“A Rengedem Le Mei” Engdi Tia Ngoingerang?

1, 2. (a) Ngera sebechel el rullii a chad el mo diak el ungil el omtab a tekoi? (b) Ngera kede medengei el kirel a Rengedel a Dios?

KE LOCHA mla mtebengii el kmo ngblechoel el kakerous a omesodir a rechad el kirel a tekoi el dilubech. Ngdirrek el sebechel a chad el obes a bebil er a tekoi el ledilung a toktang er a uriul er a lesbedii er a rektel. E dirrek el sebechel el mo meringel er a chad el metik a kisel me a lechub e ngklas er ngii, alta e ngdi ngar medal. Ngera uchul me nguaisei? A remesuub a tekoi a kmo a rechad a sebechir el mo diak lutab a tekoi sel sekum e te melasem el meruul a betok el tekoi er a ta el taem. Me a no er a bdelud a ulebeob el kirel el di omtab er a chimo el tekoi er a ta el taem.

² A rebetok el chad er chelechang a diak el sebechir el ungil el omtab a tekoi el dubechang er a beluulechad. Te locha kongei el kmo a beluulechad a kmal mla mengodech er sera 1914 el mei, engdi ngdiak lodengelii a uchul. Kid el mesuub a Biblia a medengei el kmo a Rengedel a Dios a mlo er ngii er a rak er a 1914 er sel taem el Jesus a mlo King el ngar er a eanged. Engdi sel nglunguuch el kmo, “A Rengedem le mei; bo le motaut a soam er a beluulchad el ua ingii er a eanged” a dirkak bo el cherrungel el monger. (Mt. 6:10) Tia el nglunguuch a mo monger sel bo lemokngemed tia el mekngit el beluulechad. E seikid e ngmo sebechel a soal a Dios el meketmokl er a chutem el di ua omerellel er a eanged.

3. A omesubed er a Biblia ngosukid el mo omtab a ngerang?

³ Kid el blechoel el mesuub er a Tekingel a Dios a uchul me ngsebeched el mtebengii el kmo a ulaoch a di toutang er chelechang. Tiang a kmal ngodech er a uldesuir a rebetok el chad! E le te kmal mechesang er a klengar er tir me ngdiak lesa bleketakl el olechotel a kmo, a Kristus a mla mengedereder el ulemuchel er a rak er a 1914 el mei, e di kmedu el mo okngemedii tia el mekngit el beluulechad. Me di lekau el oker: ‘Ngak ak dirk oumerang el kmo a blekeradel er a beluulechad a ochotii el kmo a ulebongel a kmal kmedang?’ Me a lechub e ke dirk mlo Sioning, ngera sel kot el klou a ultutelel el tekoi er a klengar er kau? Me bo dosaod a edei el meklou a ultutelel el uchul me kede medengei el kmo, ngdi kmedung e a soal a Dios a mo meketmokl er tia el chutem.

A RECHAD EL NGAR ER A UOS A MLA MEI

4, 5. (a) Ngerang mla meruul er ngii a Jesus el ulemuchel er a 1914? (Momes er a siasing er a uchelel a suobel.) (b) A retedei el chad el ngar er a uos te omtechei er a ngerang? Ngmilekerang e motaut tia el ulaoch?

⁴ Sera rak er a 1914, e a Jesus Kristus a ngiluu a krone er sera bo el King er a Rengedel a Dios. Me a ulaoch er a 6 el bliongel er a Ocholt a mesaod er a Jesus el ngar bebul a becheleleu el uos. Uriul er a bo el King, e ngdi mle mereched el mechelii a urerel el mo olekngemed er a mekngit el beluulechad er a Satan. (Monguiu er a Ocholt 6:1, 2.) Tia el ulaoch a dirrek el ulechotii el kmo, a blekeradel er a beluulechad a kmal mo mekngit er a uriul er a lomuchel el mengedereder a Rengedel a Dios. A mekemad, bosech er a kall, rakt me a lmuut el bebil er a tekoi el uchul a kodall a mengal meleketek. Me a omesodel el kirir a retedei el chad el ngar er a uos el merael ullel a Jesus Kristus a omtechei aika el tellemall.​—Och. 6:3-8.

⁵ Me ngdi ua lullekoi tia el ulaoch, ngmla meleketek “a mekemad er a beluulchad,” alta e a betok el beluu a tilbir el mo dmak el oureor e meruul a budech. Me a Kot el Mekemedil a Beluulechad a di ta er aike el meklou el mekemad el mlo er ngii el uchul me ngdiak a budech er tia el beluulechad. Me alta ngkmal mla olengeriakl a tekoi er a keizai me a science er sera rak er a 1914 el mei, engdi a bosech er a kall a dirk ngar er ngii el uchul a uldikel er a bebil el beluu. E dirrek el bek el rak e te betok el miliol el chad a mad er a meringel el rakt, me a meklou el telemellel a beluu me a kuk bebil er a tellemall. Me alta e aika el tekoi a mla er ngii er a ngar er a mong, engdi chelechang e ngmla lmuut el mo mekdekudem, el uchul a kodellir a rekmal betok el chad. Ngsebechem el omtab a belkul aikang?

6. Te rua techang a ulemtab er a otutel a ulaoch er a Biblia, e te milekerang er sera lemotaut a ulaoch?

⁶ A rebetok el chad a mlo mechesang el melatk el kirel a Kot el Mekemedil a Beluulechad el dirk ulemuchel me a rakt el Spanish flu. Engdi a rengellitel el Kristiano a milengiil er a 1914 el ngii a mo ulebengelel a Taem er a Rechisentael me a lechub e ‘ngulebengelel a omerrederir a re diak loumera er a Dios.’ (Lk. 21:24) Ngdimlak lodengei el kmo ngera mo duubech, engdi te mle medengei el kmo ngmo er ngii a klou el tekoi el duubech er a Rengedel a Dios er a 1914. Me sera bo lungil medengelii a otutel a ulaoch, e te mlo bekeu el ouchais er a rechad el kmo a omengederederel a Dios a mla omuchel. Me te betok er tir a mle meringel el modechelakl. E tiang a dirrek el otutel a ulaoch el mildung er a Biblia. Me ngar er a chelsel aike el betok el rak er a uriul, e a recherrouel a Renged a uluusbech a llach el oukerrekeriil, e milengelebus, e dirrek el milengelebed e ulemekoad er a rebebil er tir el melasem el merrob er a ureor er a berkel a klumech.​—Psa. 94:20; Och. 12:15.

7. Ngera uchul me a ruumesingd el chad a diak lomtab a belkul aike el dubechang er a beluulechad er chelechang?

⁷ Ngera uchul me a ruumesingd el chad a diak leues aika el betok el olechotel a kmo a Rengedel a Dios a mengedereder el ngar er a eanged er chelechang? Ngera uchul me ngdiak el sebechir el mtebengii el kmo a blekeradel er a beluulechad a oltaut er a ulaoch er a Biblia el di ua losaod a rechedal a Dios el mla mo betok el rak? Te di kerekikl el omes aike el sorir? (2 Ko. 5:7) Tirkang te kmal mechesang er a klengar er tir me ngdiak lomtab aike el loruul a Dios? (Mt. 24:37-39) A rebebil er tir te mechesang a uldesuir er aike el uldasu me a turrekong er tia el beluulechad er a Satan? (2 Ko. 4:4) Kede kmal ousbech a klaumerang me a sekutaberreng me bo el sebeched el ungil omtab aike el loruul a Rengedel a Dios. Ngkmal dmeu a rengud e le kede medengei a belkul a tekoi el dubechang er chelechang!

A CHELEBIRUKEL A DI MELEKETEK

8-10. (a) Ngokiu a ngera el rolel e a 2 Timothy 3:​1-5 a mla tmaut? (b) Ngera uchul me kede kongei el kmo a chelebirukel a di meleketek?

⁸ Ngar er ngii a ongeru el uchul me kede medengei el kmo ngdi kmedung e a Rengedel a Dios a mo mengedereder er tia el chutem: A beluulechad er chelechang a lmuut el kmal mla mo mekngit a blekeradel er a chelsel e di meleketek. Ngar er a chelsel aika el mereko el 100 el rak, e kede mla mesa otutel a ulaoch er a 2 Timothy 3:1-5. A omeruul el lobasech er tia el bades a mla oberk er a beluulechad el rokir. Me kau ke kongei er tia el tekoi? Me bo dosaod a bebil el olechotel.​—Monguiu er a 2 Timothy 3:1, 13.

⁹ Momekesiu aike el tekoi el mle mechas a rengrir er ngii a rechad er aike el rak er a 1940 me a 1950 er a tekoi el duubech er a chelsel a ureor, tekoi er a ongelaod, sports me a bail me a besiich er chelechang. A kmal kdekudel el omeruul me a mekngit el rolel a deleboes a mengal mla meleketek. Me a rechad a melasem el mengas a rengrir a rebebil sel loruul a kmal mekngit e mekikiongel el tekoi. A prokuram er a TV el lulemdasu a rebetok el kmo ngmekngit er aike el rak er a 1950 a lomes er chelechang el ua di lungil el kirel a telungalek. A rebetok a mla mtebengii el kmo a remengolchotaor a kmal mesisiich a omengesuseu er tir el okiu a tekoi er a ongelaod me a rolel a loubail e lomesiich er tir. Te dirrek el mla mo bekeu el di chemolt er a buai. Kede kmal ngeltengat e le kede medengelii a uldesuel a Dios el kirel a chouaika el tekoi!​—Monguiu er a Jude 14, 15.

¹⁰ Ka momekesiu aike el mekngit el blekerdelir a rengalek er a ngar er a mong me a rengalek er chelecha el taem. El ua tiang, ngar er aike el rak er a 1950, e a ruungalek a mle bekikl er a rengelekir a bo lolamech a dekool, e lolim a rrom, me a lechub e te meloik a mekikiongel el ngloik. Engdi chelechang e kede blechoel el orrenges a kdekudel el chais el ua ikang: A 15 a rekil el ngalek er a skuul a omoes el mekodeterir a reterung e tomelleterir a re 13 el ngalek er a skuul. A rebebil el cheltelaol el mekekerei el buik a milekodir a etiu a rekil el ngalek el redil e odelecheklii a demal me a ta er a chedal. A ta er a chais er a sesei el rak er a uchei a kmo, ngar er a ta er a beluu er a Asia e a remekekerei el chad a uchul a klou el ildois er aike el uldikel el dilubech er a chelsel aika el mereko el teruich el rak. Ngtechang a sebechel el melekoi el kmo ngdirk osisiu a blekeradel er a ngar er a mong me chelechang?

11. Ngera uchul me a rebetok a diak el sebechir el melechesuar el kmo a blekeradel er a beluulechad a di merael el mo mekngit?

¹¹ A apostol el Petrus a dilu el kmo: “Sel le mei a ikel uriul sils, e a re bebil er a re chad a me duum el di blekall er a ngelbesir. Te mo mededenguul er kemiu e oker el kmo, ‘Ng kor a dilu el kmo ng lmuut el mei? Me ng ngar ker? A re demmam a mla mad, e ngdi bek el tekoi a dirk osisiu er ser a lobeob a beluulchad el mer chelechang!’” (2 Pe. 3:3, 4) E tiang a mla tmaut el tekoi. Me ngera uchul me a rebebil a uaisei a blekerdelir? A tekoi el deblechoel el omes er ngii a sebechel el mo ua di tekoi er a bek el sils. El ua tiang, a lsekum a sechelid a di mle mereched el mengodech a blekerdelel, e ngulterekokl el mo mechas a rengud. Engdi a lsekum a blekerdelir me a omerellir a rechad a mekekokil el mengodech er a cherengel a taem, e ngmeringel er kid el mtebengii. Me a ngeldechel a omerellir alta ngdiak dekibetiekl er ngii engdi ngdirk klou a telemellel.

12, 13. (a) Ngera uchul me ngdiak el kirel el mo mechitechut a rengud er a tekoi el dubechang er a beluulechad? (b) Ngera mo ngosukid el outekangel aika el uriul sils?

¹² A apostol el Paulus a ulemeklatk er kid el kmo aike el uriul el sils a “mor ngii a ringel er ngii.” (2 Ti. 3:1) Me nguaisei, engdi ngdiak el belkul a kmo ngkired el osiik er a basio el bo domart er kid er ngii. Me alta e ngmo duubech a tekoi el rullid el mo mechitechut a rengud me a lechub e kede mo medakt, engdi ngsebeched el outekangel er ngii. Me ngokiu a ngeso er a Jehovah, me a chedaol klisichel, me a ongdibel er a Rekristiano, e ngsebeched el lomelemii a blakerreng er kid el mo er Ngii. E le Dios a mo meskid a “klou el klisiich.”​—2 Ko. 4:7-10.

¹³ A Paulus a ulemuchel er a ulochel el kirel a uriul sils er a ledu el kmo, “mutebengii tial tekoi el kmo.” Me aikang a oterekeklii el kmo tia el ulaoch a mo tmaut. Kede medengei el kmo a blekeradel er tia el beluulechad a di merael el mo mekngit el mo lmuut er sel taem el Jehovah a mo okngemedii tia el mekngit el blekeradel. Ngokiu a reksi er a klechad e kede mla suubii el kmo sel lsekum a ruumesingd el chad el ngar er a beluu a mo omuchel el meruul a mekngit e a beluu el rokir a sebechel el mo diak a klisichel e mo nguemed. Me chelechang, e a omerellir a rechad er a beluulechad el rokir a kmal mla mo mekngit. Me alta e a rebetok el chad a diak el sorir el omtab er a belkul tiang, engdi a blekeradel er sera 1914 el mei a oterekeklii el kmo a Rengedel a Dios a di kmedu el mo okngemed a rokui el mekngit el omeruul.

TIA EL TELECHEROLL A DIAK BO LAK

14-16. Ngerang a ongedei el uchul me kede oumerang el kmo a Rengedel a Dios a kmedu el mei?

¹⁴ A reksi er a rechedal a Dios a meskid a ongedei el uchul me ngulterekokl a rengud el kmo a ulebongel a kmedang. El ua tiang, uchei er a lomuchel el mengedereder a Rengedel a Dios el ngar er a eanged, e te mla er ngii a rengellitel el chedal el mle blak a rengrir el mesiou er ngii. Te milekerang er sera bo lak lemutaut a bebil er a uldesuir el kirel a rak er a 1914? A ruumesingd er tir a mle blak a rengrir el mesiou er a Jehovah e dirrek el uluutekangel a ringel me a odechelakl. Me a cherengel a taem, e te millemolem el blak a rengrir el mo lmuut er a kodall.

¹⁵ Ngar er a ulochel el kirel a taem er a ulebongel, e a Jesus a dilu el kmo: “Uche er a le ngemed a re chad er tial telecheroll e a ikal rokui el tekoi a mo duubech.” (Monguiu er a Mateus 24:33-35.) Kede medengei el kmo “tial telecheroll” el lulsaod er ngii a Jesus a uldimukl er ngii a eru el cheldellir a rengellitel el Kristiano. A kot el cheldellir a rengellitel a mle chad er a rak er a 1914 e miltebengii el kmo a Kristus a ulemuchel el mengedereder er seikid el rak. Tirka el ngellitel a mlengilt el okiu a chedaol el klisichel a Dios er a uchei me a lechub e ngsera rak er a 1914.​—Rom 8:14-17.

¹⁶ A ongeru el cheldellir a rengellitel el chedal “tial telecheroll” a mlengilt el okiu a chedaol el klisichel a Dios er sel taem er a dirk lekiei a rebebil el chedal sel kot el cheldellir a rengellitel. Me ngdiak el rokui el ngellitel el Kristiano er chelechang a chedal “tial telecheroll” el lulsaod er ngii a Jesus. Me chelechang, e tirke el chedal sel ongeru el cheldellir a rengellitel a chudelang. Engdi a tekingel a Jesus el medung er a Mateus 24:34 a oterekokl a rengud el kmo, “uche er a le ngemed” a rokui el chad er “tial telecheroll,” e ngmo omuchel a kloul ringel. Tia lmuut el smisichii a klaumerang er kid el kmo ngdi kmedung e a King er a Rengedel a Dios a mo okngemedeterir a remekngit e toketekii a beches el beluulechad el mui er a llemalt.​—2 Pe. 3:13.

A KRISTUS A DI KMEDU EL MO MESISIICH ER A MEKEMAD

17. Me ngera kede nguu er aika el tekoi el bla desaod?

¹⁷ Me ngera kede nguu er aika el ulaoch er a Biblia el bla desaod? Ngdi ua lullekoi a Jesus, ngdiak dodengelii a sils me a lechub e ngsikang el lemei a ulebongel. (Mt. 24:36; 25:13) Engdi kede medengei el kmo, ‘ng mla mo belsechel el kired el mekiis er a cheliuaiu’ el ua lulsaod er ngii a Paulus. (Monguiu er a Rom 13:11.) Me kid a kiei er a uriul sils er chelechang. Me a lsekum e kede mo kerekikl el omtab a ulaoch er a Biblia me aike el loruul a Jehovah el Dios me a Jesus Kristus, e kede mo mesa bleketakl el olechotel a kmo a ulebengelel tia el mekngit el beluulechad a kmal di kmedang.

18. Ngera mo duubech el mo er tirke el oltngakl er a King el Jesus Kristus?

¹⁸ Ngdi kmedung, e tirke el oltngakl er a omengederederel a Jesus Kristus, el ngii a Chad el ngar er a becheleleu el uos, a mo kongei el kmo te kmal cheleuid. Ngmo diak el sebechir el chemiis er a kerrekeriil el mo er tir. Me sel leduubech tia el tekoi e a rebetok a mo oldiu el kmo: “Ng techa sebechel el dechor el chobengelii?” (Och. 6:15-17) A 7 el bliongel er a Ocholt a meskid a nger er tia el ker. A rengellitel me a “kloul seked” a mo sebechir el “dechor,” e le te oba kengei er a Dios. E seikid e a “kloul seked” er a rengodech el sib a mo suobel er a taem er a kloul ringel e mo soiseb er a beches el beluulechad er a Dios.​—Och. 7:9, 13-15.

19. Kau el ulterekokl a rengum el kmo a ulebongel a kmedang, ke omes el beduluchei el kirel a ngerang?

¹⁹ A lsekum e kede mo kerekikl el omtab a ulaoch er a Biblia el toutang er chelechang, e ngmo diak demekesuseu er tia el beluulechad er a Satan. Kede dirrek el mo ungil medengei a belkul aika el tekoi el meketmeklang er a beluulechad. A Kristus a di kmedu el mo kats el oeak sel lokngemedii tia el mekngit el beluulechad er a taem er a mekemad er a Armakedon. (Och. 19:11, 19-21) Me ka di molatk er a deuil a rengud er sel taem!​—Och. 20:1-3, 6; 21:3, 4.