“Mnga Rengmiu el Mo Chemau a ikel Tekoi el Ngar a Eanged”

1, 2. (a) Ngera uchul me a ongdibel er a Kolose a mlo chelebangel er a kdekudel el tekoi? (b) Ngera el uleklatk a ngilsuterir a rudam me te millemolem el sechelil a Dios?

A ONGDIBEL er a Kolose er a irechar a mlo chelebangel er a kdekudel el tekoi el mle sebechel el tomellii a kltarreng er a delongelir! A rebebil er a rudam a millekoi el kmo a rebek el chad a kirir el mo olengesenges er a Llach er a Moses. E a rekuk bebil a millekoi el kmo ngmekngit a doldeu a rengud er a ungil el tekoi. Me a Paulus a milsmechokl a uldesuir er a ledu el kmo: “Bo mkerekikl me lak a chad el ebedemiu er a chelsengsang el leko ng llomeserreng er a klechad, el uldelid el mei el okiu a re chad . . . e diak le mlar a Kristus el mei.”​—Kol. 2:8.

² Tirke el ngellitel el Kristiano okmo te mo oltirakl a uldesuir a rechad, e te mo otngeklii sel techellir el mo ngelekel a Dios. (Kol. 2:20-23) Me a bo lengesuterir el melemolem er sel mekreos el klausechelei er tir el obengkel a Dios, e a Paulus a dilu el kmo: “Mnga rengmiu el mo chemau a ikel tekoi el ngar a eanged, e lak likel ngar a chutem.” (Kol. 3:2) Tirka el Kristiano a mle kirir el melatk er sel ileakl el techellir el mo kiei el mo cherechar el ngar er a eanged.​—Kol.1:4, 5.

3. (a) Ngera el omelatk a lobang a rengellitel el Kristiano? (b) Ngera el ker a bo dosaod el ngar er tia el suobel?

³ A rengellitel el Kristiano er chelechang a dirrek el blechoel el melatk er a Rengedel a Dios me sel omeltkir el ‘mo ngma dikesir el obengkel a Kristus.’ (Rom 8:14-17) Engdi kuk mekerang el kirir tirke el oba omelatk el mo kiei er a chutem? A tekingel a Paulus ngera belkul el kirir? Te mekerang e mo chemau “a ikel tekoi el ngar a eanged”? (Jn. 10:16) A Abraham me a Moses a millemolem el chemau aike el tekoi el ngar er a eanged el mo lmuut er a chelsel a meringel el taem. Kede mekerang a doukerebai er tir?

NGERA BELKUL A BO DECHAU A TEKOI EL NGAR ER A EANGED?

4. Te mekerang a Rekristiano el oba omelatk el mo kiei er a chutem e mo chemau aike el tekoi el ngar er a eanged?

⁴ Tirke el oba omelatk el mo kiei er a chutem a kirir el mo chemau aike el tekoi el ngar er a eanged. Te meruul el uaisei sel lenguu a Jehovah me a Rengedel el mo kot er a klengar er tir. (Lk. 10:25-27) Tiaikid a lurruul er ngii a Kristus me ngdirrek el kired el mo meruul el uaisei. (1 Pe. 2:21) A Rekristiano er a irechar a mle iliuekl er a rechad el millisiich a tekoi er a kerruul, klsuul el osisechakl me a uldasu er tia el beluulechad. Me chelechang e kede metik aika el osisiu el tekoi er a chelsel tia el beluulechad er a Satan. (Monguiu er a 2 Korinth 10:4, 5.) Ngkired el mo oukerebai er a Jesus e mengeroid er kid er a ngii di lengerang el sebechel el tomellii a deleuill er kid me a Jehovah.

5. Ngera el ker a kired el oker el kirel a osenged er a udoud me a klalo?

⁵ Kid kede mla mechetakl el mo oba osengel a beluulechad el kirel a udoud me a klalo? Aike el tekoi el domes el meklou a ultutelel a mocholt el okiu aike el tekoi el domdasu me aike el doruul. A Jesus a dilu el kmo: “A rengum a di mo blechoel el ngar sel le ngar ngii a mekreos el kloklem.” (Mt. 6:21) Me ngkired el di kid el oker el kmo, ngera sel kot el klou a ultutelel el tekoi el kired? Kid kede mengoit er a klou el taem el melatk el kirel a udoud me a rolel e kede mo nguu a kuk ungil el ureor, me a lechub e kede melasem el osiik er a ungilbesul el rolel a klengar? Me a lechub e kede melasem el omekbeot er a klengar er kid e oltaut a osenged er a deleuill er kid me a Jehovah? (Mt. 6:22) A Jesus a dilu el kmo a lsekum kede di ‘mengudel a mekreos el klalo el kired er tial beluulchad,’ e ngsebeched el oridii sel deleuill er kid el obengkel a Jehovah.​—Mt. 6:19, 20, 24.

6. Kede mekerang e mo mesisiich er a ongetikaik el mo meruul a mekngit?

⁶ Kid a diak demecherrungel me ngbeot er kid el mo meruul a mekngit. (Monguiu er a Rom 7:21-25.) Me a lsekum e ngdiak bo dultuil er a chedaol klisichel a Dios, e ngklou a techelled el mo “meruul a delengerenger” e “di melim el mo cheltelaol” e “mor a bek el bedengel a deleboes el delengerenger.” (Rom 13:12, 13) Me a lsoad el melemolem el oltngakl a ngelbesel a rengud, e ngkired el blechoel el mo chemau aike el tekoi el ngar er a eanged. E tia ousbech er a klou el ureor el uchul me a Paulus a dilu el kmo: “Ma bedengek a kulik er ngii el omtebechel er ngii.” (1 Ko. 9:27) Me kid me ngdirrek el kired el mo uaisei. Me bo dosaod a kerebai er a reteru el blak a rengrir el chad el mirruul aike el sebechir el mo oldeu er a rengul a Dios.​—Heb. 11:6.

A ABRAHAM A ULUUMERANG ER A JEHOVAH

7, 8. (a) Ngera mle mondai er a Abraham me a Sara? (b) Ngera el tekoi able leblechoel a Abraham el melatk er ngii?

⁷ A Jehovah a dilu er a Abraham me lolukl ngii me a telungalek er ngii el mo er a beluu er a Kanaan, me te kilengei el merael. A klaumerang me a blekongesenges er a Abraham a uchul me a Jehovah a rirellii a telbiil el obengkel el kmo: “Ak mo meskau a betok el uldidellel a rsechem el belurir a mo merael chisel. E ngak a mo omekngeltengat er kau.” (Gen. 12:2) A betok el rak er a uriul, e a Abraham me a Sara a dirrek el dirkak bo loungalek. A Abraham ngmlo omdasu el kmo a Jehovah a mla obes er sel telbilel? Ngdimlak lebeot a klengar er ngii er seikid el taem. Ngchilitii a ungilbesul el klengar er ngii er a beluu er a Ur e mirrael el kuk betok er a 1,000 mael el mo er a Kanaan. Me ngii me a telungalek er ngii a kiliei er a chelsel a tento, e mlo er ngii a taem el mo diak a kelir, e dirrek el mla er ngii a remerechorech el omais er bita er tir. (Gen. 12:5, 10; 13:18; 14:10-16) Me nguaisei, engdi ngii me a telungalek er ngii a dimlak lekengei el lmuut el mo er a Ur.​—Monguiu er a Hebru 11:8-12, 15.

⁸ A Abraham a uluumerang er a Jehovah e dimlak bo lechau aike el tekoi el “ngar a chutem.” (Gen. 15:6) Ngmle blechoel el melatk aike el telbilel a Jehovah el mo er ngii. Me a Jehovah a milsa sel klaumerang er ngii me ngdilu er ngii el kmo: “Ka momes el mor a eanged e momechur a btuch, a le sebechem; a ruldidellel a rsechem a mo ua ildisel a btuch.” (Gen. 15:5) Me a Abraham er a lerengesii tiang, e ngmlo medengei el kmo a Jehovah a dirkak lobes er ngii. Me a bek el taem el lomes a btuch er a eanged e ngmo melatk er sel telbilel a Jehovah el mo msang a betok el uldidellel a rsechel. Me ngar er sel temel a Jehovah, e a Abraham a mlo er ngii a ngelekel el sechal, el di ua sel letilbir a Jehovah.​—Gen. 21:1, 2.

9. Ngmekerang e sebeched el oukerebai er a Abraham?

⁹ Kid a di ua Abraham el dirrek el mengiil a otutel aike el telbilel a Jehovah. (2 Pe. 3:13) Me a lsekum ngdiak bo dechau aike el tekoi el ngar er a eanged, e kede locha mo omdasu el kmo aika el telbiil a meudang me ngmo diak el blak a rengud el mesiou er a Jehovah el ua ngar er a mong. Sera uchelel, e ke locha chiloit a bebil el tekoi me bo el sebechem el mo pioneer me a lechub e ke mo teloi er a kuk ta er a rolel a omesiou. Engdi ngera ke meruul er ngii er chelechang? Kau ke di ua Abraham el riruul aike el sebechel el mo er a Jehovah e ulemes el beduluchei el kirel a klengeltengat el mo er ngii? (Heb. 11:10) A Abraham a uluumerang er a Jehovah me ngulebasech el sechelil a Dios.​—Rom 4:3.

A MOSES A ULEMES “ER A DIOS EL NGIKEL DIAK LE MOUES”

10. Ngmle ua ngerang a okurulel a Moses?

¹⁰ A Moses a dirrek el ulemes el bedul aike el tekoi el ngar er a eanged. Ngmlukeroul el chedal a telungalek er a Farao er a taem el beluu er a Ekipten a mle kot el mesisiich el renged er a beluulechad. A Biblia a kmo: “Ng mlosisechakl er a bek el llomeserreng er a re chad er a Ekipten.” Me tia el ngarbab el skuul a rirellii el mo “mesisiich a tekingel ma omerellel.” (Rel. 7:22) A okurulel a Moses a uchul me ngmla er ngii a techellel el mo klou a ultutelel el chad er a Ekipten. Engdi ngmla er ngii a kuk ta er a tekoi el mle klou a ultutelel er ngii.

11, 12. Ngera el klemedengei a mle klou a ultutelel er a Moses? Kede mekerang e medengelii tia el tekoi?

¹¹ A Moses er sera lengalek, e a delal el Johebet a ullisechakl er ngii el kirel a Dios er a rechad er a Hebru. Ngulemes er tia el klemedengei el kirel a Jehovah el lmuut el klou a ultutelel er a ngii di el tekoi. Me ngmle dmeu a rengul el mo imikr a ilteet me a klisiich me bo el sebechel el meruul a soal a Dios. (Monguiu er a Hebru 11:24-27.) Me a tekoi el lesiluub er a dirk lekekerei me a klaumerang er ngii er a Jehovah a ngilsuir el mo chemau aike el tekoi el ngar er a eanged.

¹² Me alta e a Moses a tilobed er a kot el ngarbab el skuul el mla er ngii er a Ekipten, engdi ngdimlak lousbech er tia el techellel el mo merael a chisel, me a lechub e ngmo mesisiich e merau el chad. A mera er ngii, a Biblia a kmo: “Ng mle chetil a lolekoi er ngii el kmo ng ngelekel a ngelekel a Farao el redil. Ng bai mle soal mo chuarm el obengterir a re chedal a Dios, e dimlak el soal el ngar a tedeb el deurreng er a klengit.” A betok el rak er a uriul, e nguluusbech er a klemedengei er ngii el kirel a Jehovah el mo omekrael er a rechad er a Israel.

13, 14. (a) Ngera mle kirel a Moses el suubii er a uchei er a bo loltobed er a rechedal a Jehovah er a klsibai? (b) E ngera el tekoi a kired el meruul?

¹³ A Moses a mle betik a rengul er a Jehovah me a rechedal, el tir a mle sibai el ngar er a Ekipten er sel taem. Me sera bo le 40 a rekil e ngulemdasu el kmo ngmla mo kltmokl el mo oltobed er tir er a klsibai. (Rel. 7:23-25) Engdi a Jehovah a mle medengei el kmo ngdirkak bo el sebechel el meruul er tia el tekoi. Ngdirk mle kirel el mesuub el mo oba klengariourreng, kllourreng, delemedemekerreng, me a ulserechakl el reng. (Osi. 15:33) A Moses a mle kirel el mesuub aikang me bo el sebechel el outekangel a meringel el blekeradel el bo lechelebangel er a uriul. Me aike el 40 el rak el luluureor el mengkar a sib a ngilsuir el mo mekeroul aika el blekeradel.

¹⁴ Me tia el omeruul, ngmle sebechel el ngosuir a Moses? Ochoi, a Biblia a kmo: “Ng kuk ngariou a rengul er a re bek el chad el ngar a beluulchad.” (Ule. 12:3) Ngmilsuub el mo ngariou a rengul me ngmle sebechel el oba kllourreng el mo er a bek el bedengir a rechad me a mondai er tir. (Exo. 18:26) Kid a dirrek el kired el omekeroul a ungil el blekeradel el mo ngosukid el mo suobel er a “kloul ringel” e mo soiseb er a beches el beluulechad er a Dios. (Och. 7:14, BT) Me kid ngbeot er kid el teloi er a rechad, el uldimukl er tirke el domdasu el kmo te di mereched el mo kesib a rengrir me a lechub e ngmetemall a rengrir? A tekingel a apostol el Petrus a sebechel el ngosukid. Ngdilu el kmo: “Mongull er a rokui el chad, e bo le betik a rengmiu er a re chedal a Dios.”​—1 Pe. 2:17.

MOLEMOLEM EL CHEMAU AIKE EL TEKOI EL NGAR ER A EANGED

15, 16. (a) Ngera uchul me ngkired el mo chemau aike el tekoi el ngar er a eanged? (b) Ngera uchul me a Rekristiano a kirir el mo kerekikl a omerellir?

¹⁵ Kede kiei er a taem el di “mo medbedubech” a ringel er ngii. (2 Ti. 3:1) Sei a uchul me ngkired el mo chemau aike el tekoi el ngar er a eanged me bo el sebeched el melemolem el di mekar. (1 Th. 5:6-9) Me bo dosaod a edei el rolel e ngsebeched el meruul er tia el tekoi.

¹⁶ A omerelled: A Petrus a silodii el kmo a ungil el omerelled a kmal klou a ultutelel er a ledu el kmo: “A blekerdeliu er mederir tirkel diak loumerang er a Dios a kirel kmal mo ungil me . . . te mo mes a ungil el omerelliu e mo oldanges er a Dios.” (1 Pe. 2:12) Ngkmal kired el mo kerekikl me a omerelled bo luchul a odanges el mo er a Jehovah, alta e kede ngar er a blid, ngar er a ureor, ngar er a skuul, kede milil, me a lechub e kede omerk er a klumech. Kid el rokui a diak demecherrungel me kede mo meruul a cheleuid. (Rom 3:23) Engdi ngdiak el kirel el mo mechitechut a rengud. Ngokiu a ngelsuil a Jehovah e ngsebechel el mo ‘meduch a rengud el mengaidesachel el mo ungil el oltirakl er a rolel a doumerang.’​—1 Ti. 6:12.

17. Ngmekerang e sebeched el oukerebai er a blekerdelel a Jesus? (Momes er a siasing er a uchelel a suobel.)

¹⁷ A blekerdeled: A ungil el blekerdeled a mo uchul e ngsebeched el olecholt a ungil el omeruul. A apostol el Paulus a kmo: “A reng el ngar a chelsiu a kirel el mo ua blekerdelel a rengul a Kristus Jesus.” (Fil. 2:5) Ngmle ua ngera blekerdelel a Jesus? Ngmle ngariou a rengul me ngkmal mle soal el msang a Jehovah aike el kot el ungil er ngii. Ngdi mle blechoel el melatk el kirel a berkel a ungil chais er a Rengedel a Dios. (Mk. 1:38; 13:10) A Jesus a dirrek el ulemes a ulekrael el ngar er a Tekingel a Dios el kmal meklou a ultutelel. (Jn. 7:16; 8:28) Me ngmle kerekikl el mesuub er a Chedaol Llechukl me bo el sebechel el omelekl el melekoi, e mesaod, e mesebechakl er ngii. Me a lsekum kede mo omdasu el ua Kristus, e ngmo ngariou a rengud e mo blak a rengud el mesuub er a Biblia e meruul er a omesiunged.

18. Ngera el meklou a ultutelel el tekoi a sebeched el meruul el mo olengeseu er a urerel a Jehovah?

¹⁸ A ngelsuid: A moktek er a Dios a soal “tirkel rokui el ngar a eanged ma beluulchad” a bo lolengesenges er a Jesus. (Fil. 2:9-11) Me alta e a Jesus a kmal ngarbab a deruchellel, engdi ngkongei el olengesenges er a Demal. Me kid me ngdirrek el kired el mo meruul el uaisei. (1 Ko. 15:28) Kede teloi er a urerel a Jehovah sel domerk er a klumech el mo er a “bek el bedengir a re chad” e ‘meruul er tir el mo obengkel’ a Jesus. (Mt. 28:19) Kede dirrek el ‘meruul a ungil el mor a re bek el chad’ el uldimukl er a rengar bita er kid me a rudam er kid.​—Gal. 6:10.

19. Ngkirel el mo blak a rengud el mekerang?

¹⁹ Kede oba omereng el saul e le Jehovah a omeklatk er kid el mo chemau aike el tekoi el ngar er a eanged! Me ngkirel el mo “meduch a rengud er sel klaidesachel er a rurt el de chelebangel er ngii.” (Heb. 12:1) Mada ‘bo le blak a rengud’ el oureor el mo er a Jehovah el Demad el ngar er a eanged el ulterekokl a rengud el kmo ngmo omekngeltengat er kid.​—Kol. 3:23.