Ngkired el Mekerang Kid el “Mla Mo Medengelii a Dios”?

1. Ngera uchul me a pilot a ousbech er a babilengel el merriter er a skoki?

BEK el taem el bochu lomekall er a skoki a pilot, e ngkirel el kerekikl el mesang a skoki. Me ngar er ngii a babilengel el llechukl er ngii a rokui el tekoi el kirel el mes er a uchei, e le lsekum e ngdiak e ngar er ngii a techellel a skoki el mo metemall. Mo lmuut er a pilot el meketeketang el omekall a skoki me ngdirrek el kirel el kerekikl el omes er sel babilengel er a uchei.

2. Ngera el tekoi a kired el mes?

² Me ngdi ua sel babier el lousbech er ngii a pilot, kid me ngdirrek el ngar er ngii a tekoi el kired el ungil el mes, a lsekum ngsoad el melemolem el blak a rengud er a chelsel a meringel el taem. Alta kede dirk miltecholb me a lechub e ngmla mo betok el rak, engdi ngdirk kired el merriter er a klaumerang er kid. A lsekum kede di omdasu el kmo ngmesisiich a klaumerang er kid, e a meringel el blekeradel er a klengar a sebechel el mo uchul e kede oridii a ungil el deleuill er kid me a Jehovah. A Biblia a mengelechel er kid el kmo: “Ngikel omdasu el kmo ng mesisiich el dechor, bo le kerekikl me lak bo lubuu.”​—1 Ko. 10:12.

3. Ngera mle kirir a Rekristiano er a Galatia el meruul?

³ A olubet el tengetengel a Jesus a milsterir a techellir a Rekristiano el mo medengelii a Dios el okiu a kuk ta er a rolel, e le ngmo sebechir a rechad el mo ngelekel a Dios! Engdi Rekristiano er a Galatia a mle kirir el melemolem el merriter a klaumerang er tir. (Gal. 4:9) A rebebil el ngar er a chelsel a ongdibel a millekoi el kmo a Rekristiano a mo melemalt el chad a lsekum te oltirakl er a Llach er a Moses. Engdi Dios a dikea lousbech er a Llach er a Moses, me a Rechisentael el mla er a ongdibel a dimlak a ta el lengar er cheungel sel Llach! A Rechijudea me a Rechisentael a mle kirir el omekeroul er a klaumerang er tir. Te mle kirir el mo medengei el kmo a Dios a dikea longerechir er a rechedal el mo oltirakl er a Llach er a Moses.

A ROLEL E KEDE MLO MEDENGELII A DIOS

4, 5. Ngera el omellach a ledillii a Paulus el mo er a rechad er a Galatia? E ngera uchul me a babilengel a klou a ultutelel el kired?

⁴ A babilengel a Jehovah el ledilu er a apostol el Paulus me ngmeluches er ngii el mo er a rechad er a Galatia a omeklatk er a rokui el Kristiano me lak longemikr er a klemerang er a Biblia el bla lesubii. Ngkmal diak el kired el lmuut el mo meruul aike el tekoi el bla dechoit. Me tia el babier a sebechel el ngosukid el rokui el mo melemolem el blak a rengud.

⁵ Kid el rokui a kmal diak el kired el obes er sel taem er a detibir el mo mesiou er a Jehovah. Ka molatk aika el eru el ker: Ke dirk medengei a tekoi el murruul el ngilsukau el mo kltmokl el kirel a techolb? Ke dirk medengelii sel rolel e ke mlo medengelii a Dios, e mlo uangerang a uldesuem er a obo modengelii?

6. Kede mo mesuub el kirel a ngerang?

⁶ Ngar er ngii a etiu el bakes el dengilai er sera be desiseb er a klemerang. (Momes er a baks el “Aike el Bakes el Dengilai me Bo Dodengelii a Dios a Sebechel el Ngosukid el Olengeriakl.”) Ngsebeched el omes aika el bakes el ua tekoi el dousbech el melisiich er a klaumerang er kid, me lak deluut el mo meruul a tekoi er tia el beluulechad. El di ua pilot el blechoel el omes er a babilengel e merriter er a skoki er a uchei er a bo lomekall er ngii.

TIRKE EL LODENGELTERIR A DIOS A MELEMOLEM EL OLENGERIAKL

7. Ngera el osisechakl a kired el oltirakl? Ngera uchul me ngkired el merriter er a otirekled er a klemerang?

⁷ Ngkired el kerekikl el merriter er a klaumerang er kid el di ua pilot el kerekikl el omes er a babilengel er a uchei er a bo lomekall er a skoki. A Paulus a milluches el mo er a Timothy el kmo: “Moltirakl er sel melemalt el osisecheklel a Ungil Chais el bla mrengesii er ngak, e molemolem el oumerang e moubltikerreng el oltirakl er a Kristus Jesus.” (2 Ti. 1:13) Me aike el ‘melemalt el osisechakl’ a debetik el ngar er a Tekingel a Dios. (1 Ti. 6:3) A beot el omesodel a tekoi a sebechel el meketakl a uldesued. Me ngdi osisiu a ‘melemalt el osisechakl’ a ngosukid el mo medengei a tekoi el soal a Dios a doruul. Kede mo mesaod aike el tekoi el deriruul er a uchei er a bo demetecholb, me bo el sebeched el mesang el kmo ngua ngerang a otirekled er a klemerang.

8, 9. (a) Ngera uchul me ngkired el melemolem el omekeroul er a klemedengei me a klaumerang er kid? (b) Ngera uchul me tiang a klou a ultutelel? Ngera me ngua okurulel a kerrekar?

⁸ A kot el bakes el durruul er ngii a milsuub me kede mlo oumerang. Engdi ngkired el melemolem el omekeroul er a klemedengei er kid e melisiich er a klaumerang er kid. (2 Th. 1:3) Me a uriul er a denguu a techolb e ngdirk kired el melemolem el olekes e melisiich er a deleuill er kid el obengkel a Dios.

⁹ Ngdi ua rolel a lemukeroul a kerrekar. Ngkmal mengasireng a okurulel el ileakl a lsekum e ngmesisiich a risel el kerrekar. El ua bebil er a klebokel el sidar er a Lebanon el sebechel el mukeroul el mo ua telongklel a 12 el chellibel el blai. Ngkmal mo imis el meklou el sebechel el mo 40 el fit a meklungel a chelechedal. (Sal. 5:15) Ngkmal mereched a okurulel er a uchelel, engdi sel lomerk a risel el mo cheroid e a chelechedal a merael el mo klou e metongakl. Seikid e ngmo meringel er kid el mesang el mukeroul. Me ngdi osisiu el blekeradel el kirel a okurulel a klaumerang er kid el Kristiano. Ngsebeched el ngmodech a betok el tekoi er a klengar er kid er sel taem el domuchel el mesuub er a Biblia, e bo demetecholb. A rechad er a ongdibel a sebechir el mesang a okurulel a klaumerang er kid. Alta e kede locha mo pioneer me a lechub e ngmo er ngii a ngerecheled er a ongdibel. Engdi cherengel a taem e nglocha mo meringel er a rechad el mesekid el olengeriakl. Me kede rokui el kired el melemolem el omekeroul er a klaumerang er kid el mo lmuut er a de “mukeroul el mo ultebechel el chad” er a tekingel a Dios. (Efe. 4:13) Me sel dolengeriakl er a omesiunged e kede di ua kekerei el tane el mukeroul el mo klou e mesisiich el kerrekar.

10. Ngera uchul me a Rekristiano a kirir el melemolem el omekeroul er a klaumerang er tir?

¹⁰ A okurulel a klaumerang er kid a kirel el melemolem. A klemedengei er kid er a Tekingel a Dios me a klaumerang er kid a ua rais el melisiich er kid me ngdiak demesmesim. Ngii el rais a kirel el di melemolem el mesisiich. (Osi. 12:3) Te betok el rudam me a rudos a melemolem el omekeroul er a klaumerang er tir. A ta el odam el mla mesiou el ta er a remechuodel el betok er a 30 el rak a melekoi el kmo, ngdirk omekeroul er a klaumerang er ngii e kmal oba omereng el saul el kirel a Biblia er chelecha el taem. Ngdirk melemolem el mesuub a beches el rolel e ngsebechel a Biblia el ngosuir el mo ungil el melilt a tekoi, e dirrek el omekeroul er a deuil a rengul er a omesiungel.

MOLEKES ER A DELEUILL ER KAU ME A DIOS

11. Kede mekerang e melemolem el olekes er a deleuill er kid me a Jehovah?

¹¹ A lsekum ngsoad el omekeroul er a klaumerang er kid e ngkired el olekes er a deleuill er kid me a Jehovah. Ngkmal soal a bo dolechesuar a ulekerreu me a bltikerreng, el di ua ngalek el melechesuar a bltkil a rengul a demal me a delal sel lomechull er ngii, me a lechub e ngua sel uldesued sel dobengkel a kmal kmeed el sechelid. Me nguaisei, engdi ngusbechall a klou el taem me a blakerreng el rullid el mo melechesuar a ulekerreuil me a bltkil a rengul a Jehovah. Me bo deblechoel el menguiu er a Biblia er a bek el sils. E donguiu a bek el babilenged, buk me a brochure el lomeskid a Jehovah. Tiaikid a ngosukid el mo ungil el medengelii e dirrek el smisichii a ungil el deleuill er kid me ngii.

12. Ngkired el mekerang a lsekum ngsoad el melisiich er a deleuill er kid me a Dios?

¹² A nglunguched me a ungil el klausechelei er kid a dirrek el sebechel el ngosukid el smisichii a deleuill er kid me a Dios. (Monguiu er a Malakai 3:16.) A Jehovah a “orrenges a nglunguchir” a resechelil, el di ua ungil el chedam el orrenges a lengelir a rengelekel. (1 Pe. 3:12) Me ngkired el melemolem el meluluuch el mo er ngii. (Rom 12:12) Ngdiak el sebeched el melemolem el sechelil a Dios a lsekum e ngdiak denguu a ngelsuil. Sel bo lak doluluuch el mo er ngii e kede mo mechitechut. Me ngsebechel el mo mechitechut a rengud el mekngit el blekeradel er a beluulechad a uchul me a lechub e kede mekesuseu el mo er a mekngit el omeruul. Engdi a Dios a kmal kongei el olengeseu er kid a lsekum kede olengit a ngeso er ngii. Me kau, ke meluluuch el mo er a Jehovah el ua omongedecheduch er a kmal kmeed el sechelim? Ngar er ngii a tekoi el sebechem el meruul me lluut el mo ungil a nglunguchem?​—Jer. 16:19.

13. Ngera uchul me ngkired el mo er a bek el miting a lsekum ngsoad el melisiich er a deleuill er kid me a Dios?

¹³ Ngkired el melemolem el ngar er a ongdibel el teloi er tirke el sechelil a Jehovah. Ngbetik a rengul er tir e le te mo er ngii el kirel a osebechakl. (Nah. 1:7) A beluulechad a kmal mekngit a uchul me ngkired el kmeed er a rudam me a rudos er kid e kaingeseu el kasisiich. Te melisiich er kid el mo oubltikerreng el mo er a rechad e ‘meruul a ungil.’ (Heb. 10:24, 25) Ngdiak el sebeched el otireklii a tekingel a Paulus a lsekum ngdiak debo er a ongdibel. Me bo deblechoel el mo er a bek el miting e donger aike el ker el meketmokl er a temel a miting.

14. Ngera uchul me ngdirk kired el kongei el obult e melodech a blekerdeled?

¹⁴ Sera dekot el mo Kristiano e ngmle kired el ouuchel er a rengud e obult e mo diak doruul aike el mekngit el omerelled. Engdi ngdirk kired el kongei el obult e melodech a blekerdeled. Kid el diak demecherrungel e ngar er ngii a chelitechetud, a uchul me ngbeot er kid el meruul a klengit. Me a klengit a di ua bersoech el soal el omangch er kid er a bek el taem. (Rom 3:9, 10; 6:12-14) Me ngdiak el sebeched el omdasu el kmo ngdiak a chelitechetud. A Jehovah a oba kllourreng el bedulkid sel doureor el mengoit a mekngit el blekerdeled. (Fil. 2:12; 2 Pe. 3:9) Me mousbech a temem me a klisichem el mesiou er a Jehovah e lak di molemolem er a rengum. A ta el odos el mlukeroul er a klemerang a ulemdasu el kmo ngkmal diak el sebechel el odeuir a rengul a Jehovah e dirrek el mle kirel el mo medakt er ngii. Ngdimlak a ungil el deleuill er ngii el obengkel, e mirruul a betok el klengit. Ngdilu el kmo, “Ngmle betik a renguk er a Jehovah, engdi ak mirruul aikang e le ngdimlak kungil el medengelii.” Me ngmilluluuch el olengit a ngeso er a Dios, e ulemuchel el melodech a blekerdelel. Ngdilu el kmo, “A Jehovah a ulemekrael er ngak el ua ngalek, e a cherengel a taem e ngilsukak el mo mesisiich er a bek el mondai er ngak, e milekekokil el olecholt er ngak aike el mle kirek el meruul.”

15. A Jesus me a Jehovah ngdmeu a rengrir el omes a ngerang?

¹⁵ A anghel er a Dios a dilu er a Petrus me a rebebil el apostol me lolemolem el ouchais er a ungil chais. (Rel. 5:19-21) A omesiunged er a bek el sandei a ta er aike el tekoi el kired el kerekikl er ngii me lolemolem el mesisiich a klaumerang er kid. A Jesus me a Jehovah a ungil medengei a klaumerang er kid e dmeu a rengrir el omes aike el tekoi el doruul er a omesiunged. (Och. 2:19) A omesiunged a kirel el mo klou a ultutelel el tekoi er a klengar er kid.

16. Ngera uchul me ngkired el blechoel el melatk er sel telbilel a rengud?

¹⁶ Bo blechoel el melatk er sel telbilel a rengum. A deleuill er kid me a Jehovah a kot el klou a ultutelel el tekoi, e Ngii a ungil el medengelterir a rechedal. (Monguiu er a Isaia 44:5.) Ngoeak a nglunguuch e morriter er a klisichel me a delechel a deleuill er kau me a Jehovah. Molatk er a taem el blo metecholb, e lak mobes el kmo tia ngdilubech er oingerang. Sera obo metecholb e ke ulechotii el kmo ke mla tibir a rengum el mo er a Jehovah. E tia sel kot el klou a ultutelel el telbiil el mrellii er a klengar er kau.

KEDE OUSBECH ER A DUCHERRENG ME DEKEED ER A JEHOVAH

17. Ngera uchul me ngkirel el meduch a rengud me dekeed er a Jehovah?

¹⁷ A Paulus a millisiich er a rechad er a Galatia el mo meduch a rengrir. (Gal. 6:9) Me kid, me ngdirrek el ngar er ngii a mondai er kid a uchul me ngkirel meduch a rengud el outekangel, e a Jehovah a olengeseu er kid. Me dolemolem el olengit er a chedaol klisichel a Dios, me lengesukid el mo er ngii a deurreng me a budech er a rengud alta e ngdiak bo lak a mondai er kid. (Mt. 7:7-11) Ka molatk er tiang: A Jehovah a omekerreu a suebek el charm, engdi ngkmal betik a rengul er kau el kuk ngaruchei er a suebek el charm. Ngsoal el omekerreu er kau e le ngbetik a rengum er ngii, e dirrek el mla tibir a rengum el mo mesiou er ngii. (Mt. 10:29-31) Me lak bo lemechitechut a rengum el mo lmuut er sel bo mchelebangel a meringel el tekoi. Lak bo mcheroid er a klemerang el ike el tekoi el mchiloit er a uchei a uchul. Kede chelebangel a kmal betok el klengeltengat e le ngmla mo medengelkid a Jehovah.

18. Ngera kirir a rokui el chad el medengelii a Dios el meruul er ngii?

¹⁸ Ngkirem el mekerang er chelechang alta e ke meketeketang me a lechub e ke dirk miltecholb? Molemolem el omekeroul er a klemedengei me a klaumerang er kau el kirel a Jehovah. Bo mkerekikl e lak momdasu el kmo ke mla mo medengelii a Jehovah me ngdiak a belkul el molekes er a deleuill er kau me ngii. Bo blechoel el melatk aika el bla desaod me bo el sebechem el melemolem el okesengii a deleuill er kau me a Jehovah el ngii a betik a rengul el Chedam, Sechelid, e Dios er kid.​—Monguiu er a 2 Korinth 13:5, 6.