A Nger Er Aike El Ker Er A Biblia

Ngera uchul me kede meluluuch?

A Jehovah el Dios a soal a demimokl el mengedecheduch er ngii er a bek el taem el kirel aike el tekoi el suebek a rengud er ngii. (Lukas 18:1-7) Ngii el semeriar er kid a uchul me ngorrenges a nglunguched. Me a lsekum ngika el Demad el ngar er a eanged a kmal mengemedaol er kid el mo meluluuch el mo er ngii, e ngera uchul me ngdiak dekengei er tia el ongtil?​—Monguiu er a Filipi 4:6.

A nglunguuch a diak di el tekoi er a ongit. Ngdirrek el ngosukid el mo kmeed er a Dios. (Psalm 8:3, 4) Sel deblechoel el ouchais a uldesued el mo er Ngii e kede mekurulii a kmes el deleuill er kid el obengkel.​—Monguiu er a Jakobus 4:8.

Ngmekerang a doluluuch?

A Dios a diak el soal a doluluuch el melekoi a tekoi el kora mengas a rengrir a rechad me a lechub e di domelekl a nglunguched. Ngdiak longerechir er kid er a ileakl el teleteled sel doluluuch. Ngbai soal a doluluuch el mo er ngii el mera el ngar er a rengud. (Mateus 6:7) El ua tiang, ngar er a beluu er a Israel er a irechar e a Hana a milluluuch el kirel a meringel el mondai er a chelsel a telungalek er ngii. Me sera bo lak el mekngit a rengul e bocha ledeu a rengul, e ngmilluluuch el mereng a sulel a Dios.​—Monguiu er a 1 Samuel 1:10, 12, 13, 26, 27; 2:1.

Ngkmal ileakl a techall el dobang! Ngsebeched el mengedecheduch er ngika el Ulemeob er kid el ouchais aike el tekoi el suebek a rengud er ngii. Ngdirrek el sebeched el oldanges er ngii e mereng a sulel. Me ngkmal diak el kired el mengemikr er tia el ileakl el techall el dobang el meluluuch el mo er ngii.​—Monguiu er a Psalm 145:14-16.