil el rolel a nglunguuch. Me a tekingel a Jesus el kirel a ongit a melisiich er kid el kmo chelechang e ngmla mo taem el kired el blak a rengud er a deruchelled er a medal ngii me a Demal el Jehovah. Me ngdi tirkel el blak a rengrir er tia el tekoi a ngar ngii a techellir el mo suobel er a sils er a Jehovah.

Bo Mteloi er a Omesiou el Mo er a Jehovah

17. A lsekum a basio el mngar ngii a meringel a rolel a berkel a klumech er ngii, e ngera el ungil kerebai er a remesiungel a Dios er a taem er a Biblia a sebechem el oltirakl?

¹⁷ Ngkmal melsisiich a rengud sel deteloi aike el tekoi el kirel a omengull er kid. Tiang a mekltkid er a tekingel a Petrus el kmo: “Ngkol uangera chedaol blekeradel ma chomeluu ra Dios el kiriu lobang.” (2 Petrus 3:11) E sel kot el klou a ultutelel er aika el rokui a berkel a ungil chais er a Renged. (Matteus 24:14) Ngklemerang, ngar a bebil el basio e a berkel a klumech a sebechel el mo meringel, el odechelakl me a ultok a uchul, me a lechub e a rechad a kmal mechesang er a betok el tekoi el kirel a bek el sils er tir. A remesiungel a Jehovah er a taem er a Biblia a mle chelebangel a osisiu el tekoi, engdi ngdimlak bo lemechitechut a rengrir e “millemolem” el omerk er a klmechel a Dios. (Monguiu er a 2 Kronika 36:​15, 16; Jeremia 7:24-26) Ngera ngilsuterir el mo outekangel? Te ulemes er a urerir el oba osengel a Jehovah el dimlak loba osengel a klechad, te dirrek el ulemes er tia el techall el omerk er a ngklel a Dios el kmal ileakl el tekoi.​—Jeremia 15:16.

18. Ngoeak a berkel a klumech er a Renged, e ngera mo duubech er a ngar medad el kirel a omengebkellel a ngklel a Dios?

¹⁸ Kid me kede dirrek el oba ileakl el techall el mo ouchais er a ngklel a Jehovah me a moktek er ngii. Ka molatk er tiang: Ngoeak a bleketakl el ureor er a berkel a klumech, e a recherrouel a Dios a mo diak el sebechir el chemiis er sel taem el bo lechelebangel er a kerrekerilel a Jehovah. El di ua Farao er a irechar, te mo medengei el kmo ngii el Jehovah el Dios a oukerrekeriil er tir. (Exodus 8:1, 20; 14:25) E osisiu el taem, e a Jehovah a mo mengididai er a reblak a rengrir el mesiungel el meketeklii el kmo te mera el omtechei er ngii.​—Monguiu er a Esekiel 2:5; 33:33.

19. Kede mekerang e ochotii el kmo kede blechoel el melatk er sel kllourreng er a Jehovah?

¹⁹ Ngar er a ulebongel er a ongeru el babilengel a Petrus el mo er a rekldemel er a klaumerang, e ngkmo: “Momdasu ra kllourreng ra Rubak er kid el kmo ngkirel chosobeliu.” (2 Petrus 3:15) Me nguaisei, ngungil a bo deblechoel el melatk er sel kllourreng er a Jehovah. Ngmekerang a doruul er tiang? El oeak sel domekeroul aike el ungil el blekerdelel er a chelsel a klengar er kid, e lak “a cheisech ma ka tellemall” er kid e dolemolem el mesisiich er a taem er a omelsemai, e bo demechesang el meruul er a omesiunged el kirel a Renged. Me sel doruul el uaisei, e kede ulterekokl el mo ngmai a betok el klengeltengat el ngar sel “beches el eanged ma beches el chutem.”​—2 Petrus 3:13.

Ke Dirk Melatk?

• Kede mekerang e omekeroul aike el ungil el blekerdelel a Dios?

• Kede mekerang e mo diak “a cheisech ma ka tellemall” er kid?

• Ngera sebeched el suub er a kerebil a Josef me a Naomi?

• Ngera uchul me ngkmal ileakl el techall tia el ureor er a berkel a klumech?

[Siasing el ngar er a 17 el llel]

Ngera sebechel el ngosukemiu a rebechiil el sechal el omekeroul aike el ungil el blekerdelel a Dios el kiriu kemiu me a telungalek er kemiu?

[Siasing el ngar er a 18 el llel]

Ngera sebeched el suub er sel rolel e nguluutekangel a omelsemai a Josef?