Kau Ke Meruul a Tekoi el Ledu er Kau a Dios?

Nglocha diak bo mdu er a chad el diak modengelii me a lechub e kom kuk di kaodengei el kmo: “Di molekoi aike el soam, e ak di kongei el mo meruul.” Me nguaisei, engdi nglocha beot er kau el dulii tia el tekoi el mo er a chad el kmal sechelim. A rechad el kmal kausechelei a kongei el kaingeseu er a delongelir.

A Biblia a meketeklii el kmo a Jehovah a blechoel el meruul a tekoi el lodengei el kmo ngmo uchul a deuil a rengrir tirke el mengull er ngii. A King el David a kmal mle kmes a deleuill er ngii me a Dios me ngdilu el kmo: “RUBAK el Dios er ngak, ke mla remuul a betok el tekoi el kiram. . . . Ke mla remuul a betok el ungil uldasu el kiram. A bo kulasem el ouchais el rokui, e ng kuk betok er a ikel sebechek el mchais.” (Psalm 40:5) A Jehovah a dirrek el meruul a tekoi el mo uchul a deuil a rengrir tirke el dirkak bo lodengelii. Ng ‘mesterir a kelir e omekeek a rengrir er a deurreng.’​—Rellir 14:17.

Me a blekerdelel a Jehovah el soal el meruul a tekoi el mo uchul a deurreng er a rechad a uchul me ngkirir tirke el sorir el mo sechelil a Dios el meruul a tekoi el ‘rullii a rengul el mo ungil.’ (Osisechakl 27:11) Engdi ngera sebechem el remuul el mo odeuir a rengul a Dios? A Biblia a kmo: “Lak mobes el meruul a ungil e morous a ikel ngar ngii er kemiu, ele Dios a dmeu a rengul er choua isel tenget.” (Hebru 13:16) Me ngbelkul a kmo kede odeuir a rengul a Jehovah el di okiu a ungil a blekerdeled me a blekururau er kid?

A Biblia a kmo: “Ng diak a chad el diak loumerang e sebechel el odeuir a rengul a Dios.” (Hebru 11:⁠6) Me a Abraham el ngii a ulechotii a klaumerang er ngii a mlo okedongall el “sechelil a Dios.” (Jakobus 2:23) A Jesus a dirrek el ulechotii el kmo ngkired el mo ‘oumera er a Dios’ a lsekum ngsoad a lomekngeltengat er kid. (Johanes 14:1) Me ke mekerang e mekurulii a klaumerang er kau, el uchul me a Dios a mo soal el olekeed er ngii er kau? Ngsebechem el omuchel el meruul er tiang el okiu sel bo blechoel el mesuub er a Tekingel a Dios el Biblia. Sel bo muaisei, e ke mo “ungil el medengelii a soal” a Dios, me a tekoi el cho moruul a di mo “blechoel el ungil er a rengul.” Me a cherengel a taem el lemukeroul a klemedengei er kau er a Jehovah e moltirakl a melemalt el llechul, e ngmo mesisiich a klaumerang er kau e Ngii a mengal mo olekeed er Ngii er kau.​—Kolose 1:9, 10.