OMESODEL A SUOBEL ER A MEDAL TIA EL BABIER | NGSEBECHEM EL MO KMEED ER A DIOS
Kau, Ke Melechesukau el Kmeed er a Dios?
“A kmes el deleuill er kau me a Dios a rullau el mo ulterekokl e selebechakl e dirrek el ultebechel a rengum. Ngdi ua dedu el kmo a Dios a di blechoel el osiik a mo uchul a klungiolem.”—CHRISTOPHER, EL KEKEREI EL CHAD ER A BELUU ER A GHANA.
“A Dios a medengei a bek el chelebulem, me ngolecholt er a bltkil a rengul me a ulekerreuil el bedul kau el engelakl er aike el molengit er ngii.”—13 A REKIL EL HANNAH, ALASKA, U.S.A.
“Sel modengei el kmo ngungil a deleuill er kau me a Dios e ngrullau el mo chelellakl a rengum e tia kmal ungil el tekoi!”—GINA, EL REDIL ER A JAMAICA EL 40 ME A DERENGEL A REKIL.
Te dirrek el ngar er ngii a rebetok el chad el meliuekl er a beluulechad el ua uldesuel a Christopher, Hannah, me a Gina el oumerang el kmo te sechelil a Dios. E kau a mekerang? Ke melechesukau el kmeed er a Dios? Me a lechub e ngsoam el olekeed er kau er ngii? Ke locha dirrek el mo melatk el kmo: ‘Ngmera el sebechel a di chad el mo kmeed er a Dios el Olab a Bek el Klisiich? Me a lsekum e ngsebechel, e ngera kirel el meruul er ngii?’
NGSEBECHEM EL MO KMEED ER A DIOS
A doltirakl er a Biblia e ngsebechel el mo er ngii a kmes el deleuill er kau me a Dios. A Biblia a melekoi el kmo a Dios a ulemekedong er a Abraham el kmo, ng “sechelik.” (Isaia 41:8) Me a tekoi el medung er a Jakobus 4:8 a mengelaod er kid er a ledu el kmo: “Molekeed er kemiu er a Dios, me bo lekeed er kemiu.” Me ngbleketakl el kmo ngsebechem el omak er a ungil el klausechelei er kau me a Dios. Engdi ke mekerang e mo ‘olekeed er kau’ er a Dios el ngii a diak el sebechem el mesang?
Ka di molatk er a rolel a reteru el chad a lomak er a deleuill er tir. Te blechoel el omuchel el kaiuecholt a ngklir. Me sel leblechoel el chadecheduch e lekauchais a uldesuir, e a deleuill er tir a mukeroul. E sel lekaingeseu er a delongelir e a klausechelei er tir a mengal mo mesisiich. Ngsebeched el melekoi a osisiu el tekoi el kirel a rolel a domekeroul er a deleuill er kid el obengkel a Dios. Me bo dosaod.