“Ngak a Mo Obengkemiu”

“A rebetok a mo kerekikl el merriter a tekoi e a mera el klemedengei a mo klou.”​—DANIEL 12:4, NW.

NGMEKERANG A OMONGER?

Te milekerang a rechad e metik er a “mera el klemedengei”?

Ngmilekerang e “a rebetok” el chad a mlo kongei er a klemerang?

Ngoeak a ngera el rolel e ngmla oberk a mera el klemedengei?

1, 2. (a) Kede mekerang e medengei el kmo a Jesus a obengked er chelechang me a ngar medad el klebesei? (b) Ngera mo duubech er sel taem el rechad a kerekikl el mesuub er a Biblia el ua lolekoi a Daniel 12:4?

KA MOLATK el leko ke ngar er a Paradis. Bek el tutau e ke mekiis el ungil a rengum e semeriar el omuchel er a ta er a sils. Ngdiak a ringelel me a secherel a bedengem. Ngsebechem el cherrungel el omes, melungel, orrenges, omelechesiu, e dirrek el mengarm a kall. Ngkmal mesisiich a bedengem e dmeu a rengum er a urerem, e teloi er a rebetok el sechelim, el diak a omekringel er a uldesuem. Aika el klengeltengat a sebechem el ngmai sel lebo longedereder er tia el chutem a Rengedel a Dios. Ngika el King er kid el Jesus Kristus a mo meskid aika el klengeltengat e dirrek el mo olisechakl er a rokui el chad el kirel a Jehovah.

² Sel taem e a Dios me a Ngelekel a mo ngosuterir a remelemalt a rengrir el chad el mo olisechakl er a rebebil el kirel a Jehovah. Nguaisei, a Jehovah me a Jesus a mle blechoel el lolengeseu er a Rekristiano el olisechakl er a rebebil. Me a uchei er a lebo er a eanged a Jesus e ngdilu er a rulebengkel el kmo: “Ngak a mo obengkemiu.” Me ngmo melemolem el olengeseu er tir. (Monguiu er a Mateus 28:19, 20.) Me bo dosaod er a ulaoch el Daniel a lilechesii er a lengar er a Babilon er a bekord el 2,500 el rak er a mla me mong el melisiich er a klaumerang er kid el kirel a telbilel a Jesus. Ngmilluches el kirel a taem er kid el kmo: “A rebetok a mo kerekikl el merriter a tekoi e a mera el klemedengei a mo klou.” (Daniel 12:4, NW) Tia el ulaoch a ochotii el kmo a rechad el kerekikl el mesuub er a Tekingel a Dios a mo mukngeltengat e le te mo omtab e mo medengei a klemerang er a Biblia. Ngdirrek el melekoi el kmo “a mera el klemedengei a mo klou.” Me tirke el nguu tia el klemedengei e kongei er ngii a dirrek el mo olisechakl er a rebebil el kirel. Me a rechad er a bek el beluu a mo er ngii a techellir el mesuub aika el klemerang el tekoi. Kede mo mesang el kmo ngmekerang e toutang tia el ulaoch. E tiang a smisiich a klaumerang er kid el kmo a Jesus a obengterir a rultirakl er ngii er chelechang me a Jehovah a mo oltaut a rokui el telbilel er a ngar medad el klebesei.

A REKRISTIANO A METIK ER A “MERA EL KLEMEDENGEI”

3. Ngera dilubech er a uriul er a lemad a rechapostol?

³ A ultok el kirel a mera el osisechakl el lulsaod er ngii a Paulus a ulemuchel er a uriul er a kodellir a rechapostol e di mle mereched el oberk el ua ngau. (Rellir 20:28-​30; 2 Thesalonika 2:1-3) Ngmlo chuib a betok el rak e tirke el leko te Kristiano a dimlak lodengelii a mera el klemedengei. Me a remengeteklel a klechelid a melekoi el kmo te oumerang er a Biblia engdi te olisechakl er a rechad a ‘osisecheklir a remekngit el anghel,’ el ngii a blulak el oltuub er a Dios. (1 Timothy 4:1) Me tiaikid a uchul me a rebetok a dimlak bo lodengelii a klemerang el kirel a Dios, e bai mlosisechakl er a blulak el tekoi el kmo a Dios a Trinidad, me a soul a diak el mad, me a rebebil a mo medul er a beluu er a ngau el diak a ulebengelel.

4. Ngmilekerang a kekerei el cheldebechel er a Rekristiano e ulemuchel el osiik er a klemerang er a Biblia er a rak er a 1870?

⁴ Engdi bekord el 40 el rak er a uchei er a lomuchel a uriul el sils e a kekerei el cheldebechel er a Rekristiano er a beluu er a Pennsylvania, U.S.A., a mlo dmak e mlo blak a rengrir el mesuub er a Biblia el osiik er a mera el klemedengei. (2 Timothy 3:1) Te mle okedongall el Remesuub er a Biblia, e tirkang a mle ngariou a rengrir el chad el kmal mle sorir el meruul a soal a Dios. Tirkang a dimlak el “mellomes a rengrir ma re ngar ngii a skulir” el lulsaod er tir a Jesus el kmo ngdiak el sebechir el mo omtab a klemerang er a Biblia. (Mateus 11:25) Tirka el Remesuub er a Biblia a mle kerekikl el menguiu, mesuub, e dirrek el millebedebek a Bades e meluluuch el olengit er a ulekrael er a Dios. Te ulemekesiu a kakerous el bades er a Biblia, e milsuub a babilengir a rebebil el tir a dirrek el ulsiik a klemerang er a Biblia. Cherengel a taem, e tirka el chad a siluub a betok el klemerang el tekoi el rechad a dimlak lodengei el betok el rak.

5. Ngera uchul me a Remesuub er a Biblia a milluches er a tract el The Old Theology?

⁵ A Remesuub er a Biblia a mle dmeu a rengrir el kirel aike el tekoi el lulsuub engdi ngdimlak lousimang el kirel a klemedengei er tir. Te mle medengei el kmo aika el klemerang el tekoi a dimla llechukl er a Biblia. Me ngdimlak louchais er a rebebil el kmo te mla metik a beches el tekoi. (1 Korinth 8:1) Te bai liluches a tract el The Old Theology el lolengeseu er a rechad el mesuub el kirel a klemerang er a Biblia. Me aike el kot el tilobed el tract a ngilsuterir a rechad el mesuub er a Biblia me bo el sebechir el oltngakl a “rokui el klsuul el osisecheklir a rechad” e mo kongei a klemerang el osisecheklel a Jesus me a rechapostol.​—The Old Theology, No. 1, April 1889, 32 el llel.

6, 7. (a) Ngera el klemera el tekoi a bla lesuub a Resioning er a Jehovah er sera 1870 el mei? (b) Ngera el klemera el tekoi a kmal mlo ungil a rengum el suubii?

⁶ Ngar er aike el rak er a 1870 el mei er chelechang, e a Resioning er a Jehovah a mla suub a betok el klemerang el tekoi.a Me sel dosuub aika el klemerang, e ngdiak di dosuub a mera el tekoi e lemerekong, e kede bai mesuub a betok el ungil el tekoi el sebechel el remuul a klengar er kid el mo ungil. Aika el tekoi a rullid el mo dmeu a rengud e dirrek el mo er ngii a omeltked el kirel a ngar medad el klebesei. Ngdirrek el ngosukid el mo medengelii ngike el betik a rengul er kid el Dios el Jehovah, me aike el soal a doruul el tekoi. Ngouchais er kid el kmo ngtechang a Jesus, e ngera uchul me ngmlei er tia el chutem e mlad, e ngerang meruul er ngii er chelechang. Me aika el tekoi a ngosukid el mo medengelii a uchul me a Dios a omechei a mekngit el tekoi me ngduubech, e ngera uchul me kede mad, e mekerang a doluluuch, e dirrek el kede mekerang e mo dmeu a rengud.

⁷ Ngmla mo sebeched el medengei a belkul a ulaoch el ngii a mle “berotel” el betok el rak e toutang er chelecha el taem er a ulebongel. (Daniel 12:9) Betok er aika el ulaoch a medung er a Evangkelio me a dirrek el babier el Ocholt. El ua tiang, a Jehovah a mla ngosukid el mo medengei a tekoi el mileketmokl er a eanged el ngii a diak el sebechir a rechad el mes. Kede medengei el kmo a Jesus a mla mo King, e mla er ngii a mekemad er a eanged, e a Satan a ulebidokl el mei er a beluulechad. (Ocholt 12:7-​12) A Dios a dirrek el mla ngosukid el mo medengei a belkul a tekoi el sebeched el omes. Kede medengei el kmo ngera uchul me ngngar er ngii a mekemad, desiu, secher, bosech er a kall, me sel uchul me a rechad a di meruul a mekngit el tekoi el rullii a taem el dekiei er a chelsel me ngngar “ngii a ringel er ngii.”​—2 Timothy 3:1-5; Lukas 21:10, 11.

8. Ngtecha Ngike el uchul me kede mla mo medengelii a klemerang?

⁸ A Jesus a dilu er a rulebengkel el kmo: “Kom ngeltengat el omes a ikel tekoi el momes! Ak subedemiu el kmo te betok el profet ma re king a mle sorir el mes a ikel cho momes e dimlak el sebechir, e mle sorir el remenges cho morrenges, e dimlak le renges.” (Lukas 10:23, 24) Kede medengelii a belkul tia el tekoi er chelechang. A Jehovah el Dios a ngike el uchul me ngsebeched el ‘omes’ e ‘orrenges’ e mo medengelii a klemerang. Ngkmal dmeu a rengud e le ngousbech er a oureor el klisichel el mo omekrael er kid el mo “medengei a rokui el klemerang”! (Monguiu er a Johanes 16:7, 13.) Me lak dobes el kmo a klemerang a kmal mekreos me ngkired el ngosuterir a rebebil el mo mesuub el kirel.

“A REBETOK” A KONGEI ER A “MERA EL KLEMEDENGEI”

9. Ngera el okedong a mla er ngii er a Watch Tower er a April 1881?

⁹ Ngar sel Watch Tower er a April 1881, el eru el rak er a uriul er a lomuchel el oltobed er tia el magazine, e ngmla er ngii a suobel el kmo “Aki olengit er a 1,000 el chad el mo omerk er a klumech.” Tia el suobel a ullengit er tirke el sebechir el mo pioneer e ousbech er a klou el temir el kirel a berkel a klumech. Te mlodurech el mo er a bek el beluu el osiik er a remelemalt a rengrir el Kristiano el betik a rengrir er a Dios engdi ngdiak lodengelii a klemerang er a Biblia, e mo olisechakl er tir el kirel a Dios me a Tekingel.

10. Te milekerang a rechad er a lechiuii a okedong el kirir a 1,000 el chad el omerk er a klumech?

¹⁰ Me a Remesuub er a Biblia a ullengit er a rechad el mo omerk er a klumech e le te mle medengei el kmo a remera el Kristiano a kirir el meruul er tia el ureor. Sel taem e te di mle mekesai el dart el chad a mlo er aike el miting er tir, me ngdimlak el betok el chad a kilengei er sel okedong. Engdi ngmla er ngii a rechad el milenguiu a tract me a magazine e mlo medengei el kmo te mla metik er a klemerang, me ngmlo sorir el olengeseu er a rebebil. El ua tiang, sera rak er a 1882 e a chad er a London, England el milenguiu er a Watch Tower me a lmuut el ta er a babier a milluches el kmo: “A kulengit me mochotii er ngak a rolel a bo kumerk er a klumech me a tekoi el bo kulekoi me bo kuruul a ureor el Dios a soal a lemeketmokl.”

11, 12. (a) Ngerang a mle moktek er a repioneer? (b) Te milekerang a repioneer e mekdubech a beches el ongdibel?

¹¹ Ngar er a rak er a 1885, e te mla er ngii a rebekord el 300 el pioneer. A moktek er tir a mle sorir el meruul er a remo oltirakl er a Jesus Kristus el di uai kid er chelechang. Engdi ngkuk mle ngodech a rolel a loruul er tia el ureor. Kid er chelechang a mesuub el obengkel a di ta el chad, e melisiich er ngii el mei er a miting er a ongdibel. Engdi tirke el pioneer er a ngar er a mong a milsuub el obengterir a rebetok el chad er a osisiu el taem. Te mirrous a babier e milengemedaol er a resemeriar el mo kldibel e mesuub er a Biblia. Me ngoeak tiaikid el rolel e a repioneer a milekdubech a beches el ongdibel el lulemekedong er ngii el class.

¹² El ua tiang, sera rak er a 1907 e a rebebil el pioneer a mlo er a ta el beluu el mo osiik er a rechad el ulebang a babier el Millennial Dawn (el dirrek el okedongall el Studies in the Scriptures.) Me sel lebetik er tir e te mengemedaol er tir el mei er a miting er sel Sandei el mo er ngii er a blil a ta er tirke el semeriar el chad. Seikid el Sandei e a ta er a pioneer a mo otebedii a cheldecheduch el mesaod er a moktek er a Dios el kirel a beluulechad el ta el sils. E a ongingil el Sandei e ngmelisiich er tirke el mlei er a miting me te melemolem el oumiting er a bek el blsechel. Me sera rak er a 1911, e a rudam a millasem er a kuk ta er a rolel a lomerk er a klumech. Me a re 58 el rudam a mirrael el mo er a kakerous el beluu er a Merikel me a Canada el oltobed a cheldecheduch el mo er a buai. Te milluches a ngklir me a address er tirke el semeriar el chad el mlei er aike el miting, e ulemii er tir el mo derta el cheldellir a rechad e mo oumiting er a blil a ta er tir. Me tiaikid a mlo rolel e te mekdubech a beches el ongdibel. Me sera rak er a 1914, e ngmla mo er ngii a 1,200 el ongdibel er a Remesuub er a Biblia el meliuekl er a beluulechad.

13. Ngera uchul me ngmechas a rengum er a rolel a lemeketmokl a ureor er a berkel a klumech?

¹³ Chelecha el taem e te ngar er ngii a rebekord el 895,800 el pioneer el mesiou er a chelsel a bekord el 109,400 el ongdibel el meliuekl er a beluulechad. Me ngbekord el eai el miliol el chad a mla kongei er a “mera el klemedengei” e oltaut er ngii er a chelsel a klengar er tir. (Monguiu er a Isaia 60:22.)b Tia el klou el ildois a kmal mengasireng el tekoi, e le Jesus a ulemlaoch el kmo a rebetok el chad a mo ouketui er tirke el oltirakl er ngii, e mo oldechelakl er tir, mengelebus er tir, e dirrek el omekoad er tir. (Lukas 21:12-​17) A Satan me a rechanghel er ngii me a rebetok el chad a melasem el merrob er a ureor er a berkel a klumech, engdi a rechedal a Jehovah a melemolem el meruul er a remo oltirakl er a Kristus. Me chelechang e te olisechakl er a “beluulchad el rokir” el ngar er a kot el mekeald el beluu el mo er a kot el mekelekolt, el mo er a rois, me a cheliliik el beluu me a chelsel a mats me aike el basio el di mekesai a rechad er ngii. (Mateus 24:14) Me ngdi okiu a ngelsuil a Jehovah e ngmo sebechel el meketmokl aika el tekoi.

A MERA EL KLEMEDENGEI “A MO KLOU”

14. Ngmekerang a babilenged e mla merkii a mera el klemedengei?

¹⁴ Ngmla oberk a “mera el klemedengei” e le rebetok el chad a omerk er a klumech. Ngdirrek el mla oberk el okiu a babier me a magazine. Sera July 1879, e a Remesuub er a Biblia a ultebedii a kot el Watchtower magazine, el mle okedongall el Zion’s Watch Tower and Herald of Christ’s Presence. Te uluusbech er a kombalii el oltobed a kot el 6,000 er aike el magazine el tekoi er a Merikel. E sel taem e a Charles Taze Russell a dirk mle 27 a rekil, e mlengilt el mo oungerachel er tia el ureor el obengterir a reteim el odam el tir a ullengeseu el meluches a suobel er a chelsel aika el magazine. Me chelechang e aki oltobed a 42,182,000 a ildisel el Watchtower er a bek el buil el ngar er a 195 el bedengel a omelekoi. Me tiang a kot el betok a ildisel el babier el merous el meliuekl er a beluulechad. E a ongerung a magazine el Awake! Aki dirrek el oltobed er ngii el 41,042,000 a ildisel er a bek el buil el ngar er a 84 el bedengel a omelekoi. Ngdirrek el ngar er ngii a bekord el 100 el miliol el babier me a Biblia el motobed er a bek el rak.

15. Kede ngmai a udoud er ker el meruul e oltobed a babier?

¹⁵ A udoud el usbechall el kirel tia el ureor a mei el okiu a tengetengir a rechad. (Monguiu er a Mateus 10:8.) Me tirke el oureor er a kombalii el meruul a babier a mechas a rengrir e le te medengei el kmo a mesil, babier, ink, me a lmuut el bebil er a klalo a kmal meringel a cheral. Me a odam el oureor el omechar a klekedall el ousbech aika el mesil er a Bethel a melekoi el kmo, sel lemei er a Bethel a rechad er a siobai e te kmal mo mechas a rengrir er a tekoi el meketmokl el okiu a tengetengir a rechad. Te kmal mechas a rengrir el kmo ngsebeched el omechar a beches el mesil el oltobed a kmal betok el babier. Te dirrek el kmal mechas a rengrir el omes er a remekekerei el chad el dmeu a rengrir el oureor er a Bethel.

A BELUULECHAD A MO MUI ER A KLEMEDENGEI ER A DIOS

16. Ngera uchul me a Jehovah a mla merkii a “mera el klemedengei”?

¹⁶ A Jehovah a mla merkii a “mera el klemedengei” e le ng “soal a rokui el chad a bo lesobel e bo lodengelii a klemerang.” (1 Timothy 2:3, 4) Ngsoal a rechad a bo lodengelii a klemerang me bo el sebechir el mengull er ngii el ngar er a melemalt el rolel e le mukngeltengat. Me ngoeak a berkel a klumech e ngmla mengudel er a reblak a rengrir el ngellitel el Kristiano. Ngdirrek el mengudel er a “kloul seked” er a rechad er a “bek el beluu, ma kebliil, ma bek el bedengir a re chad ma omelekoi,” el tir a oba omelatk el mo kiei er a chutem el mo cherechar.​—Ocholt 7:9.

17. Ngolechotel a ngerang a klou el ildois er a rechad el mengull er a Jehovah?

¹⁷ A ildisir a remesiungel a Jehovah er a beluulechad a mla ngosechekl er aika el mereko el 130 el rak. Me tia el ildois a ochotii el kmo a Dios me ngike el meltutk el King el Jesus Kristus a melemolem el obengterir a rechedal el ngar tia el chutem el omekrael, omekerreu, omtebechel e dirrek el olisechakl er tir. Me a Jehovah a mla otutii a telbilel el kirel a berkel a klemerang er a taem er a ulebongel, me ngulterekokl a rengud el kmo ngmo otaut a telbilel el kirel a ngar medad el klebesei. “A beluu a mo mui er a klemedengei er a RUBAK el di ua ngouaol el mui er a daob.” (Isaia 11:9) Ka di molatk aike el betok el klengeltengat el sebechir a rechad el mo ngmai er seikid el taem!

[Aike el Footnote]

[Siasing el ngar er a 14 el llel]

A Remesuub er a Biblia a mle ngariou a rengrir el chad el mle sorir el meruul a soal a Dios

[Siasing el ngar er a 15 el llel]

A Jehovah a dmeu a rengul er a blakerreng er kau el omerk er a “mera el klemedengei” er a Dios