Mosuub er a Tekingel a Dios

Ngera Uchul Me a Rekristiano a Mo Metecholb?

Tia el suobel a mesaod a ker el locha mla ta el moker e dirrek el ocholt a nger er ngii er a chelsel a Biblia. A Resioning er a Jehovah a kmal dmeu a rengrir el mo mesaod aika el nger el obengkem.

1. Ngera belkul a techolb er a Rekristiano?

A techolb a ongit el kirel a ungil el deleuill er a chad el obengkel a Dios. Me a Kristiano a kirel el metecholb er sel taem el leklunga el chad el mla mo sebechel el mesuub el kirel a Dios e mo disaiplo er a Jesus, el diak el sel taem er a dirk el tolechoi. (Rellir 8:12; 1 Petrus 3:21) Kede mo disaiplo, me a lechub e kede obengkel a Jesus, sel dosuub e doruul aike el tekoi el lullisechakl.​—Monguiu er a Matteus 28:19, 20.

Sel taem er a rechapostol er a Jesus, e a rebetok el chad a di mle mereched el mo mesuub el kirel a Dios me a Jesus. El ua tiang, a ta el chad er a lesubii el kmo a kodellel a Jesus a milekengii a techall er a osobel e ngdi mle mereched el mo disaiplo. Me chelechang e a rebetok el medemedemek a rengrir el chad a mla ngiltii el mo obengkel a Jesus.​—Monguiu er a Rellir 8:26-​31, 35-​38.

2. Ngera uchul me a Jesus a miltecholb?

Ngmle bekord el 30 a rekil a Jesus er sel taem er a Johanes el Techolb er a lodelebii er a omoachel er a Jordan. Me a techolb el lengiluu a Jesus a ulechotii el kmo ngmillilt el mo meruul a soal a Dios. (Hebru 10:7) E tiang a uldimukl er a letengetengii a klengar er ngii el melubet a kngterir a rechad. Me a uchei er a lemei er a chutem, e a Jesus a mla er a eanged e mle betik a rengul e blechoel el olengesenges er a Demal el Jehovah.​—Monguiu er a Markus 1:9-​11; Johanes 8:29; 17:5.

3. Ngera uchul me a Kristiano a kirel el mo metecholb?

Me kid a diak deua Jesus e le kede di mechell el ngar er a klengit. Engdi a kodellel a Jesus a uchul me ngsebechel el mo er ngii a ungil el deleuill er kid el obengkel a Dios. (Rom 5:10, 12; 12:1, 2) Me ngar er ngii a techelled el mo chedal a telungalek er ngii. (2 Korinth 6:18) Ngmekerang e sebeched el nguu tia el techall? El okiu a nglunguuch e kede tuib a rengud el mo er a Jehovah e tibir el mo meruul a soal er a chelsel a klengar er kid. Me a uriul er a detib a rengud, e kede mo ochotii el mo er a buai el mo metecholb.​—Monguiu er a Matteus 16:24; 1 Petrus 4:2.

4. Ngmekerang a omongetmokl er kau el kirel a techolb?

A Resioning er a Jehovah a mesuub er a Biblia el obengkel a ngii di el chad el soal el olekeed er ngii er a Dios. A omesubel a Biblia me a mo er a miting er a Rekristiano a smisichii a bltkil a rengum me a klaumerang er kau el mo er a Dios. Ngdirrek el ngosukau el mo omekeroul a ungil el uldesuem me a blekerdelem. Me a okurulel a bltikerreng, klaumerang me a lmuut el bebil er a ungil el blekeradel, a mo ngosukau el melemolem el mesiou er a Jehovah el mo cherechar.​—Monguiu er a Johanes 17:3; Hebru 10:24, 25.

A lsoam a lmuut el omesodel, e momes er a 18 el bliongel er tia el babier, Ngerang Mera el Lolisechakl a Biblia?, el mirruul er a Resioning er a Jehovah.