A Ker El Mla Er A Remenguiu
Ngsebechir a Rekristiano el melul er a remla mad el chederir?
Ngdiak a omesodel a Biblia el omtok er tia el omeruul.
Ngar er ngii a bebil el cheldecheduch er a Biblia el mesaod a cheklechir a rulekoad el chad el mildul. (Jos. 7:25; 2 Kr. 34:4, 5) Me tia locha mle ua lolechotel a kmo tirka el chad a mle mekngit me ngdimlak lerredemelel a mo medakl er a chutem. Me nguaisei, engdi a omeruul el melul er a mla mad el chad a diak el blechoel el uaisei a belkul.
Tiang a obeketakl el okiu a cheldecheduch el kirel a kodellel a King el Saul me a retedei el ngelekel. Tirka el teuang a mlad er a loumekemad er a rechad er a Filistia. Me a Jonathan el ngike el blak a rengul el sechelil a David a mle ta er tir. Me sera lerengesii tia el chais a rebekeu el chad er a Israel el kiliei er a Jabes el ngar er a Gilead, e te mlo ngmai a cheklechir el mei e dmul, e dmakl a chiuesir er a chutem. Me a uriul e a David a chilat er tirka el chad el mirruul er tia el tekoi.—1 Sa. 31:2, 8-13; 2 Sa. 2:4-6.
A Biblia a ochotii el kmo a Dios a mo olekiis er a rulekoad el lmuut el me ngar. Me alta e sel lemad a chad e ngmedul me a lechub e ngdiak, engdi a Jehovah a dirk sebechel el olekiis er ngii er a kodall e mebii a beches el bedengel. A King el Nebukadnesar a mle soal a bo lemedul er a ngau a retedei el blak a rengrir el buik er a Hebru, engdi tirkang a dimlak lemedakt el kmo a bo lemedul e ngmo diak el sebechel a Dios el olekiis er tir. (Dan. 3:16-18) Tirke el blak a rengrir el mesiungel a Jehovah el mlekelebus er a taem er a Nazi a dirrek el dimlak lemedakt er sera lomekoad er tir e bo lolul a cheklechir er a ngau. A rebetok el blak a rengrir el mesiungel a Dios a dirrek el mlad er a dub me a lechub e ngtellemall el uchul me ngdi mlo diak debetik a bedengir. Me nguaisei, engdi a Jehovah a ulterekokl el mo olekiis er tir er a kodall.—Och. 20:13.
A Jehovah sel lolekiis er a chad er a kodall e ngdiak el belkul a kmo ngkirel el ousbech er sel di mla bedengel el lmuut el omeob er ngii. E tiang a mocholt el okiu sel rolel e a Dios a olekiis er a rengellitel el Kristiano el mo kiei er a eanged. Tirka el Kristiano a di ua Jesus e le sel lebekiis er a kodall e te dirk osisiu el chad, engdi ngmo ngodech a bedengir el mo ua bedengir a rechanghel. Ngdiak loba sel di mla bedengir er a klechad el mo er a eanged.—1 Pe. 3:18; 1 Ko. 15:42-53; 1 Jn. 3:2.
Me a omelatk el dobang el kirel a okiis a diak lultuil er aike el mo meketmokl el mo er a cheklechel a chad, e ngbai ultuil er a klaumerang er kid er a Dios el kmo ngsebechel, e kmal semeriar el mo olekiis er a rulekoad. (Rel. 24:15) Me alta ngdiak dungil el medengelii a rolel e a Dios a ullekiis er a rechad er a irechar me a rolel a bo lolekiis er a rechad er a ngar medad, engdi kede di mo ultuil a klaumerang er kid er Ngii. Sera lokisii a Jesus er a kodall, e ngmileketeklii el kmo a omelatk er a okiis a mera el mo tmaut.—Rel. 17:31; Lk. 24:2, 3.
A Rekristiano a dirrek el ungil a lolatk el kirel a siukang, me a uldesuir a rechad, me a llach er a beluu el kirel sel taem el bo lolakl er a chederir el mla mad. (2 Ko. 6:3, 4) Me seikid e ngdi mo ultuil er a omelilt er a chad me a lechub e ngtelungalek el kmo te mo durur a bedengel me a lechub e ngdiak.